Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pẹ̌dariandi humotonge tangu piạbe lai manga atorangu pal᷊ahamawu, dingangu piạbe lai wal᷊eng pal᷊ahamawuang kụ nikoạ u taumata e.
2 Selo sěmbaụ nirarisị kụ su wahageang těngone e isẹ̌sěbạ Huang Susi. Sene tangu piạ dal᷊aedu sol᷊o kạpapěllọ, dingangu piạ l᷊ai meda ringangu borotẹ̌ sasěmba su Mawu Ruata.
3 Su wahageang dal᷊unge, su sěmběkang dal᷊anse karuane, piạ huange isẹ̌sěbạ Huang Kasusiange.
4 Su ral᷊ungu huang e ene tangu piạ pananěmbaěng bọu wul᷊aeng baugu pěnanawungang buwụ, ringangu piạ l᷊ai Peting Pẹ̌dariandi natukusu papikunge wul᷊aeng. Su ral᷊ungu Peti ene piạ kuring bul᷊aeng kạpapěllọ lohong manna, těking i Harun kụ seng nẹ̌tumbal᷊ẹ̌, dingangu pěpal᷊ẹ̌ batu rarua piněmohekangu titang Mawu mapul᷊o.
5 Su wowong Peti ene kai piạ Kerub darua, kụ kai riadikang piạ papanide kụ mělẹ̌lahẹu rarěntang Mawu Ruata e. Papanidu riadikang darua ene nawingkahẹ̌ su wowon tatakạ Peti e, tampạ u kal᷊aampungu rosa e. Kaiso kěbị ini e tawe ikapahumbisara orasẹ̌ ini pakaunsui.
6 Kai kerene nạung kěbị seng niatorẹ̌ e. Ěllo-ěllo manga imang mạhunsuẹ̌ su ral᷊ungu selo watuhu těngone mědeạu makapẹ̌karadiahangu munarang sire.
7 Apang sụsuẹ̌ su wahageang karal᷊ungange wọu selo e sěmatang imang mawantugẹ̌ e. Kụ tumbạeng lai sěnsul᷊e su ral᷊ungu sěntaung mẹ̌koạ kerene. Kụ mang harusẹ̌ piạ daha kạbawawa mědeạu isěmba su Mawu Ruata e baugu watangenge ringangu waugu pẹ̌sasal᷊an sěngkawanuang e nikoạ i sire ual᷊ingu tawe nakahěngang.
8 Dingangu atorange kerene, Rohkẹ̌ u Ruata e něnodẹ pinakal᷊ahẹ, u karěngụeweng selo watuh'u těngo'e wědang dụdarisị, ute raral᷊engang sol᷊ong dalung'u Huang Kasusiang'E ene wědawen tawe niwẹbuka.
9 Ini e kai sasihing su kakakoạ u tempo ini; mangal᷊ene apạeweng laonggọ dingangu manga sasěmba nipotọ pinaněmba Mawu Ruata e, tawe makakasukụ dal᷊ungu naungu taumata apang měmpẹ̌bẹ̌bawa sasěmba e.
10 Batụu kal᷊awọu tundu tamai ene kětạengbeng mětẹ̌tal᷊ahinong kakaěng, inumang dingangu kal᷊awọu haghing tundung pananusi. Kěbị-kěbị e samatang manga atorangu tụtuhụ gẹ̌si pakịsěmpike sarang tempone Mawu Ruata e managhupia katatal᷊ěmbuhu.
11 Arawe i Kristus e seng diměnta kere rarěntang Imang Mawantugẹ̌ e waugu haghing munara mapapia kụ semben těbe ene. Selong Mawu kụ piạ i Sie mẹ̌kẹ̌koạ munarang sěngkatau Imang Mawantugẹ̌ e ute kai selo limembong kawantuge ringangu limembong kasukụ e. Ene wal᷊inewe nikoạ u taumata; mangal᷊ene asal᷊e wal᷊inewe wọu dunia nịkakoạ ini e.
12 I Kristus simuẹ̌ su Huang Kasusiange su ral᷊ungu selo kětạeng sěnsul᷊e sarang karěngụe. Su tempo ene i Sie tawe nẹ̌bawa rahang kambing esẹ e arau rahang pěgol᷊u sapi waugu sasěmba. I Sie kawe nẹ̌bawa rahan'E sẹ̌sane, kụ ual᷊ingu ene i Sie tangu něliwir'i kitẹ e sarang marěngụ-děngụ.
13 Dahang kambing dingangu rahang sapi esẹ dingangu ahing sasěmba wọu pẹ̌gol᷊u sapi, nipěnambusẹ̌ taumata apạeweng dal᷊akị tuhụ atorangu agama e tadeạu i sire ene mawurěsi.
14 Kụ kamagengu raha ringangu ahi ene makauhasẹ̌ karal᷊akị i sire tuhụ dal᷊engu agama, dumakeleng kate rahang Kristus! Kụ ual᷊ingu kawe Rohkẹ̌ kakalẹ̌ e tangu, i Kristus e něnarakangu watangeng'E su Mawu Ruata nakoạ kere sěmbaụ sasěmba kụ nasukụ. Dahane nanguhasẹ̌ dal᷊ungu naung i kitẹ e wọu tundung agama tawẹ kěhase, tadeạu i kitẹ makapẹ̌tangkiangbe Mawu Ruata kụ biahẹ̌ e.
15 Kai ual᷊ingu ene, i Kristus nakoạ Mananẹ̌pase waug'u sěmbaụ pẹ̌dariandi wuhu, tadeạu isain sem bọu nikuiang u Ruata e wotonge makatarimạ kal᷊awọu al᷊amatẹ̌ kakalẹ̌ kụ seng nikědon Duata e. Patikụ ene wotonge mariadi ual᷊ingu kai seng piạ u nairị, kụ kai i Kristus; kụ kapapohonge kawe nakal᷊iwirẹ̌ taumata wọu kal᷊awọu pẹ̌sasal᷊a nikoạ i sire su tempong pẹ̌dariandi humotonge wědang kạdal᷊enge.
16 Kereu piạ suratu pananilakehu pusakạ, ute harusẹ̌be lai piạ tatialane u taumata kụ nẹ̌koạ suratẹ̌ ene kawe seng nairị.
17 Batụu surat'u pusakạ e tawe ikawal᷊i těntal᷊ang i sain nẹ̌koạ suratẹ̌ ene wědang biahẹ̌. Suratẹ̌ ene ikawal᷊i kětạeng kereu tau ene e seng nate.
18 Ual᷊ingu ene pẹ̌dariandi humotonge mal᷊aing hinong sěgadengu raha.
19 Kahumotong-motongange i Musa e něhabaru kěbị titang Mawu Ruata su tau Israel. Bọu ene i Musa něngal᷊ạ e raham manga anạ u sapi ringangu rahang kambing esẹ, bọu ene nilaukangu akẹ, mase nịtatambuse su Bukẹ̌ u manga Titang Mawu Ruata ringangu su kěbị apan tau Israel kụ nipahị e ringangu rěmpugu hisop dingangu manga rukụ u domba kụ awạe mahamụ mahunggurang.
20 Apidu kạkoạ e ene i Musa kapẹ̌berane, "Ini e kai rahan sasěgadẹ̌ pẹ̌kakakědon Mawu Ruata e kụ hinong tuhukang i kamene."
21 Kụ dingangkewelaing kakakoạ e mẹ̌sul᷊ung, i Musa e něnambusu raha ene lai su Selon Mawu ringangu su patikụ kakoatengu pal᷊ahamawu e.
22 Kahěngang bue, tuhụewe toratu agamang Yahudi e, seng masarạ patikụ sabarange ipakasusi ual᷊ingu raha e; mase rosa e kawe tumbạu ikaampung kereu piạ tatědọ u raha e.
23 Dingangu kakoạ kerene e manga sabarang kụ mělẹ̌lahẹu apang su sorga e ipakasusi. Arawe waugu apang su sorga e hala gẹ̌gausang gaghěllị kụ limembong kapiane.
24 Batụu i Kristus e kawe tawe simuẹ̌ su Huang Kasusiange kinoạ u taumata, kụ samatang měnẹ̌nul᷊adang Huang Susi tutune. I Kristus hala e simuẹ̌ su sorga; kụ sene, i Sie orasẹ̌ ini e timatěngom Mawu Ruata e waugu i kitẹ e.
25 Imang u Yahudi mawantugẹ̌ e taun-taung sụsuẹ̌ su ral᷊ungu Huang Kasusiange su ral᷊ungu Wal᷊em Mawu měbẹ̌bawa rahang binatang haghine sěmbaụ. Arawe i Kristus tangu wal᷊inewe lai simuẹ̌ mědeạu masau maněmbam batangeng'E.
26 Batụu angkeěng kai nạung masau i Sie hinong nẹ̌tatahangu sunsara dokeng su tětạu karariading dunia ini. Kutẹu nạung orasẹ̌ ini e i Sie kětạbeng sěnsul᷊e riměnta baugu měndẹ̌dasẹ̌ dosa e ringangu měnarakangu watangeng'E hala.
27 Mawu Ruata seng nanilakehẹ̌ u taumata e tumbạeng sěnsul᷊e mate kụ bọu ene ute ihukungu Mawu Ruata e.
28 Kerene lai i Kristus e kětạeng sěnsul᷊e nisarakang makoạ kere ipěněbusẹ̌ dosan taumata l᷊awọ. I Sie sarung duměnta kapia su karuan sul᷊ene, bal᷊inewe waugu měnal᷊udẹ̌ dosa, kaiso kawe waugu mapakasal᷊amat'u taumata apang mạngampal᷊ẹ̌ darěntan'E.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA