Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ane ewa parajanji to uyunya, re’e porenta-porenta to nalulu ntau tempo mampue mampakabae i Pue Allah, pasi re’e seja tampa to darapampue to naika nto lino.
2 Etu semo tenda to napasilonga nsira. Wali tenda etu re’e dua songinya. To uyunya nja’u tinja to darapamposaka pansona, pasi re’e seja meja pasi roti to room rapampueka resi i Pue Allah. Songi to etu rato’oka songi to mapasing.
3 Panewa re’e wo’u rindi ronto. Ri sambali nu rindi etu re’e wo’u songi to kaduanya to rato’oka songi to mapasing kojo.
4 Songi to etu re’e palampa weyawa to rapangantunu kemenyan, pasi re’e seja peti to juku rabombongika weyawa pasi la’u parajanji i mPue Allah la’u rayanya. Pasi peti etu la’u seja tampa weyawa to bananginya pangkoni mana, pasi la’u seja toko i Harun to malonde tempo owi, pasi watu to dua to ipantulis porenta sampuyu.
5 Wali ri wawo mpeti etu re’e dua mba’a anu to rato’oka kerub to raika yako weyawa. Kerub etu tondong ngkeyawa i mPue Allah maroo nja’u ria. Wali kerub to dua etu paninya mangantorung ba’a mpeti etu, to rato’oka tampa to napangabombong i mPue Allah dosa apa saba raa to rapalasika nja’u ria. Pei samparia to etu aku tawa damampakanasaka kojo tempo si’i.
6 Wali ewa wetu semo tenda i mPue Allah rapasilonga, panewa ponto-ponto eo masua to pampue ri raya nsongi to uyunya damangika palaong to si sira.
7 Pei ojo to pampue to bae angganya to maya masua ri songi to kadua. Santo’u sangkani ia masua pasi taa maya masua ane taa mangkeni raa. Wali raa etu raa nu binatang to ia mangkeni damampampueka resi i Pue Allah. Naka pei ia mangkeni raa etu see i Pue Allah tamo damangkitanaka dosa to si ia pasi dosa ntau boros to taa naporaya-rayaka nsira mangika.
8 Wali yako palaong to etu i Nosa Mapasing mampakanasaka kita ane tiroowa rapake tenda to uyunya etu, pasi ane owo to pampue to bae angganya to maya masua ri raya nsongi to kadua, batuanginya tawa re’e jaya ntau boros masua re ria.
9 Wali samparia palaong etu ewa tondong to napake i mPue Allah ri tempo etu apa tawa temponya Ia mangika jaya to monso. Wali sora pasi pampue to napampueka ntau tempo etu resi i Pue Allah taa nakoto mampakayongo raya nsira to mangkeni. Wali see naka sira tiroo mangepe sala ri tango i mPue Allah.
10 Apa sora pasi pampue etu ojo singkonong pei porenta mangkonong pangkoni pasi anu to rainu pasi porenta to mpangaya-ngaya mangkonong anu to raposo’i. Pasi samparia porenta ngkatuwu nto lino etu, nawaika i mPue Allah tauNya danapake nsira sampe rata temponya Ia mangika jaya ngkatuwu to bou.
11 Pei i Kerisitu masuwumo si’i-si’i. Ia mawali to pampue to bae anggaNya to mampasilonga anu to matao to kita mangarata. Pasi Ia mangika palaong to etu ri raya ntenda i mPue Allah ndate saruga. Tenda etu semo to tao-tao pasi to masilonga wo’u pei tenda to naika i Musa tempo owi. Apa tenda to ndate saruga etu si’a naika nto lino, batuanginya, tenda etu si’a yako ri lino to rapapowali si’i kare’enya.
12 Wali tempo i Kerisitu masua ri raya ntenda i mPue Allah etu, Ia taa masua mangangkeni raa nu bembe pongka pasi raa nu ana nsapi. Tempo Ia masua ri raya nsongi to mapasing kojo etu, Ia sangkanija masua mangangkeni raa to si Ia semo. Pasi tempo Ia masua etu Ia roomo mangoli kita pei mangalapa kita yako ri huku nu dosa rataka ri singkasaenya.
13 Wali tau to ri ara mporenta i Musa, ane sira mangika bara kesaa naka pei rato’oka makarika ewa ada mporenta i Musa etu, tau etu rapedasaka raa nu bembe pongka pasi raa nu sapi pongka pasi ue to sigalo awu nu ana nsapi to room ratunju yau. Wali ane ewa porenta, raa pasi awu etu mampakayongo muni koro ntau etu see ia maya mampue mampakabae i Pue Allah apa ia tamo rato’oka makarika.
14 Wali ane raa nu binatang mampakayongo koro ntau etu, bae wo’u batuanginya raa i ngKerisitu, apa raa etu mampakayongo raya ngkita. Apa yako kuasa i Nosa to tuwu singkasaenya, i Kerisitu mampampueka koroNya resi i Pue Allah ewa pampue to masilonga kojo. Wali raaNya mampakayongo raya ngkita yako palaong to tare batuanginya see kita maya mangika palaong to masipato raika mampue mampakabae i Allah to tuwu.
15 Wali tempo to lino tiroowa ri ara mporenta to uyunya, tempo etu sira re’e mangika dosa. See naka i Kerisitu mate mangansompo dosa etu see to lino maya ralapa yako ri huku nu dosa etu. Wali Ia semo to mampasilonga kita resi i Pue Allah. Pasi Ia mangabanang parajanji to bou see i sema tau to napokio i mPue Allah mawali tauNya, tau etu damangarata rasi to singkasaenya to naparajanjika i mPue Allah.
16 Wali kita taa maya mangarata rasi etu ane taa mate i Kerisitu. Apa rapanya re’e tau to mangantulis yami sura mparajanji to mampakanasaka pamporaninya mangkonong ewa wimba daraika mangantilaka ngananya panta tempo ia mate yau. Wali sura mparajanji etu tawa re’e batuanginya ane tawa mate tau to mangantulis. Pei ojo kapate yau ntau to mangantulis, panewa bae batuanginya sura etu. Apa ngananya taa mangantima panta to raparajanjika etu ane tawa mate yau tau tu’anya etu.
17 (9:16)
18 Wali ewa see seja parajanji to uyunya naika i mPue Allah. Parajanji etu taa seja re’e batuanginya ane tare raa to rapake. Raa etu mampakanasaka re’e to roomo namate yau.
19 Apa ojo karoonya i Musa mampakarebaka to Israel samparia porenta i mPue Allah, ia mangoko raa nu ana nsapi pasi raa nu bembe pongka sigalo pei ue. Roo see ia mangoko wo’u sangkongko pinumuya to rato’oka hisop pei manganso’oka wuyu domba to mawaa. Panewa ia mangantuika hisop pasi wuyu domba etu la’u raa to sigalo ue pei mampedasaka ri wawo nu buku rayuyu to nja’u ratulis porenta i mPue Allah pasi mampedasaka seja resi tau boros.
20 Ia manganto’o, “Si’i semo raa to tondong mparajanji to naporentangika i mPue Allah komi mangalulu.” Ewa wetu nato’o i Musa.
21 Pasi ewa see seja nikanya mampedasaka raa ri woto ntenda i mPue Allah pasi ri wawonya samparia to rapake mampue mampakabae i Pue Allah.
22 Wali kamonsonya ane ewa porenta i Musa, mosu samparia anu to re’e rapakayongo mangampake raa. Pasi dosa nto lino ane tare to rasimbale yau pei tiwubu raanya, taa maya ralapas. Wali batuanginya, parajanji to bou pasi parajanji to masae paka rapakatantu mangampake raa.
23 Wali tenda i mPue Allah to ri lino si’i pasi samparia ngaya-ngaya to rapake nja’u ria, anu to etu ewa ta’anya anu to ndate-ndate saruga. Pasi ane tenda pasi ngaya-ngaya to ri lino tempo etu, samparia to etu taa maya taa rapakayongo mangampake raa mpampue to room rapakanasaka etu. Pei ane tenda i mPue Allah pasi ngaya-ngaya to ndate saruga, pampue to rapake ndate ria, pampue etu semo to tao-tao pei pampue to rapake mampakayongo anu to ri lino si’i.
24 Apa i Kerisitu Ia taa masua ri raya ntenda i mPue Allah to naika nto lino pasi to ojo ewa tondong ntenda to monso. Ia masua ri raya nsaruga semo, pasi tempo si’i Ia mamponsaruka kita ri tango i mPue Allah.
25 Pei Ia si’a ewa to pampue to bae angganya ewamo to lino, apa ane to pampue to etu, ponto-ponto to’u ia masua ri raya nsongi to mapasing kojo mangangkeni raa to si’a raa ngkoronya. Pei i Kerisitu Ia taa mandudu ngkani masua ri raya nsaruga damampampueka koroNya resi i Pue Allah.
26 Apa ane ewa see, Ia taa maya taa mandudu ngkani mangarata kasesa yako ri tempo pangampapowali lino si’i. Pei si’a ewa see, apa Ia masuwumo ri tempo si’i, to mosumo kapuranya temponya to si’i. Wali Ia mampampueka koroNya see dosa rapakapura kuasanya, pasi palaong etu tamo parluu raika wo’u kadua ngkaninya.
27 Wali songka i mPue Allah, etu semo to lino ojo sangkani mate yau panewa roo see nabotus i mPue.
28 Pasi ewa see seja i Kerisitu sangkanija rapampueka resi i Pue Allah damangansompo dosa ntau boros. Pasi darata temponya Ia dama’i kadua ngkaninya. Tempo etu Ia si’a dama’i damangansompo wo’u dosa ntau, pei Ia dama’i resi tau to mangampeas Ia damampalaes sira yako ri kasusa ngkatuwunya ri lino to madosa si’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA