Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pajanjian nan partamu mampunyoi paratuaran-paratuaran ibadaik, sarato mampunyoi pulo tampaik ibadaik buatan manusia.

² Sabuwah kemah ditagakkan, nan bagian sabalah ka mukonyo dinamokan Ruwang Suci. Disinan ado rengkak untuak dama palito, sarato ado pulo meja jo roti, nan dipasambahkan kapado Allah.

³ Di bagian dalamnyo, iyolah di balakang tabie nan kaduwo, ado ruwangan nan dinamokan Ruwang Mahasuci.

⁴ Di dalam ruwangan tu ado mezbah nan dibuwek dari ameh, untuak tampaik mambaka arun-arunan, sarato ado pulo Peti Pajanjian, nan kaciyek-annyo dilampihi jo ameh. Di dalam Peti tu ado balango ameh nan barisi manna, sarato jo tungkek Nabi Harun nan lah batuneh, sarato jo duwo lempeng batu tulih, nan di atehnyo tatulih sapuluah parentah dari Allah.

⁵ Di ateh Peti tu ado duwo Kerub, iyolah mukaluak nan basayok, nan malambangkan kahadiran Allah. Sayok dari kaduwo mukaluak tu takambang di ateh sawok Peti, iyolah tampaik pangampunan doso. Tapi kasadonyo tu indak dapek doh ditarangkan kiniko ciyek-ciyek.

⁶ Baitulah kasadonyo tu lah diatur. Tiyok-tiyok ari, imam-imam masuak ka dalam bagian nan ka muko kemah tu, untuak manjalankan tugehnyo.

⁷ Nan masuak ka bagian nan paliang dalam dari kemah tu, hanyolah imam basa sajo. Inyo mangarajokan itu hanyo sakali satawun. Itu dikarajokannyo jo sacaro mambawok darah, untuak ka dipasambahkan kapado Allah, dek karano dirinyo sandiri, sarato dek karano doso-doso, nan dipabuwek sacaro indak sadar dek umaiknyo.

⁸ Jo atuaran nan bakcando itu, Roh Allah manyatokan sacaro jaleh, baraso, salamo kemah nan bagian ka muko tu, tatagak juwo lai, mako jalan masuak ka dalam Ruwang Mahasuci tu alun ka tabukak.

⁹ Iko malambangkan jaman nan kiniko; ba arati, baraso sagalo pasambahan, sarato jo karoban-karoban taranak nan dipasambahkan kapado Allah, indak dapek doh manyamparonokan, ati ketek urang nan mambawok pasambahan tu.

¹⁰ Dek karano, caro-caro ibadaik tu hanyo ba ubuangan jo makanan, minunan, sarato jo babagai-bagai caro panyucian. Kasadonyo tu hanyo paratuaran-paratuaran layie, nan hanyo balaku sampai tibo masonyo Allah ma-adokan pambaruan.

¹¹ Tapi, Isa Almasih lah datang sabagai Imam Basa, dari parkaro-parkaro nan baiak nan lah ado. Kemah Tuhan, dimano Baliau mangarajokan tugeh-Nyo sabagai Imam Basa, adolah kemah nan labiah mulie, sarato labiah samparono. Itu indak dibuwek dek manusia doh; aratinyo, bukan barasa dari dunia nan dijadikan ko.

¹² Isa Almasih mamasuak-i Ruwang Mahasuci di dalam kemah tu, hanyo sakali sajo, untuak salamo-lamonyo. Dikutiko itu, Baliau indak mambawok darah kambiang jantan, atau darah anak bantiang, untuak ka dipasambahkan; tapi Baliau mambawok darah Baliau sandiri, jo sacaro nan baitu, Baliau mamardekakan kito untuak salamo-lamonyo.

¹³ Darah kambiang, sarato jo darah jawi jantan, sarato abu dari karoban anak bantiang, dipakai untuak mangalatiak-i urang-urang nan najih manuruik paratuaran agamo, supayo inyo manjadi barasiah dari najih.

¹⁴ Nah, darah sarato jo abu tu, dapek mambarasiahkan najih urang-urang tu, apo lai darah Isa Almasih! Malalui Roh nan kaka, Isa Almasih mampasambahkan diri-Nyo sandiri kapado Allah, sabagai karoban nan samparono. Darah-Nyo mambarasiahkan ati nurani kito, dari caro ibadaik agamo nan indak baguno, supayo kito dapek malayani Allah nan iduik.

¹⁵ Itulah sababnyo, Isa Almasih manjadi Parantaro untuak suatu pajanjian nan baru, supayo urang nan lah dipanggie dek Allah, dapek manarimo barakaik-barakaik nan kaka, nan lah dijanjikan dek Allah. Kasadonyo tu dapek tajadi, dek karano lah ado nan mati, iyolah Isa Almasih; nan kamatian-Nyo tu mamardekakan urang, dari sagalo kasalahan nan dipabuwek dek urang, pado maso pajanjian nan partamu sadang balaku.

¹⁶ Jikok ado surek warisan, musti ado pulo buktinyo, baraso urang nan mambuwek surek tu lah maningga.

¹⁷ Dek karano, surek warisan tu indak ka balaku, salamo urang nan mambuwek surek tu, iduik juwo lai. Surek tu hanyo balaku sasudah urang tu mati.

¹⁸ Dek karano itu, pajanjian nan partamu tu pun, musti disahkan jo darah.

¹⁹ Mulo-mulo, Nabi Musa manyampaikan kasadonyo parentah paratuaran Allah, kabake banso Israel. Sasudah tu, Nabi Musa ma ambiak darah anak bantiang, sarato jo darah kambiang jantan, sudah tu dicampuakannyo jo ayie, kudian dikalatiakkannyo ka Kitab Paratuaran-paratuaran dari Allah, sarato kabake sadonyo banso Israel, jo rumpuik hisop, sarato jo bulu domba nan sirah tuwo.

²⁰ Sambia mangarajokan nan bakcando itu, Nabi Musa bakato, "Ikolah darah nan mansahkan pajanjian dari Allah, nan musti angku-angku patuahi."

²¹ Kudian, jo caro nan saroman itu pulo, Nabi Musa mangalatiakkan darah tu pulo, ka Kemah Tuhan, sarato kabake sadonyo alaik-paragaik untuak ba ibadaik.

²² Batua, manuruik paratuaran agamo Yahudi, ampia kasadonyo sagalo sasuatu disucikan jo darah; doso hanyo bisa di ampuni jikok ado darah nan taserak.

²³ Jo caro nan bakcando itulah, barang-barang nan malambangkan parkaro-parkaro nan di sarugo, paralu disucikan. Tapi, untuak parkaro-parkaro nan di sarugo tu sandiri, diparalukan karoban nan jauah labiah baiak.

²⁴ Dek karano, Isa Almasih indak masuak ka Ruwang Suci nan dibuwek dek manusia doh, nan hanyo malambangkan Ruwang Suci nan sabananyo. Isa Almasih masuak ka sarugo nan sabananyo; kiniko Baliau disinan mangadap Allah untuak kapantiangan kito.

²⁵ Imam basa urang Yahudi, tiyok-tiyok tawun masuak ka Ruwang Mahasuci, di dalam Rumah Tuhan, sambia mambawok darah sikua taranak. Tapi, Isa Almasih indak tiyok sabanta doh masuak, untuak mampasambahkan diri-Nyo.

²⁶ Dek karano, jikok jo caro nan baitu, itu ba arati Baliau lah batukeh-tukeh manangguang sansaro, sajak dunia ko dijadikan. Tapi nyatonyo, kiniko dijaman akie ko, Baliau datang sakali sajo untuak ma apuih doso, jo sacaro mangarobankan diri-Nyo sandiri.

²⁷ Allah lah manatapkan, baraso manusia mati hanyo sakali sajo, sasudah tu di adieli dek Allah.

²⁸ Baitu pulo Isa Almasih, hanyo sakali sajo dipasambahkan sabagai karoban, untuak ma apuih doso banyak urang. Baliau ka datang baliak di nan kaduwo kalinyo, bukan untuak manyalasaikan masalah doso lai, tapi untuak manyalamaikkan urang-urang nan manantikan kadatangan-Nyo.

Ibrani

Video Ibrani 9

Ikuti Kami:

KONTAK | PARTISIPASI | DONASI