Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Perjanjian saq penembẽq bedowẽ aturan-aturan ibadah, dait ẽndah bedowẽ taoq ibadah saq tepiaq siq manusie.

² Sopoq kẽmah tepiaq saq bagian julune tesebut Ruang Suci. Lẽq derike araq tetoloq tangkaq dilah dait araq ẽndah mẽje kance ruti saq teaturang tipaq Allah.

³ Lẽq bagian dalemne, lẽq bagian mudi kelambu saq kedue, araq ruangan saq tesebut Ruang Mahesuci.

⁴ Lẽq dalem ruangan nike araq mẽje taoq kurban saq tepiaq lẽman emas jari tunuq dupe, dait araq ẽndah Peti Perjanjian saq selapuqne telapis siq emas. Lẽq dalem peti nike araq guci emas saq berisi manna, tunjangne Harun saq sampun besuli, dait due lẽmpẽngan batu tulis saq lẽq atasne tetulis sepulu prẽntah lẽman Allah.

⁵ Lẽq atas Peti nike araq due Kerub kemuliean saq ngudung taoq pendamẽan. Laguq mangkin selapuqne nike ndẽqne bau tejelasang sopoq-sopoq.

⁶ Maraq nike selapuqne teatur. Sebilang jelo imam-imam tame ojok dalem bagian julu kẽmah nike jari ngelaksaneang ibadah ie pade.

⁷ Saq tame ojok bagian paling dalem lẽman kẽmah nike cume imam agung doang. Ie ngelaksaneang hal nike cume sekali setaun. Ie ngelaksaneang nike jauq daraq jari teaturang tipaq Allah lantaran diriqne mẽsaq dait lantaran dose-dose saq ndẽq sediah tepiaq siq umat-Ne.

⁸ Siq care nike, Roh Allah nyatayang secare jelas, bahwe sengonẽq kẽmah lẽq bagian julu nike masih araq, langan tame ojok dalem Ruang Mahesuci nike ndẽqman tebukaq.

⁹ Niki jari lambang jaman saq mangkin; artine bahwe persembahan-persembahan dait kurban-kurban binatang saq teaturang tipaq Allah, ndẽqne bau nyempurneang atẽ nurani dengan saq jauq persembahan.

¹⁰ Sẽngaq upacare-upacare nike cume berubungan kance keloran, ineman, dait macem-macem upacare penyucian. Selapuqne cume aturan-aturan lahiriah saq berlaku cume jangke selapuq hal tejariang baru.

¹¹ Laguq Almasih sampun rauh jari Imam Agung bagi hal-hal saq solah saq gen dateng, sẽngaq Ie sampun tame ojok dalem kẽmah saq belẽqan dait lebih sempurne, saq ndẽq tepiaq siq ime manusie, artine ndẽq berasal lẽman dunie saq tecipteang niki.

¹² Almasih tame lẽq Ruang Mahesuci lẽq dalem kẽmah nike cume sekali doang jari selaẽq-laẽqne. Lẽq waktu nike Ie nẽnten gadingang daraq bẽmbẽq mame atao daraq anak sampi jari teaturang; Ie gadingang daraqne mẽsaq, dait siq care nike Ie bẽbasang ite selaẽq-laẽqne.

¹³ Daraq lẽman bẽmbẽq dait sampi mame dait awu-awu lẽman kurban anak sampi, tekadu jari ketis dengan-dengan saq najis adẽq ie pade jari bersi secare lahiriah.

¹⁴ Jari, lamun daraq dait awu-awu nike bau persiq kenajisan dengan-dengan nike, lebih-lebih daraq Almasih! Siq Roh saq kekel, Almasih ngaturang diriq-Ne mẽsaq tipaq Allah jari kurban saq sempurne. Daraq-Ne persiq atẽ nuraninte lẽman perbuatan saq ndẽq araq manpaatne, adẽq ite bau beribadah tipaq Allah saq idup.

¹⁵ Keranaq nike Almasih jari Perantare sopoq perjanjian saq baru, adẽq dengan saq sampun temanikang siq Allah bau nerimaq berkah-berkah saq kekel saq sampun tejanjiqang siq Allah, lantaran ninggal-Ne nike sampun nebus pelanggaran-pelanggaran saq tepiaq lẽq perjanjian saq penembẽq.

¹⁶ Lamun araq surat warisan, harus ẽndah araq buktine bahwe dengan saq miaq surat nike sampun ninggal.

¹⁷ Sẽngaq surat warisan ndẽqne berlaku lamun dengan saq miaq surat nike masih idup. Surat nike berlaku cume sesampun dengan nike ninggal.

¹⁸ Keranaq nike perjanjian saq penembẽq ẽndah harus tesahang siq daraq.

¹⁹ Lẽq penembẽqne Musa nyampẽang selapuq prẽntah saq tetulis lẽq Hukum Taurat tipaq bangse Israel. Sesampun nike Musa bait daraq anak sampi dait daraq bẽmbẽq mame, terus campurne kance aiq, beterus teketisang lẽq Kitab Hukum Taurat nike dait lẽq selapuq bangse Israel kadu hisop dait bulu dombe bewarne bẽaq toaq.

²⁰ Sambil ngelaksaneang hal nike Musa bebase, "Niki daraq saq ngesahang perjanjian lẽman Allah saq harus side pade taatin."

²¹ Beterus siq care saq pade, Musa ẽndah ketis daraq nike lẽq kẽmah ibadah dait lẽq selapuq pekakas saq tekadu ibadah.

²² Mule menurut Hukum Taurat, jangke-jangke selapuq hal tesuciang siq daraq; dait dose cume bau teampunin lamun araq penumpahan daraq.

²³ Siq care nike barang-barang saq jari lambang hal-hal saq lẽq sorge perlu tesuciang. Laguq lẽq hal-hal saq lẽq sorge nike teperluang kurban saq jaoq solahan malik.

²⁴ Sẽngaq Almasih nẽnten tame ojok Ruang Suci saq tepiaq siq manusie, saq cume jari lambang lẽman saq setetune. Almasih mẽsaq tame ojok sorge; mangkin lẽq derike Ie ngadep Allah jari kepentingan ite.

²⁵ Imam Agung sebilang taun tame ojok Ruang Mahesuci jauq daraq sopoq binatang. Laguq Almasih nẽnten ngulang-ulang tame jari ngaturang diriq-Ne.

²⁶ Sẽngaq lamun maraq nike, artine Ie sampun beulang-ulang menderite mulai lẽman dunie niki tecipteang. Laguq nyatene, mangkin lẽq jaman penutuq niki, Ie rauh cume sekali doang jari ngapus dose siq ngurbanang diriq-Ne mẽsaq.

²⁷ Pade maraq manusie sampun tetetepang jari ninggal cume sekali dait sesampun nike teadilin siq Allah.

²⁸ Maraq nike ẽndah Almasih, cume sekali doang teaturang jari kurban saq ngapus dose luwẽq dengan. Sesampun nike Ie gen rauh malik saq kedue kaline, ndẽqne jari nyelesẽang persoalan dose, laguq jari ngicanin keselametan tipaq dengan-dengan saq ngantos kerauhan-Ne.

Ibrani

Video Ibrani 9

Ikuti Kami:

KONTAK | PARTISIPASI | DONASI