Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale kam Sasarainangku! Siripot sipuoni simatonem baga ka tubut Tuhan Jesus Kristus, Tuhan Sipulubeunan, buí nupabaggei kam sirimanua, kalulut masiitsó sirimanuania.
2 Aipoí ké moi sia sara simakayo sibara sip-sip emas, samba sipuleleppei simalainge ka parurukatmui, lepá oi sia mitsá ka sia sipuleleppei leppei pabiri-birit,
3 bailiu simakayo peilé makopé nuhormati kam. Kuamui lé ka matania, "Sené puuddet kam ka kam, Tuan, ka uddenan simalainge." Tápoi ka tubudda geti ka sia simagebá, kuamui lé, "Rióaké ekeu sedda," elé, "Seddangan té nupuuuddet ka bagat lalep."
4 Ka sigalaiakenenmui néné, anupabaggeian kam sia saalei pasasambamui. Siripot sipinaatumui sikataían lé anupakei kam masinilai sirimanua.
5 Repdem kam sikuakku néné, ale kam Sasaraina kilibet bagakku! Simagebá ka polak néné, aipiliyan sia Taikamanua bailiu simakayo ka putotonem baga ka tubut Tuhan Jesus. Sia té ibabailiu sapaamian Taikamanua, kelé sipinalelek Taikamanua ka tubudda simakaté baga ka tubunia.
6 Tápoi nupalololoi lé kam sia simagebá. Oto simakayo lé ipaoorei kam samba ipagigirit kam, rataroaké kam ka pengadilan!
7 Sia té masipaloloi oni simalatsat, sisilómui sibara ka Taikamanua!
8 Simaerú te sigalaiakenenmui néné, ké nugalaiaké baí kam surukat Taikamanua siripot sitususurat ka Buko Sipunenan sipasikukua kisé, "Kau imakaté bagam ka tubudda saaleinu sirimanua, kelé katet bagam kekeu ka tubum."
9 Oto ké nupabaggei kam saaleimui sirimanua kalulut masiitsó sirimanuania, anugalaian kam jo. Siripot surukat Taikamanua, kam néné tuoniaké sipasabau surukat.
10 Sia sipasabau sara ka talagat surukat Taikamanua, tukuangan lé nia, arapasabauan sangamberinia.
11 Aipoí sia sipasikukua, "Buí nupaelet," sia leú et masikukua, "Buí nupamatei." Oto kenanen tá apaelet kam, tápoi anumateiakéan kam sirimanua; oto anupasabauan leú et kam surukat.
12 Oto buítá kélé aituaadili ekeu siripot surukat Taikamanua sipasiuujaaké sirimanua, nupanibo samba nugalaiaké apa pá galajetnu.
13 Aipoí ka sia Taikamanua, bulat tá ipukakateki sia baga, sitá anai katet baga ka tubudda sirimanua. Tápoi nuntut bagat Taikamanua peilé abeu ka ukuman!
14 Ale kam Sasaraina! Aponia uktukra sipasikukua, "Simatonem baga ka tubut Tuhan Jesus lé aku néné," ké tá ipatoilá putotonem bagania néné ka sigalaiakenennia? Momoi leú pá irop'aké nia tonem baga kelé néné?
15 Ké ai baí sara sasarainamui, elé sara maniumui tá anai leppei pakeietnia, elé sitaimaigi kan ka purimanuaiatnia senen gogoi.
16 Apangan lé lulunia nukukua kam ka matadda, "Kauan pakeian kam leppei simakeppu baga, imaoloi bagamui, elé nukua kam, kauan pukom'an kam pat ektek!", ké tá nukau kam ka tubudda ibara pakeietda ka purimanuaiatra?
17 Oto kisedda leú te ka sia putotonem baga kai Tuhan Jesus, ké tá tupatoilá nia ka pasigagalaiaké, tá anai katukaunan nia.
18 Kupaatu ai sia sipasikukua, "Ai sia sipasisisiddoni putotonem bagania kai Tuhan Jesus; tápoi ai leú et sia sipasisisiddoni sigalaiakenennia." Oto, "Patoilá peité kam ka tubukku, kipa rapaeerú sirimanua ibara tonem bagadda tápoi tá airagagalaiaké siripot putotonem bagadda, iageti patoilákungan kaku sigalaiakenenku siripot kababarania tonem bagakku."
19 Matonem tebaí bagamui sarat sara lé Tuhan, elé? Tápoi beri leú et ka sia paketsa-ketsat sikataí leú et, matonem bagadda, bulat pat geret tubudda, kopet kataí lotóra!
20 Bulat sitaiagai paatuat lé kam néné! Kipa, nubebesíaké peilé kam tupatoilá ka tubumui tatat lulunia mutonem baga sitaigagalaiakenen?
21 Repdem peité kam, kelé ka sia taikebbukatta si Abraham. Lulunia aisiló nia Taikamanua, kalulut sigalaiakenennia ka tetret aibuluaké togania si Isak, ka Taikamanua ka pasibuluat.
22 Oto sené, amatoiláan putotonem baga ka tubut Tuhan Jesus néné, buítá tapatoilá kam nia ka pasigagalaiakéta nia, bulé bulat imasut ituenung'aké putotonem baga néné.
23 Néné maipó kelé ka sikuat Buko Sipunenan, "Kalulut tonem bagat Abraham ka tubut Taikamanua, bailiu silónangan nia Taikamanua, kelé sara sipasigagalaiaké siobat bagat Taikamanua." Iaté lulunia aituoniaké nia si Abraham néné, "Suruak Taikamanua."
24 Oto amakolouan kineneiget, kalulut sigalaiakenenda lé isisiló sia Taikamanua, tá sarat kalulut tonem bagadda ka tubunia.
25 Repdem leú kam kelé ka sia kai Rahab, sara sinanalep simaolop tubu. Aisiló nia Taikamanua kalulut sigalaiakenennia; iaté aisiló tairauma sibara ka tai Israel sipasitataiko laggai Kanaan ka lalepnia, samba airop'aké sia bulé ratui-tui rakaddiuaké laggai ka enungan bagei.
26 Kelé ka sia tubu néné, ké tá anai ketsat, tubu néné simamatei lé. Ialeú et ka sia tonem baga, ké tá tugalaiaké, bailiu tonem baga néné simamatei lé.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA