Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dan indagunerij, dara dan indamouwerij, sug dan dog surad gin sug ouwedoc, kaba, dan douwan desulou yen mougwa hom deit, dauntoba yen yemobsara dau Krisdus touwero. Doba sug yen yedag hom dara maman Adehsud ginohob, kaba, yen meigdoc eigouhw medam an en toua terimda. Dara sug dan dog surad ucucugb dou yen gin, kaba, emeic dag indoc emogom touwero. Doba dan indirs eijouhw naugb dan desulou yen dag gin namcir. Anai dan decinaga dau sug yen yaimo gin terimda, kaba, dag gogom emeb naugb yen toua deitero. Doba maireseb menau geb huhugb eb deinaugb yenohob.

² Dangga hang, yen yebehnehino yenin meigdoc mes dougwo leng Krisden dau leng Yahudi gedig len louwan naugb lehigeij lusud meraga dau toua namcir. Anai len loudesa dau sug len lec merus dau dara len laimo Musa men gomnomna aud gousanara laos dara toua, kaba, gin eng eic dag len ledag Allah mehir misenohob. Hanoba len merug mog dag mihi naugb len lagodgod lusud, dauntoba len lec merus dau toua terimda.

³ Dobnaro. Len lemedag Allah mehir misen emogdoc sug len leicara dag ginero. Doba mamang Krisden eng madag Allah mehir misen dous. Anai maman, kaba, maman mamod mamina debsa Musa men gomnomna aud gousanara. Dara maman mamec maman mamus dau naugb sug Allah eic maireseb menau geb huhugb dou maman touwero. Doba sug maman mamdoc dag hom dara Krisdus Yesus dag ginohob, kaba, maman magahugouhw an en terimda. Hanoba maman mamesijaresa Allah emogdoc areg Musa men gomnomna arougb maman an gin toua deitero. Doba maman masijaresa Allah ogdoc areg Mena Gogoufu arautut maman aud gin dous. Hang gin eng edag lec merus dau dag misenohob.

⁴ Doba gareg en ec mos dau dara en aimo Musa men gomnomna aud gousanara. Hanoba en od mena debsa augwan gini edeinyum naugb sug Allah eic maireseb huhugb dou en, kaba, dan eng daimo augwan gini edreg dau len laugwan namcirohob. Hang emedeinyum naugb sug dan dod indina debsa gin dag misen toua.

⁵ Anai lona senggemoi debin dau sug dan indim ouwadan dan, kaba, len lec dan indus dau. Dangga dan dedag leng Yahudi toua teisis namcirohob. Dara sug macic mameijouhuda, kaba, dani Benyamin medebeito dan toua. Anai dan injemouwer, kaba, ingma susugwero, doba len laugwan dau leng Ibrani. Hang dan toua dedag leng Ibrani misenohob. Dara eisaugb Musa men gomnomna gin, kaba, dan daimo augwan edreg dau len gus laugwan toua. Anai dan toua dedag sud hom dau leng Parisi ginohob.

⁶ Dangga eisaugb Musa men gomnomna gin, kaba, lusud lemowun dan indoho an aremer hom touwero. Anai dan deic induwemougb esesa naugb dan daimo augwan gin namcirohob. Hang dan indoc emesgiraha an leng Krisden touwero. Doba dan deic mog erij dou len terimda. Anai dan doudesa endag sug dan daimo gini, kaba, eic Allah medoc esgiraha an dan. Hanoba emeic gerleij dou dan se gin terimda toua.

⁷ Dangga sug nosa, kaba, dan insoho mougb an Musa men gomnomna gin augwan namcirohob. Doba ogdoc Krisdus gin hom, hang dan indoho emobsara dau augwan. Dauntoba dan decinaga areg geb se indan Adehsud Krisdus Yesus en medoc mes augwan asesa toua. Anai gin, kaba, mera eisaugb medam edreg dau areg mohon graga augwan namcir. Dangga ogdoc en, hang dan demaimo areg mohon toua deitero, doba dan darges dau augwan. Hanoba dan dowun augwan graga dag mihi mor meiyema toua. Dauntoba sug dan deic Krisdus dag danin indanohob, kaba, dan dedag hom dara en toua terimda.

⁸ (3:7)

⁹ Hang dan demeic induwemougb esesa naugb Allah eic gesgigouhwesa dou dan dau sug dan demaimo Musa men gomnomna gin toua deitero. Doba sug dan indoc ebdebin an Krisdus dag gin, kaba, edeinyum naugb sug Allah eic gesgigouhwesa dou danohob. Anai en emeic gesgigouhwesa dou maman emogdoc mamanin maman geicara ginero. Doba dau sug maman mamdoc ebdebin an Krisdus hom dous.

¹⁰ Sug dan dedag hom dara Krisdus dag ginohob, kaba, dan indoc erleij aud aremer hom gin dous. Aremer hom gin, kaba, dag dan decinaga areg geb se Krisdus enin medoc mes augwan asesa namcir. Hanoba dan deicara daimo en an Allah men goubesa areg en eic naugb aigdoumesa Krisdus dau gomom sug nosa. Dara dan indoc erleij naugb dan daimo en asa ucina mog erij. Dauntoba indan gauwamara augwan, kaba, aninim dag en men gauwamara aud sug en omom gin toua.

¹¹ Anai sug dan deicara dag gin, kaba, dan dod indina debsa Allah dag dan domom terimdero. Doba en eigdoumesa dan dau gomom aud maireseb menau geb huhugb gin toues.

¹² Dangga hang, dan demarges dau ucina gin touwero. Doba dan deic induwemougb esesa. Dauntoba areg Krisdus Yesus os dou danohob sug en agaigeij dan sug nosa, kaba, augwan emediyebeiya dau dan touwero. Doba dan desma augwan gini dag misen namcir. Anai iteitogini, kaba, dan demdaimo deisa usi naugb demesma gin. Hang emedeinyum naugb sug Allah emeigdoumesa dan indoho naugb gin touebma.

¹³ Dan indagunerij, dara dan indamouwerij, sug dan decinaga dag dan demesma augwan gini dag misenbuma, kaba, dan demaimo indan geicara mohon augwan toua deitero. Doba dan dohw dan indidgo dou namcir. Hanoba dan dobga audi areg geb ino dan indin dara dan den indinesa naugb dan desma augwan gin toua.

¹⁴ Dangga hang, dan demeitig dau ucina misen gin touwero. Doba dan dobga dobosboro asa ucina gin namcir. Dauntoba maireseb menau geb huhugb se bogo emediyebeiya dau dan touwero. Doba dan dedesma toua. Anai sug Allah eija dan naugb dan dedag hom dara Krisdus sug nosa, kaba, en os augwan gini dag mogud dou danohob.

¹⁵ Dara gareg dau yen, en edag lusud mos se Krisdus touohob, kaba, eigouhw naugb en emeitig enin dau ucina misen gin touwero. Doba en medoc aninim dara dan naugb aman amobga asa ucina misen aud maireseb menau geb huhugb gin toua terimda. Doba gareg dau yen, en mou baiso ara gus dougwo ucina misen gin, kaba, dan dacgeij Allah naugb en ens areg se misen dou en touahabi.

¹⁶ Doba sug sud hom medoc aninim dara danohob, era en mou aiso ara gus dougwaba, kaba, gini emesloulougwero. Doba esloulougb dag areg maman macinagohob, kaba, maman mamarges deb touwero. Doba maman maicara maimo gin terimda.

¹⁷ Dangga hang, dan indagunerij, dara dan indamouwerij, yen yemarges dau dan indohotimei mohw an indan geicara gin touwero. Doba yen yeicara yaimo dan terimda. Dara gareg dau yen en emaimo ginbuma, kaba, yen yehigdecin leng laimo emenohob, dauntoba yen yeicara yaimo dangga toua.

¹⁸ Anai leinyana merugwengga desij yen, kaba, len leigdoumesa areg len merdoc etrij icira dag seiseij naugb lenin terimdaba. Dara areg eic igdebes dou lusud, kaba, len leimiman lenin an gin terimda toua. Anai len merdoc emebdebin an areg gen dau bogoro, doba len merdoc ebdebin an areg geb se cinogo gin dous. Dangga hang, edebeij Lona Sug Ouwedoc gin, kaba, Allah ahacugb len merur mor se dum smougb namcir toua. Anai meren geicara, kaba, aiyan Krisdus an men gomom taiba sogo salib gin debohob. Hang len lemedag en mesir misen toua deitero. Doba len ledag men moc dous. Dan desulou yen dougwo len gin sugragohob. Doba dan desulou yen dougwo len deit dara dan deb dara dan indoc momogo an gin terimda toua.

¹⁹ (3:18)

²⁰ Doba maman, kaba, maman mamdoc emebdebin an areg geb se cinogo gin deitero. Doba maman mamdoc ebdebin an areg geb se bogo hom dous. Anai maman madag magun sunggohob. Dangga hang, maman maigtou mateteij dara mabehibeh dougwo Lona Sug Maman Adehsud Yesus Krisdus En Ecicugwen gin toua namcir. Anai enin, kaba, en eigdoc maman dau sesar men gogom augwanohob.

²¹ Hanoba sug en en gin, kaba, en eperwei maman mamaga gomomtom dara getaha gini aninim dag enin maga gebsa gogouf cucugb gini, aimo dau men goubesa an maman toua. Anai men goubesa gin, kaba, edeinyum naugb sug en aiyan ara ara augwan eb tainya en mohora gin toua namcirohob.

Filipi

Video Filipi 3

Ikuti Kami:

KONTAK | PARTISIPASI | DONASI