Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ahirne, semeton-semeton tiang, side pade harus besukecite lẽq dalem Tuhan. Tiang ndẽq merase berat jari nulis malik napi saq sampun tiang tulis tipaq side sendẽqmanne; sẽngaq hal nike solah jari keselametande.

² Onyaq-onyaq lẽq dengan-dengan saq gawẽq hal-hal saq jahat, dengan-dengan saq pantes tesebut acong. Ie pade paksaq adẽq dengan-dengan tesunat.

³ Sẽngaq ite niki dengan-dengan saq sampun nerimaq sunat saq sejati, saq beribadah siq Roh Allah, dait jari bangge lẽq dalem Deside Isa Almasih dait ndẽq percaye lẽq hal-hal saq lahiriah.

⁴ Setetune tiang bau doang beharep sepenoq angen lẽq hal-hal saq lahiriah nike. Sẽngaq lamun araq dengan saq merase ie bedowẽ alasan jari beharep sepenoq angen lẽq hal-hal saq lahiriah, tiang lebihan malik.

⁵ Tiang tesunat sewaktu beumur baluq jelo. Tiang tebijeang jari dengan Israel, lẽman suku bangse Benyamin; tiang dengan Ibrani asli. Dalem hal ketaatan lẽq Hukum-hukum Taurat, tiang niki anggote golongan Parisi.

⁶ Malahan tiang semanget gati sehingge tiang nganiaye jemaah. Lamun tenilai menurut Hukum Taurat, tiang dengan saq solah saq ndẽq bedowẽ cacat cele.

⁷ Laguq lantaran Almasih, make selapuqne saq laẽq tiang anggep untung, mangkin selapuqne nike tiang anggep rugi.

⁸ Ndẽqne hal-hal nike doang; laguq malahan selapuq hal tiang anggep hal-hal saq ngerugiang doang. Saq tiang ẽpẽang mangkin niki lebih mulie: Kenal kance Deside Isa Almasih, Junjungan tiang Saq Mulie. Lantaran Almasih, make tiang sampun lepas selapuqne. Tiang anggep selapuqne nike maraq dedoro doang, adẽq tiang mauq Almasih,

⁹ dait araq lẽq dalem Ie ndẽqne siq kebenaran tiang mẽsaq lantaran taat lẽq Hukum Taurat, laguq siq kebenaran lantaran percaye lẽq Almasih, nike kebenaran saq teicanin siq Allah, siq dasar percaye lẽq Deside Isa Almasih.

¹⁰ Sopoq-sopoqne saq tiang melẽtang nike adẽq tiang kenal kance Almasih dait ngalamin kuase saq ngidupang Ie lẽman ninggal. Tiang melẽt milu menderite bareng kance Ie dait jari pade maraq Ie dalem hal ninggal-Ne.

¹¹ Adẽq lẽq penutuqne tiang mẽsaq gen teidupang malik lẽman tengaq-tengaq dengan ninggal.

¹² Tiang ndẽq paran bahwe tiang sampun berhasil atao sampun jari sempurne, laguq tiang tetep berusahe, sang tiang iniq mauq, sẽngaq tiang ẽndah sampun tebau siq Deside Isa Almasih.

¹³ Semeton senamian, tiang ndẽq merase bahwe tiang sampun berhasil ngerebut hadiah nike. Laguq araq sopoq hal saq tiang laksaneang, tiang ngelupaqang napi saq araq lẽq mudin tiang, dait berusahe keras adẽq tiang mauq napi saq araq lẽq julun tiang.

¹⁴ Dait pelai terus tipaq tujuan adẽq mauq hadiah, dait tiang temanikang siq Allah lẽman sorge langan Deside Isa jari mauq hadiah nike.

¹⁵ Ite selapuq saq sampun dẽwase secare rohani, harus bedowẽ pikiran maraq nike. Laguq lamun lẽq antare side araq saq lain pendapetne, make Allah gen jelasang ẽndah hal nike lẽq side.

¹⁶ Laguq ite harus idup menurut napi saq sampun ite turut jangke mangkin niki.

¹⁷ Semeton senamian! Silaq turut teladan tiang. Pade perhatiang selapuq dengan saq idup menurut teladan saq sampun tiang pade bẽng lẽq side.

¹⁸ Sẽngaq tiang sampun rimpes gati badaq side, dait mangkin tiang ulang malik sambil tiang nangis, bahwe araq luwẽq dengan saq idup jari musuh salib Almasih.

¹⁹ Idup dengan-dengan maraq nike gen tutuq lẽq keancuran, sẽngaq Tuhan ie pade, tianne mẽsaq. Hal-hal saq merilaq, malahan nike saq ie pade banggeang; sẽngaq ie pade cume mikirang hal-hal saq araq lẽq dunie niki doang.

²⁰ Laguq ite niki warge sorge, dait lẽman derike ẽndah ite ngantos, Junjungan Saq Mulie Deside Isa Almasih sebagẽ Juruselamet.

²¹ Awakte saq lemah niki gen terobah siq Almasih jari maraq rage-Ne mẽsaq saq mulie. Ie bau ngelaksaneang nike lantaran Ie bedowẽ kuase jari ngalahang selapuq-lapuqne.

Filipi

Video Filipi 3

Ikuti Kami:

KONTAK | PARTISIPASI | DONASI