Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kinanak-kinanakku luk meligan, luk pad-pad ngalap babpat bang tawar luk rat surga, do' muyuh ngerawé Rasul idi Imam Rayeh luk pangeh imo tau, ieh ineh Yésus.
2 Ieh lutep kuan Luk nenawar Neneh, mepad kudeng Musa pana' lutep bang kekamen kuan uang ruma' Allah ineh.
3 Lemulun luk mudut ruma' uen ngerayeh meluun ratnan ruma' ineh. Kudeng ineh teh Yésus mayu uen ngerayeh meluun ratnan Musa.
4 Anid-anid ruma' ineh piduten lemulun; iamo' luk mudut luk amung-amung, Ieh ineh Allah.
5 Idi Musa ineh lutep kuan amung-amung uang ruma' Allah mepad kudeng demulun, idi ieh nepebala ratnan amung-amung luk miak badén Allah muci.
6 Iamo' Keristus ineh lutep ngaceku Ieh Anak luk ngimet ruma' Allah. Tau ini uang ruma' Allah ineh, kudeng tau lutep bang kuu' idi rapet tau, pad macing kekipedneh.
7 Ngaceku ineh maya' bala Roh Meligan, "Bang aco sini kudeng muyuh ninger bala Allah,
8 aleg muyuh ngetueh niat muyuh mepad kudeng bang kareb muyuh sikal metueh ratnan Allah, kareb muyuh nenutun Neneh déi' su luk ali-ali.
9 Su ineh tepun muyuh nenutun idi nengelio Negku, kebala Allah, sagan pana' kekamenKu sinierdeh apat ngepulu' lak kinioneh.
10 Ineh punneh Ui museh nedeh idi nepebala, 'Niatdeh ineh megéi' meraruh, na ideh pian maya' balaKu.'
11 Ui museh nedeh idi nepebulung: 'Na tu-tu ideh miak semuet bang luk inanKu ucu'!'"
12 O kinanak-kinanakku, matar do'-do' pad seburur pana' rat arang muyuh na ngalap niat luk dat dengan na manu pad ieh lumi ratnan Allah luk mulun ineh!
13 Iamo' do' mada' arang muyuh sebuleng anid-anid aco, seruked "Aco Sini" miak tetanen, pad seburur pana' rat arang muyuh na mangun metueh niat ngaceku saluk sala'.
14 Ngaceku tau pangeh nengalap babpat bang Keristus kudeng tau ngimet meraben rapet luk pun-pun ineh pad macing kekipedneh.
15 Ngaceku pangeh inayud: "Bang aco sini kudeng muyuh ninger balaNeh, aleg muyuh ngetueh niat muyuh mepad kudeng bang kareb muyuh sikal metueh."
16 Idéké lemulun luk neninger bala Allah idi sikal metueh rat eneh? Bakenké lemulun luk pangeh kinuyut Musa neremuat rat Masir?
17 Idéké luk inanNeh museh bang apat ngepulu' lak kinioneh ineh? Bakenké amung-amung lemulun luk pangeh nenganau' sala', pad butungdeh petelubid bang su luk ali-ali ineh?
18 Idéké luk binulungNeh, kareb Ieh nepebala, "Na tu-tu ideh miak semuet bang luk inanKu ucu'"? Bakenké lemulun luk nengelaba bala ineh?
19 Idi tau kali' nedeh na miak semuet ngaceku na manu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA