Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto gee niongaku-ngaku ma Kristusika! 'Ai demo-demo tosido-dogumuku ne'ena, toga'asoko ngini salingou niomorene sababu nimarimoiokau de ma Jou! Ngoi 'ai singina koitubusowa tolefoli nginika 'okia naga gee tolefokau, sababu ge'ena ma ngale to ngini 'ania laha.

² Nimasitiari 'o nyawa-nyawaka gee yodi-diai 'okia sonaa 'ito-torou, gee yadae-daene monga yakisironga 'o kaso. 'Ona yosigego-gegoto 'o nyawa yakisuna.

³ 'Ena momongo ngoneu ne'ena padawongokau 'o suna ma gou-goungu, so ko 'onawa, ngone powisuba ma Jo'oungu ma Dutu sababu to 'una 'awi Ngomasa ma sirete 'inasi'asa, de po'amalaha sababu ngone po'ahu pomarimoiokau de ma Kristus Yesus. Ngone kopomasiga-gaowa 'o 'agama ma 'atorangika.

⁴ Ngoi tanu kaidadi tomasiga-gao ge'enaka. Sababu nako moikani yongose 'ato 'ona yamao salingou yomasiga-gao ge'enaka, ge'ena ngoiosi 'ifoloika.

⁵ Ngoi 'ai 'umuru 'o wange tuangere de 'isuna. Ngoi katolahirosi 'ena 'o Israelou ma nyawa, 'ai suku 'o Benyamin; ngoi 'o Ibrani toto. Ma ngale 'o singounu 'o 'agama ma besesongika, ngoi ne'ena posironga tosingounoka sababu ngoi 'o Farisioka.

⁶ De ngoi tomagae ma sala tosikuata 'o Yahudioka ma 'agama, sigado 'o nyawa yongaku-ngaku ma Kristusika takisikisaa. Nako 'ai 'ahu yosikadelega de 'o Yahudioka ma 'agama ma besesongo, ngoi ne'ena 'ai sala koi'iwa.

⁷ Duga sababu ma Kristus, so 'okia naga gee ma sira tamaoku 'isi'utungu, ne'ena tamaoku 'isirugi.

⁸ De kage'enawa duga, so 'ena 'okia sonaa moi-moi gee tadi-diaiokau ge'ena tamaoku kaisirugi duga. Ngoi taka'elino ma 'orasi ne'ena ge'ena posironga 'ifoloi 'ibaraguna, ge'ena la towinako ma Kristus Yesus 'una ge'ena 'ai Jou. Sababu ma Kristus, so 'okia sonaa 'iodumu ge'ena takokimada. 'Iodumu ge'ena tamaoku matero ka 'o gauru ma ngale ma faedaa koi'iwa, la 'idadi to'ahu de ma Kristus,

⁹ de ma gou-goungu mimarimoi de de 'una. To ngoi 'ai 'ahu 'itiai ma Jo'oungu ma Dutu wi bionoka ge'ena ko ma ngalewa 'ato sababu tosingounu 'o Yahudioka manga 'agama ma besesongo, so ge'ena ma ngale ko ngoiwa ma sirete tomariwo. Ne'ena ngoi de ma Jo'oungu ma Dutu mimarimoiokau, sababu towingaku ma Kristus. So 'o rimoi ma owa ge'ena ma Jo'oungu ma Dutuno, ma titi pongaku ma Yesus Kristusika.

¹⁰ De sababu ngoi tomarimoi de de 'una so ngoi tomau tomoteke tosangisara de de 'una de mita tosongene de de 'una.

¹¹ La tongano-nganonou 'ato ngoi ma sirete ma dua tosongenoka de ma Jo'oungu ma Dutu woisimomikoli.

¹² Ngoi kotongosewa 'ato tomadamakekau bolo tomadotomokau, duga ngoi katosigila tomariwo ma ngale tomau tamake 'o parasengi gee ma Kristus wadua-duangou. Ma ngale ge'enau so ngoi ne'ena woi'esenou de woika'elinou.

¹³ 'Esa moi riaka dodoto, ma gou-goungu ngoi kotamaowa 'ato ngoi tamakekau 'o parasengi ge'ena, duga ngoi tadiai 'o ngai moi, ge'ena la takokimada 'okia naga gee tadi-diaiokau ngino-nginosi, de tomariwo ta'adono 'okia naa gee 'ai bionika.

¹⁴ Ge'enau so ngoi matero katoowa-owara tosikaika 'ai dumutika la tomadamake 'o parasengi, ge'ena la to'ahu 'o sorogaaka. Ge'enau so ma Jo'oungu ma Dutu wona'asoko ma ngekomo pongaku ma Yesus Kristusika.

¹⁵ Ngone poodumu gee pokuatokau nanga ngo-ngakuoka, ngone salingou nanga di-dibangi koge'ena. Ma nako nginioka naga munuka manga di-dibangi 'iregu, ge'ena dua ma Jo'oungu ma Dutu 'asa wosiwaiti nginika.

¹⁶ Duga salingou niosisingina naneda: Ngone salingou po'ahu moteke 'o do-dotoko 'iti-tiai gee ngone pamotekokau sigado ne'ena.

¹⁷ 'Esa moi riaka dodoto! Niamoteke 'isoka to ngoi 'ai di-diai. Ngomi miosidumutokau kokia po'ahu 'itiai, so niakilega niosidi-diai 'o nyawa gee yamoteokau 'isoka to ngomi mia 'ahu.

¹⁸ 'Okia naga gee tosidemo-demo ne'ena, ge'ena 'ijaga tinidongosekau, de ne'ena tinidongoseli ma tamaoku 'ai singina 'isusa so tosigari-gari, sababu naga manga gudai manga 'ahu ma sigoronaka yositorou ma Kristus wosongene 'o salipoka ma ngale.

¹⁹ 'O nyawa koge'ena dua ma du'uruku yakihukumu so yotorouoka, sababu 'ona yosilamo-lamo ka to 'ona manga roese ma nyafisuu. 'Okia sonaa gee poda-damaeke, de ge'enau yosiie-ie. Sababu 'ona yatiba-tibangi ka 'okia sonaa gee 'o nyawa 'o duniaka yodua-duaka yadiai.

²⁰ Ma ngone ne'ena ge'ena 'o sorogaa ma nyawa. Ge'enakau de waino ma Koana gee wonasilaha-laha ge'ena la ma Jou Yesus Kristus, 'unau ge'ena powida-dadanu gee dua woboali.

²¹ To ngone nanga roese ne'ena koikuatuwa so kaiwederoka, 'asa ma Kristus wadiai 'isoka to 'una ma sirete 'awi roese ma sirete gee posironga de 'isureka de koyado'oawau! 'Una 'idadi wadiai ge'ena sababu 'unaka 'o kuasa ma ngale wapareta 'o sagala moi-moi.

Filipi

Video Filipi 3

Ikuti Kami:

KONTAK | PARTISIPASI | DONASI