Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kedungenna, o senina-seninangku, meriahlah iakapndu erkiteken persadanndu ras Tuhan. Labo kuakap dalih ngulihisa kai si nggo kusuratken man bandu, janah tama ngenana man bandu.
2 Metengetlah nandangi kalak si ndalanken perbahanen-perbahanen si jahat, eme biang, si tetap mpertahanken undang-undang sunat.
3 Sabap kita me si nggo ngaloken sunat si tuhu-tuhu, labo ia; sabap kita nembah man Dibata arah Kesah Dibata, janah meriah i bas kegeluhenta erdandanken kita nggeluh i bas persadan Kristus Jesus. Kita labo ernalem nandangi adat-adat si teridah.
4 Tentu saja aku pe banci nge ernalem man barang-barang si bage. Adi lit kalak erpengakap maka banci ia ernalem nandangi adat-adat si teridah, bancin aku erpengakap bage.
5 Aku isunatken asum umurku waluh wari. Aku tubuh selaku kalak Israel, suku Benyamin, janah kalak Heber asli me aku. Kerna ndalanken Undang-undang, kalak Parisi kap aku.
6 Janah perbahan tutusna ateku ndalanken Undang-undang e, kugasgasi pe gereja. Bicara sekalak jelma banci rembak ras Dibata arah ndalanken Undang-undang aku me si labo pernah ersalah.
7 Tapi kerina si nai kuakap untung, genduari kinirugin kuakap erdandanken Kristus.
8 Labo kerna si e saja, tapi kai pe kinirugin kuakap rimbangken si meherga e, eme penandai kerna Jesus Kristus Tuhanku. Erdandanken Kristus, nggo kuambekken kerinana, janah kupedirep si e kerina sampah-sampah, gelah banci kudat Kristus dingen.
9 Tuhu-tuhu ersada aku ras Ia. Lanai bo kuusahaken ngerembakken diringku man Dibata arah ndalanken Undang-undang. Tapi aku nggo rembak ras Dibata arah kinitekenku man Kristus. Dibata jine si nggo ngerembakken aku kempak DiriNa erdandanken kinitekenku.
10 Sada ngenca sura-surangku eme gelah kutandai Kristus dingen kugejap kuasa KekekenNa janah ikut aku ngenanami KiniseranNa, dingen bali ras Ia i bas KematenNa,
11 alu pengarapen maka aku ipekeke Dibata i bas si mate nari ku kegeluhen.
12 Labo kukataken maka aku nggo ndatken si enda ntah pe nggo serta. Aku tetap erpala-pala guna ndatken hadiah si nggo isikapken Kristus Jesus. Guna si eme aku IteguNa janah IjadikenNa jadi SikerajangenNa.
13 Situhuna o senina-senina, labo aku erpengakap maka nggo aku ndatken hadiah e. Tapi sada ngenca si kubahan, eme ngelupaken kai si arah pudingku janah erpala-pala ndatken si arah lebe.
14 Emaka pinter aku kiam ku tujun guna ndatken hadiah e, eme pendilo Dibata guna kegeluhen i Surga, si IpesehNa man bangku arah Kristus Jesus.
15 Kerina kita si nggo mbages erkiniteken man Jesus Kristus bage min perukurenta. Tapi adi lit i bas kam si la bage perukurenna, Dibata me pagi mpetangkassa man bandu.
16 Kai gia jadi, siteruskenlah ngikutken usihen si nggo siikutken seh genduari.
17 O, senina-senina tetaplah usih aku. Nggo itamaken kami kalak si man usihenndu, emaka perdiatekenlah kalak si nggo ngikutken usihen e.
18 Nggo megati si enda kukataken man bandu, janah genduari kuulihi alu iluh mambur: nterem kalak si kegeluhenna erbahanca ia perimbang ras kayu persilang Kristus.
19 Kalak si bage lawesna la banci lang kempak kebenen, sabap dibatana, eme peraten kulana. Megah iakapna i bas si patut iakapna mela, janah si iukurina kerna barang doni ngenca.
20 Tapi kita, warga Surga kap. Genduari alu ate metedeh sitimai kerehen si Engkelini kita i Surga nari, eme Tuhanta Jesus Kristus.
21 IsalihkenNa me pagi kulanta si kote dingen si ermasap-masap enda, jadi bali ras KulaNa si mulia. Si e banci IlakokenNa erkiteken i bas Ia lit kuasa guna ngelakoken si e kerina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA