Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O jaji ma di-disiraka gee 'o Musa wositota-totara, ge'enaka de ma 'ena 'o 'atorangi ma ngale 'o nyawa wisuba ma Jo'oungu ma Dutu de mita 'o 'atorangi ma ngale ma Jo'oungu ma Dutu wi suba-suba ma ngii gee 'o nyawa yodi-diaiku.

² 'O woa moi yodiaide, de gee ma bionino 'idadu yosironga 'o Ngii 'Itebi-tebini. Ge'enaka dau 'o silo ma to-todenge, de mita 'o meja de 'o roti gee yosisuba-suba ma Jo'oungu ma Dutuka.

³ Doka ma dodaka, ge'ena la gee 'o Ngii 'Itebi-tebini ma da-datoko 'o ngai moioli ma dudunika, ge'enaka 'o ngii gee yosironga 'o Ngii 'Itebini 'Ifo-foloi.

⁴ Ma ngii ge'ena ma dodaka 'o manyanyi yodu-dutuuku ma ngii gee 'o guraci yadiaiku, de 'o peti moi yosironga 'o Jaji ma Peti gee yosilape yabootoka de 'o guraci. Ma peti ge'ena ma dodaka doka de ma 'ena 'isoka 'o 'akere ma ngii 'o guraci. De ma 'akere ma ngii ge'ena ma dodaka 'o manna, de 'o Harun wi papadi gee 'ito-to'ori, de 'o teto 'ipa-palaka 'o ngai modidi gee 'isilefoka 'o besesongo mogiooko ma Jo'oungu ma Dutuno.

⁵ Ma peti ma dekuoka ge'ena 'o dulada 'o ngai modidioka de ma gatuuoka gee yosironga 'o kerub, 'isino-nako ma Jo'oungu ma Dutu woku-kumati 'awi bo-boa. Ma dulada ngai modidi ge'ena ma gatuuku 'isoseka ma peti ma da-damunu ma dekude, ge'ena la 'o so-sowono ma du-duusu ma ngii. Ma 'iodumu ge'ena koidadiwa posiwaiti pamoi-moi ma 'orasi ne'ena.

⁶ Ma Jo'oungu ma Dutu wi suba-suba ma ngiioka ge'ena ya'aturu koge'ena. 'O wange 'isinoi-noimi 'o 'imam-'imam yowosama 'o Ngii 'Itebi-tebinika gee ma bionino 'idadu ge'ena, ma ngale ya'ao to 'ona manga manarama.

⁷ Gee yowosa-wosama 'o ngiika gee dokaikau 'idadu ma woaka ge'ena, ge'ena la 'o Ngii 'Itebi-tebini 'Ifo-foloika, duga ka 'o 'Imam ma Amoko. 'O 'Imam ma Amoko koge'ena wodiai 'o taunu moi ka ma moi. De ge'ena wadiai, wa'asa 'o haewani ma 'aunu la wosisuba ma Jo'oungu ma Dutuka sababu to 'una ma sirete 'awi sowono de mita to ma Jo'oungu ma Dutu wi kawasa manga sowono gee yodiai koyomanakowa.

⁸ De ma 'atorangi ge'ena, 'o Ngomasa 'Itebi-tebini 'isidumutu 'iwai-waiti 'ato nako ma Jo'oungu ma Dutu wi suba-suba ma ngii kaipakesi, ge'ena 'o ngekomo gee dokaika 'o Ngii 'Itebini 'Ifo-foloika 'isiika koipelengawasi.

⁹ Ne'ena ge'ena 'isino-nako ma 'orasi ne'ena naga. So 'o su-suba 'iregu-regu de 'o su-suba 'o haewani gee yosisuba-suba ma Jo'oungu ma Dutuka, koya'akunuwa yositiai 'o nyawa gee 'o su-suba yo'asa-'asa manga singina.

¹⁰ Sababu 'iodumu ge'ena duga ka ma ngale 'o 'inomo, 'o gokere, de 'i'ini-'inioka yodiai ma ngale yomatebini ge'ena 'iodumu 'o sagala 'atorangi ka 'o nyawano, gee 'ipake duga ka sigado ma 'orasi ma Jo'oungu ma Dutu wodiai ma sungi.

¹¹ Duga ma Kristus woboakau, 'una ge'ena ma 'Imam ma Amoko ma ngale 'o sagala moi-moi yaowa-owa gee nagau. Sababu 'unau wowosamokau ma Jo'oungu ma Dutu 'awi Woaka ge'ena la 'o woa gee 'ifoloiosi 'ikaramati de 'itotomo. Ge'ena ko 'o nyawawa yadiaiku, ma ngale ko 'o dunianowa gee 'isidadi-dadiku ne'ena.

¹² Ma Kristus wowosama 'o Ngii 'Itebini 'Ifo-foloika duga ka ma moi ma ngale kaisi'ado-'adonika. Ma 'orasi ge'ena 'una kowo'asawa 'o kabingi ma nauru ma 'aunu bolo 'o sapi ma ngowaka ma 'aunu ma ngale wosisuba, ma 'una wo'asa to 'una ma sirete wi 'aunu womasisarakaniokau wodadi 'o su-suba ma Jo'oungu ma Dutuka. De ge'enau 'una wonasipidili 'o sowonoka kaisi'ado-'adonika.

¹³ 'O kabingi ma 'aunu de 'o sapi ma nauru ma 'aunu, de 'o su-suba 'o sapi ma ngowaka yatuuoka de ma kakawo, ge'ena yapake ma ngale yakisibilaroto 'o nyawa-nyawa gee yomedi-mediri moteke 'o 'agama ma 'atorangi, ma ngale yakisitebini manga roese.

¹⁴ Aa, nako 'o 'aunu de 'o kakawo ma 'idadioka yakisitebini 'o nyawa-nyawa yomedi-mediri moteke 'o 'agama ma 'atorangi, ge'ena to ma Kristusosi 'awi 'aunu 'ifoloi 'inasitebini nanga so-sowonoka. Ma ngekomo 'o Ngomasa gee 'ika-kakali, ma Kristus 'awi roese ma sirete wosisuba ma Jo'oungu ma Dutuka ge'ena la 'o su-suba gee 'itoto-totomo. 'Awi 'aunu 'inasitebini to ngone nanga di-diai 'ito-torouoka, la ngone 'idadi powileleani ma Jo'oungu ma Dutu gee wowango-wango.

¹⁵ Ge'enau so ma ngekomo ma Kristus, ma Jo'oungu ma Dutu wodiai 'o jaji ma sungi 'awi kawasaka, la 'o nyawa gee ma Jo'oungu ma Dutu waki'asokokau 'idadi yamake 'o sagala co-catu 'ika-kakali gee ma Jo'oungu ma Dutu wosijajiokau. Ge'ena 'iodumu 'idadi sababu ma Kristus wosongene, de ge'enau yakisipidili 'o nyawa manga so-sowonoka gee yodiai ma 'orasi 'o jaji ma sira kaipakesi.

¹⁶ Nako naga 'o warisi ma surati, ge'ena salingou de ma 'ena mita ma nyo-nyata 'ato 'o nyawa gee yodi-diai 'o warisi ma surati ge'ena yosongenokau.

¹⁷ Sababu 'o warisi ma surati koipakewasi nako gee yodi-diai koyosongenuawasi. 'O surati ge'ena 'ipake duga ka gee 'o nyawa gu'una wosongenokau.

¹⁸ Sababu ge'ena 'o jaji ma di-disiraka mita salingou 'isitatapu de 'o haewani yatoa-toaka ma 'aunu.

¹⁹ Sababu gee 'o Musa wositotaroka 'o Israel ma nyawa yoodumika 'iso de ma Jo'oungu ma Dutuou 'awi besesongo, de 'o Musa wa'ese 'o sapi ma ngowaka ma 'aunu de 'o kabingi ma nauru ma 'aunu, de wosikaganu de 'o 'akere, ge'enaka de wosibilaroto ma Jo'oungu ma Dutu wi besesongo ma bukuoka de 'o Israel ma nyawaka yoodumu, wopake 'o hisop de 'o domba ma gogo gee 'isiluja-luja.

²⁰ 'O Musa gee wadiai ge'ena de kawongosekau, "Ne'ena 'o 'aunu gee 'isitatapu 'o jaji ma Jo'oungu ma Dutuno gee salingou niamoteke."

²¹ Ge'enaka de 'o Musa wosibilarotoli 'o 'aunu ge'ena 'o Woaka gee ma Jou wisuba-suba ma ngii de 'iodumu 'okia sonaa gee yosuba de yapake-pake.

²² Ma goungu moteke 'o besesongo gee 'o Musa wositota-totara, rekeni 'iodumu 'o sagala moi-moi 'isitebini de 'o 'aunu, de 'o so-sowono 'idadi 'isi'ikiri duga ka de 'o haewani yatoaka so ma 'aunu ya'uisi.

²³ 'Okia sonaa gee 'isino-nako 'o sagala moi-moi 'o sorogaaka, salingou 'isitebini ma ngekomo koge'ena. Ma 'o sagala moi-moi gee 'o sorogaaka ge'ena 'iparaluu 'o su-suba gee 'ifoloiosi yaowa.

²⁴ Sababu ma Kristus kowowosanguwa 'o Ngii 'Itebi-tebinika gee ka 'o nyawa ma giama ma jo-jobo, gee duga kaisino-nako 'o Ngii 'Itebi-tebini ma dutu. Ma Kristus wowosanga 'o sorogaaka, ge'enaka 'una ma 'orasi ne'ena wotaari ma Jo'oungu ma Dutuka sababu ngone.

²⁵ 'O Yahudioka manga 'Imam ma Amoko 'o taunu 'isinoi-noimi wowosanga 'o Ngii 'Itebini 'Ifo-foloika ma Jou 'awi Woaka, wo'asa 'o haewani moi ma 'aunu. Ma ma Kristus kowogi-giliowa wowosanga ma ngale wosisuba 'awi roese.

²⁶ Sababu nako koge'ena, ge'ena ma ngale 'una salingou wogi-gilio wosangisara kaikurue 'o dunia ne'ena 'isidadi. Ma ma nyo-nyata, ma 'orasi ne'ena 'o 'orasi ma do-dogumoka ne'ena, 'una woboa duga ka ma moi ma ngale wa'ikiri 'o so-sowono ma ngekomo wosisuba 'awi roese ma sirete.

²⁷ Ma Jo'oungu ma Dutu wositatapuokau 'o nyawa posongene duga ka ma moi, ge'enaka de ma Jo'oungu ma Dutu wonalega ma diai.

²⁸ Koge'enali mita ma Kristus womasisarakani wodadi 'o su-suba duga ka ma moi ma ngale wamoku 'o nyawa gudai manga so-sowono. 'Una 'asa woboali ma warasa ma modidi, ge'ena kowa'urusuawau ma ngale 'o so-sowono sababu watuusokau, ma wakisilaha 'o nyawa gee wida-damaau woboali.

Ibrani

Video Ibrani 9

Ikuti Kami:

KONTAK | PARTISIPASI | DONASI