Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ya'ami ira talifusõ Banua Niha Keriso si no Ikaoni Lowalangi! Mitandraigõ wo'angeragõ sanandrõsa khõ Yesu andre! Lowalangi zamatenge Ya'ia ni'osambalõ'õ tobali Ere Sebua bakha ba agama si no faduhu dõdõda.
2 Yesu lõ farõi khõ Lowalangi si no manuyu Ya'ia ba halõw̃õ da'õ. Si mane Moze gõi fõna si lõ farõi ba wombambaya halõw̃õnia ba gotalua Mbanua Lowalangi fefu, ba Nomo Lowalangi.
3 Ba Yesu zinangea manõndra sumange sabõlõ ebua moroi khõ Moze. Bõrõ me niha sangotomosi omo lõ tola lõ manõndra sumange abõlõ ebua moroi ba nomo andrõ.
4 Duhu dozi omo so zangotomosi ya'ia. Ba sangotomosi fefu hadia ia, ba no Lowalangi samõsa.
5 Moze lõ farõi tobali enoni bakha ba Nomo Lowalangi ba sangombakha fefu hadia ia ni'oroma'õ Lowalangi ba ginõtõ si so fõna.
6 Ba Keriso lõ farõi si mane Ono sangonorogõ tõdõ Omo Lowalangi. Ba ya'ita andre Nomo Lowalangi andrõ, na lõ mamalõ wehi'a dõdõda ba lõ mamalõ wanõtõna ba wanõndra hadia zi no tadõnadõna.
7 Bõrõ da'õ, si mane niw̃a'õ Geheha Lowalangi, "Na ma'õkhõ andre mirongo li Lowalangi,
8 bõi mi'abe'e'õ dõdõmi, si mane ira tuami sabe'e tõdõ andrõ me luo molaw̃a ira khõ Lowalangi, ba latandraigõ Lowalangi ba danõ si mate.
9 'Ba da'õ latandraigõ Ndra'o ira tuami ba lababaya Ndra'o,' Iw̃a'õ Lowalangi, 'ba sindruhunia sa no la'ila hadia nilau-Gu ba zi õfa wulu fakhe fa'ara.'
10 Da'õ mbõrõ wa mofõnu Ndra'o khõra, ba Uw̃a'õ, 'Lõ mamalõ lõ sõkhi ira, ba la'aohasi wamalua oroisa-Gu.'
11 Mofõnu Ndra'o ba fahõlu, 'Wa lõ dania mõi ira bakha ba nahia andrõ, ba wanõndra folombase khõ-Gu!'"
12 Ya'ami ira talifusõ, mi'angenanõ bõi irege so ba gotaluami samõsa niha si so tõdõ si lõ sõkhi ba si lõ omasi mamati khõ Yesu, irege ibali'õ ia ba i'arõu'õ ia khõ Lowalangi sauri!
13 Tobali, ena'õ lõ hadõi samõsa gõi moroi ba gotaluami nilimo horõ irege mamadaõ ia khõ Lowalangi, ena'õ faoma mi'amenesi nawõmi ero ma'õkhõ sagõtõ ya'ita nasa auri ba ginõtõ nifotõi "Ma'õkhõ andre" bakha ba Mbuku Ni'amoni'õ.
14 Ba ya'ita fefu ba no awõ si faoma ohitõ dõdõ khõ Keriso; asala aro ita wololohe fa'aro dõdõ sindruhundruhu si no ta'okhõgõ ba mbõrõta.
15 Da'õ nisura bakha ba Mbuku Ni'amoni'õ, "Na ma'õkhõ andre mirongo li Lowalangi bõi mi'abe'e'õ dõdõmi, si mane ira tuami sabe'e tõdõ, me luo molaw̃a ira khõ Lowalangi."
16 Haniha ira niha samondrongo li Lowalangi ba solaw̃a khõ-Nia? Da'õ fefu niha nidõnia'õ Moze si otarai danõ Miserai, lõ?
17 Ba ha'õkhõ mofõnu Lowalangi si õfa wulu fakhe fa'ara? Khõra niha si so horõ, si mate ba danõ si mate, lõ?
18 Me luo fahõlu Lowalangi si mane, "Lõ mõi dania bakha ira ba nahia wolombase andrõ khõ-Gu" -- haniha gõi niw̃a'õ Lowalangi? Niw̃a'õ dõdõ-Nia ya'ia niha solaw̃a khõ Lowalangi, lõ?
19 Iada'e aboto ba dõdõda wa lõ labe'e khõra nahia wolombase andrõ, bõrõ me lõ faduhu dõdõra khõ Lowalangi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA