Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba gamabu'ula li si fõfõna andrõ tefa'anõ goigoi ba wasumangeta, ba so gõi nahia wasumangeta nifazõkhi danga niha.
2 Sambua nose nifasindro, ba tanõ fõnania tefotõi Naha Ni'amoni'õ. Ba da'õ so naha wandru, ba so gõi meza awõ roti nibe'e sumange khõ Lowalangi.
3 Ba tanõ bakhania ya'ia zi so furi mba'aba'a si dua andrõ so mbate'e nifotõi Naha Fondrege Ni'amoni'õ.
4 Bakha ba mbate'e da'õ so nahia nifazõkhi moroi ba gana'a, naha wanunu kumõyõ, ba so gõi Dawõla Gamabu'ula Li andrõ nifo'uli ana'a ma'afefu. Bakha ba Dawõla andrõ so mako ana'a so'õsi mana ba si'o Ga'aroni si no molewiõ, ba dua gõrõ gara wanura yaw̃ania no musura zi fulu goroisa soroi Lowalangi.
5 Ba yaw̃a Dawõla andrõ so dombua Kerubi, saliw̃aliw̃a ba danõ, urifõ so'afi samadumaisi fe'aso Lowalangi. Afi moroi ba zaliw̃aliw̃a ba danõ andrõ no mubologõ yaw̃a lagõ wangatulõ, nahia wangefa'õ horõ. Ba fefu da'õ lõ tola muzarazara wamotokhi iada'e.
6 Si manõ wamõfõ'õ fefu. Ero'ero ma'õkhõ mõi bakha ndra ere tanõ fõna nose andrõ ba wamalua halõw̃õra.
7 Si mõi bakha ba nahia wondrege tanõ bakha nose andrõ, ha ere sebua. Ifalua da'õ ha sakali dõfi. Ba wamalua da'õ lõ tola lõ i'ohe ndro, nibe'e sumange khõ Lowalangi, soguna khõnia samõsa, ba soguna ba horõ nifalua mbanua-Nia bõrõ wa lõ la'ila wetahõgõ.
8 Faoma amakhoita si manõ, Ifahaõ ita Eheha Lowalangi irege oroma, wa sagõtõ sumindro nose tanõ fõna andrõ, lala we'amõi bakha ba Naha Fondrege Ni'amoni'õ lõ na sa mubokai.
9 Da'e zamadumaisi inõtõ iada'e; eluahania, wa fasõmbata ba sumange nitaba nibe'e sumange khõ Lowalangi, lõ tobali famo'ahonoa dõdõ niha same'e sumange.
10 Bõrõ me amakhoita niha zi manõ, ba so amakhaita ba gõ, nibadu, ba oya ngawalõ gamakhoita niha ba wangamoni'õ. Ma'afefu da'õ ha amakhoita soroma ba hõrõ, ba ha irugi ginõtõ wamohouni ni'a'asogõ Lowalangi.
11 Ba no so Keriso tobali Ere Sebua moroi ba ngawalõ zi sõkhi si no so. Ose Zo'aya naha-Nia ba wombambaya halõw̃õ-Nia si mane Ere Sebua, no ose sabõlõ molakhõmi ba so'ahonoa. Tenga nifazõkhi danga niha da'õ; eluahania, tenga si otarai gulidanõ andre.
12 No mõi Keriso ba Naha Wondrege Ni'amoni'õ bakha ba nose andrõ ha samuza ba zi sagõtõ fa'ara. Me inõtõ da'õ lõ i'ohe ndro nambi si matua ba ma do nono zaw̃i nibe'e sumange; no do-Nia samõsa ni'ohe-Nia ba wangefa'õ ya'ita sagõtõ fa'ara.
13 Do nambi si matua ba do zaw̃i si matua awõ nawu nono zaw̃i nibe'e sumange, te'oguna'õ ba wangefa'õ niha si no ra'iõ molo'õ amakhoita agama, ena'õ niha da'õ tobali sõkhi.
14 Ba mendrua manõ ndro Keriso andrõ! Eheha si lõ aetu andrõ zama'ema, no Ibe'e fasõmbata mboto-Nia samõsa khõ Lowalangi si tobali sumange so'ahonoa. Do-Nia zangehaogõ tõdõda ba gamuata si lõ boto, ena'õ tola mangandrõ ita khõ Lowalangi sauri.
15 Da'õ mbõrõ, wa ba khõ Keriso Ifazõkhi Lowalangi sambua wawu'usa li si bohou, ena'õ niha si no Ikaoni Lowalangi tola manema howuhowu si lõ tebulõ si no Ifabu'u. Fefu da'õ tola alua bõrõ me no so zi mate, ya'ia Keriso; ba fa'amate-Nia andrõ i'efa'õ niha moroi ba ngawalõ zala si no lafalua, me ba ginõtõ gamabu'ula li si fõfõna andrõ moguna nasa.
16 Na so zura harato ondrõita, lõ tola lõ gõi so dandra wa niha samazõkhi sura ondrõita andrõ no mate.
17 Bõrõ me sura harato ondrõita andrõ lõ moguna fatua auri nasa niha samasõkhi ya'ia. Sura andrõ awena moguna ha na no mate niha andrõ.
18 Da'õ mbõrõ wa fawu'usa li si fõfõna andrõ lõ tola lõ tefaduhu'õ faoma do.
19 Ba si ofõna, ifa'ema Moze fefu ngawalõ gamakhoita soroi Lowalangi ba soi Gizera'eli. Aefa da'õ ihalõ Moze ndro nono zaw̃i ba do nambi si matua, awena ifaruka faoma idanõ, aefa da'õ itefe ba Mbuku Huku soroi Lowalangi ba ba soi Gizera'eli ma'afefu, ifake ndru'u zinizini ba bu mbiribiri soyo.
20 Fao ba wolau da'õ iw̃a'õ Moze: "Do andre zangaro'õ fawu'usa li soroi Lowalangi si lõ tola lõ mi'o'õ."
21 Aefa da'õ itefe Moze ndro andrõ gõi ba Nose Zo'aya ba fefu gamagama nifake ba wame'e sumange khõ Lowalangi.
22 Duhu molo'õ huku agama Yahudi, arakhagõ fefu hadia ia ba ni'amoni'õ faoma do. Tobali, horõ awena tola mu'efa'õ na so wanuwagõ do.
23 Ba wamalua si manõ, ba fefu gamagama famaedo ngawalõ zi so ba zorugo, moguna mu'amoni'õ. Ba ngawalõ zi so ba zorugo andrõ moguna zumange sabõlõ sõkhi moroi ba wamaedo.
24 Bõrõ me Naha Ni'amoni'õ si mõi bakha Keriso, tenga Naha Ni'amoni'õ nifazõkhi danga niha. Naha Ni'amoni'õ nifazõkhi danga niha andrõ ha famaedo Naha Ni'amoni'õ sindruhu. Si mõi bakha Keriso ba no sorugo; ba da'õ so Ia iada'e gametahõ Lowalangi, soguna khõda.
25 Ere Sebua ba niha Yahudi, ero rõfi mõi ba Naha Wondrege Ni'amoni'õ bakha ba Nomo Zo'aya fao wa i'ohe ndro sageu gurifõ. Ba Keriso, lõ auli kali mõi ba wame'e sumange Ya'ia.
26 Na Ilau zi manõ, ba eluahania no i'otarai mbõrõta wombõi ulidanõ andre, no auli kali Itaõgõ wamakao. Ba soromania, iada'e ba ginõtõ safuria andre, no so Ia ha sakali ba wameta horõ ba ba wame'e sumange Ya'ia.
27 No Ihonogõi Lowalangi wa ha sakali mate niha, ba na no aefa da'õ ba fanguhuku khõ Lowalangi.
28 Si manõ gõi Keriso, ha sakali mube'e sumange ba wangefa'õ horõ. Ba so Ia dania si mendrua kali, tenga ba wolu'i horõ, no ba wangorifi niha sombalombaloi fa'atohare-Nia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA