Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale kam Sasarainamai pasasamba tai Kariten sinogai Taikamanua leú et! Bulat keruji peité kam ka bagat paatuatmui pagalaiat tubut Jesus néné! Aikoiniaké nia Taikamanua ka galajet simakokoi, iaté, bailiu Imam Sabeu ka aratta situt'akenenta néné.
2 Bulat matopit nia ka tubut Taikamanua, sipasipipiliy nia ka galajet nenda, kelé topit nia ka sia si Mose siburú, igalaiaké galajetnia ka uman Taikamanua.
3 Tápoi ka sia Jesus mateúan isiló kehormatan simakopé beunan, saliu peilé kai Mose. Aipoí sia sipasigagalai lalep buítá rasiló kehormatan simakopé beunan, belé peilé ka tubut lalep.
4 Kirénangan sangamberinia lalep, ai sia sipasigagalai, tápoi sipasigagalai sangamberinia geti bulat tubut Taikamanua lé.
5 Ka sia si Mose matopit nia masipuukú galajet ka uman Taikamanua sambat masisegéaké sangamberi kuanen Taikamanua ka gogoi sibabara.
6 Tápoi ka sia Kristus matopit nia siripot puooni nia Toga, siputatanggung jawab ka uman Taikamanua. Oto sita néné te uman Taikamanua, ké mariu-riu baí puroron paatuatta samba putotonem bagatta masisiló sangamberinia karonietta.
7 Oto kalulut néné, kelé ka sikuat Ketsat Sipunenan, "Ké nuarep kam nga-ngan Taikamanua gogoi néné,
8 buí nukeláaké kam paatuatmui, kelé siperúra ka sia taikebbukatmui, ka tetret arasaggangi Taikamanua, samba arauji Taikamanua ka simatangeu.
9 Aikua Taikamanua, 'Sedda te arasibo samba arauji aku taikebbukatmui, kenanen araitsóan sigalaiakenenku ka bagat epat ngapulu ngarura burúnia.'
10 Iaté lulunia akupugoluki sia samba akukua ka matadda, 'Mariu-riu lé tá ramatopit, samba maipit rareddet parentakku.'
11 Oto pugolúkungan samba pusuppakkungan leú et, kuakkungan, 'Tá te raguguruki laggai nenda bulé raaroiaké tubudda sedda sambamai.'"
12 Ale kam Sasarainamai, bulat kau nupasikeli kam nia, bulé buí ibara ka talagamui sipupaatuat bulat simakopé kataí samba sitaimatonem baga, pat sik-sikrangan tei-teira elé pat reunan'akérangan tubudda ka tubut Taikamanua sipuririmanua!
13 Oto bulé tá rabara ka talagamui siorak patajuat jo, pat sagganginangan Taikamanua, buítá pangantru kam katubu senen gogoi ka burut puririmanuanta ka tetre oniakenen, "Gogoi Néné" ka Buko Sipunenan.
14 Aipoí alei Kristus sisangaperjuangan lé sita sangamberitta néné ituooniaké, sarat kau lé mariu-riu taomet'aké kam teret kalepakat, putotonem bagatta siikep'akenenta siboikí.
15 Néné te atusurat'aké ka Buko Sipunenan, "Ké nuarep kam nga-ngan Taikamanua ka gogoi néné, buí nukeláaké kam paatuatmui, kelé taikebbukatmui, ka tetret arasaggangi Taikamanua."
16 Oto kasonia aiarep nga-ngan Taikamanua, lepá saggangiddangan nia? Iaté sangamberidda sibelaakenen Mose ka laggai Misir, elé?
17 Samba kasei ka tubu aipugolú Taikamanua ka bagat epat ngapulu ngarura burúnia? Iaté ka tubudda sijo, simamatei ka simatangeu, elé?
18 Ka tetret aipusuppa Taikamanua aikua kisé, "Tá te raguguruki laggai nenda, bulé raaroiaké tubudda sedda sambamai"; oto kasonia nenda ikukua Taikamanua? Isasaú-saú iaté sipasisasaggangi Taikamanua, elé?
19 Oto sené kolou ka sita, taiooi nia ratugurú, kalulut taimatonem bagadda ka tubut Taikamanua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA