Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dan indagunerij, dara dan indamouwerij se Krisdus, sug Allah ouci yen debinim naugb enin, hanoba en eija yen naugb yen yaimo maireseb menau se bogo dag gin touohob, kaba, yen meigdoc emougwo Yesus gin touwero. Doba yen yehigdecin en an men geicara augwan deigeigouhw terimda. Anai Allah esa en aud maman, dauntoba en edag Gembala Gesa Taij Moho Agas naugb en ousa maman se areg maman mamdoc ebdebin an ginohob augwan toua namcir.
2 Sug Allah eigdoumesa en moho naugb ginohob, kaba, en emarges dau gin touwero. Doba en aimo areg Allah arougb en an gini dara en medoc hom toua terimda. Aninim dag sug nosa, kaba, Musa emarges dau areg Allah arougb en an touwero. Doba en esedougwo Allah men tu dag leng Israel. Dara en agauwesa len laugwan dara en medoc hom an len touohob.
3 Doba men geicara augwan dou leng Israel gin, kaba, edag Allah men sogougb dous. Hanoba en ouma debin areg Allah esedeb naugb sug en ens dou lusud se lona daiyamo gacin ogdoc en Meisi gini augwan deb dou len deb sungga touohob. Doba Krisdus, kaba, en esedougwo Allah men tu gini dag mougt mera medam, anai en, kaba, en edag Allah Meisi misen namcirohob. Hang en emarges dau gin touwero, doba en esedougwo Allah men tu gini dara en medoc hom an toua. Dara maman, kaba, maman madag Allah men tu gin touohob. Doba esloulougb naugb maman mamobsara dau sug maman maod mamina debsa Allah an areg en os dou maman gin touwero. Doba maman maic mamus naugb maman mas agadgeij se gin terimda. Anai sug maman mamdoc emebdebin an Allah gin deitero, kaba, maman mamedag en men tu gin deit touwero. Doba maman maobsara dau en namcirohob. Dangga hang, sug Krisdus en edag mougt mera medam naugb Allah men tu dag ginohob, kaba, eigouhw naugb maman maigdoumesa Yesus en moho agas medam edreg dau Musa en moho. Aninim dag lusud leigdoumesa sud hom gohud tu, en moho edreg dau tu gen ohud ingga toua terimda. Anai astesda tu, kaba, lemohud leninero. Doba sud hom ohud toua. Dara gareg en ahasesei dara esinsin augwanohob, kaba, Allah enin dous.
4 (3:3)
5 (3:3)
6 (3:3)
7 Dangga hang, sug maman madag Allah en men tu dag ginohob, kaba, maman mameic mamus dou Allah sug en enara dou maman touwero. Doba maman mamus obsara naugb maman maimo en mer se aremer augwan toua terimda. Anai gini esogwa deisa areg Allah esulou maman deb se Surad Injil Meb Mohon ogdoc Mena Gogoufu sug nosa touohob, endagai:
8 Se lona sug dan denara dou yen, kaba, yen meigdoc emaihagab dan indir, aninim dag yen meijemouwer sug nosa touwero. Doba yen yei meijums naugb yen yaimo areg dan darougb yen an gin toua terimda.
9 Anai se arisogomoc sud hwai, kaba, dan dens dau gansins dara ganusbus einyana dou len naugb len leiya touohob. Doba sug len lec se lomougwisa, kaba, len loududa dan naugb len leicara lainyen dan ucucugb terimda. Anai len louwan leiya dag indan goubesa edeinyum naugb lenei? Dara dan deic gogom do len naugb meren geicara gecgu touei? Era naroei? Hanoba len lemaimo dan indir touwero, doba len leic merus dou dan toua terimda.
10 Hang dan indoc esrougb medam an len toua terimda, kaba, dan dogod an dou len toua dag len lemeigtou debin len merug desij dan se indan uro mes touwero. Doba len leigtou dig medigo terimda dous. Hanoba dan dou dan indoho debin areg dan dogod an gin dou len toua. Anai dan denara se dan indoc mes endag len lemaimo indan ucina gin terimdero. Doba len merdoc oungmogo naugb len laijahasero dau dan namcirohob.
11 (3:10)
12 Dangga hang, dan indagunerij, dara dan indamouwerij, sug Allah enara dag graga dou maman mamjemouwer sug nosohob, kaba, esloulougb medam naugb yen yemaimo areg gecgu dara yen meigdoc emaihagab areg Allah arougb yen an gin touwero. Doba yen yebehnehino yenin meigdoc mes dougwo augwan gin namcir. Dauntoba yen yemeineg dara yen yemasid yenin dau Allah Geis Huhugb gin touwero, doba yen meigdoc ebdebin an en terimda. Anai sug yen yeicara gecgu dara yen yaihagab en mer dag gin namcir, kaba, eic dag yen yemaimo en toua deitero. Doba eic dag yen yobsara dau en toua terimda.
13 Hang yen yemehig dau sug yen yenara yad yen meigdoc mes doum touwero. Doba sug areg lusud leija dag lona mohw hom geb naugb maman ginaba, kaba, yen yesuloum ucucugb terimda. Dauntoba sesar emaugwohosa yen, hanoba eic yen meigdoc oungmerema dougwo Allah en mer gin touwero. Doba yen meigdoc ebdebin an en namcir.
14 Anai sug maman mamdoc emebdebin an en toua deitero, kaba, en moho emaiga maman touwero. Doba sug maman mamdoc ebdebin an en sug aimougtutohob, hanoba maman mamarges dau ginero. Doba maman maicara maimo dag gini terimda edebeij Lona Sug Ouwedoc gin toua, kaba, maman madag hom dara en toua namcir. Naro, kab, naro.
15 Dangga hang, yen yemaiyan meigdocesem naugb yen yeic meijus dou Allah touwero. Doba sug yen youman en mer se lona mohw hom gin, kaba, yen yowun yenin meigdoc mes arjaga naugb yen yaimo en mer an areg en arougb yen an toua terimda. Augwan gini esogwa deisa areg sud hom, moho Daud, en erba Ugwaremer an deb se Surad Injil Meb Mohon deb sug nosa touohob, endagai: Sug yen youman Allah en mer se lona mohw hom gin, kaba, yen meigdoc emagadgeij dougwo en mer gini aninim dag maman mamjemouwer sug nosa touwero. Doba yen yei meijums naugb yen yaimo en mer gini terimda.
16 Anai gara leng lohoiya Allah mer sug nosa gina? Len gusei? Naro. Doba maman mamjemouwer gareg Musa einoisa len dau cinogo Mesir ginohob, kaba, len eng lohoiya en mer gin dous.
17 Dara gareg len leic Allah medoc esrougb an len se arisogomoc sud hwai gina? Len gusei? Naro. Doba en medoc esrougb an maman mamjemouwer, anai len lebesesar an en terimda. Hang len laugwan lemomom deb se lomougwisa deb touohob.
18 Dara gareg Allah ouwara dougwo len dag len lemeigtou debin len merug se men uro mesero gin toua? Len gusei? Naro. Doba en ouwara dougwo maman mamjemouwer hom gin dous. Anai len lemaimo en mer touwero, doba len leic merus dou en terimda.
19 Dangga hang, maman macinaga dag len lemeinesa se Allah men uro mesero. Anai len merdoc emebdebin an areg Allah enara dou lenero. Doba len lesbesan areg en os dou len gin namcir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA