Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ulang ma simburu uhurmu mangidah halak parjahat, anjaha ulang ma ho ra saor pakon sidea;
2 ai hamagouan do iparanggi-ranggi sidea, anjaha na masambor do isahap-sahapkon bibirni.
3 Marhitei hapentaran do tarpajongjong rumah, anjaha marhitei panimbangion do totap ai;
4 marhitei habotohon gok ma kamar-kamarni bani bagei-bagei ni arta na maharga anjaha na majenges.
5 Halak na maruhur do tongon na gogoh, anjaha na marpambotoh simada kuasa,
6 ai marhitei pambobai na pentar tardalankon porang, anjaha marhitei buei ni sipanuturi dapot hamonangan.
7 Magijangtu do hapentaran bani halak na bodoh; bani partumpuan seng ongga mungkab pamanganni.
8 Halak na paranggi-ranggi na masambor, targoran do ai kopala ni parjahat.
9 Dousa do piningkiran ni halak na oto, anjaha halak sipanrisai, hagigi do bani jolma.
10 Anggo seng tahan ho bani panorang hasosakan, ai ma tandani na hurang do gogohmu.
11 Sai paluah ma halak na sinarad hu hamatean, anjaha olat ma halak na itogu hu panayatan.
12 Anggo ihatahon ho, “Tonggor ma, seng ibagas botohnami ai,” mintor ma nani lang ibotoh sipareksa uhur pasal ai? Siparorot tonduynima ibotoh do ai, anjaha ibaloskon do bani jolma domu hubani na binahenni.
13 Ale anakku, pangan ma manisan, ai dear do ai, sonai tobu-tobu ni huramah, ai mantin do ai bani langit-langitmu.
14 Sonai ma hapentaran ai bani tonduymu. Anggo jumpah ho ai, adong ma pangapudianan bam, seng soya-soya be pangarapanmu.
15 Ulang ma onggopi, ale parjahat, rumah ni halak parpintor, ulang ma parseda iananni!
16 Ai pitu hali pe tompas halak parpintor, jongjong do ia use, tapi anggo halak parjahat, targompang do lanjar magou.
17 Ulang ho marsombuh-sombuh, anggo targompang munsuhmu, anjaha ulang megah uhurmu mangidah partompasni,
18 ai idahon ni Jahowa do ai, gabe sogam uhur-Ni, anjaha marbalik ringis-Ni humbani hubam.
19 Ulang milas uhurmu ibagas bani halak sihorjahon na masambor, anjaha ulang ma ho marngotngot mangidah parjahat;
20 ai bani halak parjahat, seng dong siarapkononkon, suluh ni halak parjahat maningon mintop do.
21 Ale, anakku, sai mabiar ma ho bani Jahowa ampa raja; ulang ma saor ho bani sipanggeori,
22 ai sompong do sogop hamagouan bani sidea, anjaha na so niagak ni uhur do mangonai uhum bani sidea.
23 On pe sahap ni halak na pentar do. Seng dear martonggor jumbak bani paruhuman.
24 Halak na mangkatahon dompak parjahat, “Pintor do ho!” Hona papa do ia bahenon ni halak simbuei anjaha hona bura ibahen bangsa-bangsa.
25 Tapi halak na maminsang sidea madear do, anjaha sogop do pasu-pasu ampa hatuahon bani sidea.
26 Summah-summah na mantin do parsampang na hona.
27 Pungkah lobei horjamu i ladang, torsa bahen jumamu, dob ai pe ase marrumah tangga.
28 Ulang ra ho manaksihon na so sintong dompak hasomanmu, anjaha ulang marladung ho marhitei bibirmu.
29 Ulang hatahon, “Sonai ibahen hu bangku, sonai do bahenonku bani. Baloskononku do hubani domu hubani na binahenni ai bangku.”
30 Montas do ahu hun lambung ni juma ni halak parrayoh, hun lambung ni pohon anggur ni halak na hurang uhur.
31 Tonggor ma, tubuhan suga-suga do haganupan ai, irungkub hupi-hupi do tanoh ai, anjaha mareong do tembokni.
32 Hukawahkon ma ai anjaha huparimbagaskon, huidah lanjar dapotan lumba-lumba ma ahu:
33 Tongkin nari modom, tongkin nari tibal-tibal, tongkin marlompit tangan;
34 jadi roh ma bam hamiskinon songon panamun, anjaha hahurangan songon halak parsinjata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA