Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Abudneh, O kinanak-kinanakku, do' muyuh mawang niat bang Tuhan. Idi na ui melibo ngayud sekua' teh bala luk mepad kudeng ini kuan muyuh, ngaceku ieh ineh mangun ku do' kuan muyuh.
2 Do' matar burur muyuh ratnan uko'-uko', ieh ineh ratnan lemulun luk lemubed ngakem luk dat, idi maya' adat sunat luk mesala'.
3 Ngaceku tau ini sunat luk matu, idi tau luk sembayang inan Allah dengan Roh, idi mawang niat dengan ulun tau bang Keristus Yésus, idi na merapet ku anun-anun luk ratnan burur.
4 Kali' rungen ui ini miak merapet ku luk ratnan burur. Idi kudeng idé lemulun luk baken ngerawé miak merapet ku luk ratnan burur, idi meluun teh ui ini pana'.
5 Ui pangeh sinunat kareb aceh minggu ulunku. Ui ini lun Israil, ratnan babpat lun Beniamin. Idi ui ini lun Iberani idi inul lun Iberani pana'. Ratnan Ukum lun Yahudi ui ini lun Parisi.
6 Idi ui mekél pad ui megéi' nengedereh sidang, idi ratnan luk matu bang Ukum ui na mesala'.
7 Iamo' anun-anun luk pangeh mangun ku peruan kuanku atun, ineh teh luk belénku mangun ku rugi' ngaceku Keristus.
8 Idi meluun teh, bang terawéku, luk amung-amung miak mangun ku rugi' kuanku ngaceku luk pelaba raga ini, ieh ineh pad ui miak miti Keristus Yésus Tuhanku. Idi ngaceku Keristus ui pangeh nenala' luk amung-amung. Idi amung-amung ineh ui mala mangun ku arap, pad Keristus mangun ku peruanku,
9 pelé ui mangun ku sebuleng denganNeh, baken dengan luk matu ratnan bururku sebuleng idi ratnan Ukum teh, iamo' dengan luk matu ineh luk nacing ngaceku anu inan Keristus, ieh ineh luk matu ratnan Allah ngaceku manu.
10 Luk pianku, ieh ineh ngiti Neneh idi kali' lalud tuiNeh ineh idi rurum bang derehNeh ineh, idi mangun mepad denganNeh bang atéNeh,
11 pad ui miak macing inan tui rat arang lun naté ineh.
12 Baken ayu-ayuneh ui pangeh nacing, idi pangeh mangun meriput; iamo' ui mekél matun Neneh, pad ui miak ngimet meraben mepad kudeng ui pangeh inimet Keristus Yésus.
13 O kinanak-kinanakku, nateh ui mala bururku pangeh nengimet meraben ratnan ineh, iamo' sebuleng teh luk miak ruenku, ieh ineh ui mekelupan amung-amung luk pa puet, idi ngetaduk bururku kuan luk pa atun.
14 Ui upun-upun amé' inan tanu' luk matun tabpar, ieh ineh tawar Allah luk déi' dita' bang Keristus Yésus.
15 Ngaceku ineh, do' tau luk lutep anu ngerawé luk kudeng ineh, idi kudeng sebuang muyuh inan terawé luk baken, idi ineh miak ruen Allah ngegala' kuan muyuh.
16 Do' tau nacu lawé tau maya' bada' luk binaya' tau macing nekini.
17 O kinanak-kinanakku, do' amung-amung muyuh pad-pad maya' lawéku, idi ngerawé do'-do' ratnan amung lemulun luk nalan kudeng ineh, mepad kudeng kai mangun ku luk pinginud kuan muyuh.
18 Ngaceku mula' lemulun luk nenganau' bururdeh mangun ku bunu' kuan salib Keristus, luk pangeh bilaku tuda'-tuda' kua' kuan muyuh, idi nekini pana' ui mada' dengan tangi'ku.
19 Idi kekipeddeh bang apui, idi batekdeh mangun ku akang kuandeh, idi anun-anun luk inan migu' mangun ku rayeh kuandeh, idi ideh luk ngerawé ratnan kekamen tana' ini.
20 Iamo' tana' tau inan déi' surga, idi tau nganét Lun Nengulun macing rat surga, ieh ineh Tuhan Yésus Keristus.
21 Ieh miak ngisu' ayu burur tau luk dat ini mangun kudeng ayu bururNeh luk merasat ineh, maya' mepad kudeng tuehNeh luk miak ngebeneh luk amung-amung pa liang imetNeh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA