Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ula menggaindu kalak jahat, ula kal pertemani ia.
2 Uga erbahan kalak cilaka e nge si iukurkenna janah babahna melasken kerina si la tengka saja ngenca.
3 Jabu ipanteki erpalasken kepentaren ras pengertin.
4 I ja lit pemeteh, i je lit bilik-bilik kuh ras barang-barang si meherga ras mehuli.
5 Kalak pentar lebihen asangken kalak megegeh. Pentingen kap pemeteh asangken gegeh.
6 Ma si bahan kin lebe rencana si megermet, ope denga kita lawes ku bas pertempuren? Reh buena kalak si mereken pedah, reh belinna kemungkinen menang.
7 Kepentaren meganjangsa guna ierti kalak longor. La lit belas-belas kalak bodoh tupung kalak melasken perkara-perkara si penting.
8 Kalak si rusur ngerencanaken kejahaten ikataken kalak me ia tukang recok.
9 Kerina perukuren kalak bodoh dosa kap. Kalak si rusur naling-naling kalak si deban, ise pe labo meriah rassa.
10 Kalak si mis bene ukurna tupung paksa gawat, kalak si bage tuhu-tuhu lemah kal.
11 Ula biar-biaren mulahi kalak si nandangi ibunuh. Pulahilah kalak si nandangi itegu ku bas penggelehen.
12 Banci jadi nindu, "Labo e urusenku." Tapi Dibata kap si meteh dingen si ngadili palas perukurenndu. Ia kap si ngawasi kegeluhenndu dingen si erbalas man bandu rikutken perbahanenndu.
13 O anakku panlah tengguli sabap mehuli kap e. Bali ras tengguli wani entebu man pangan,
14 bage pe kepentaren perlu kal man pertendinndu. Adi pentar kam terang me wari-warindu si pepagi.
15 Ula bali ras kalak jahat si erpekat ngerampuk kalak bujur dingen ngerampas rumahna.
16 Sabap aminna pe kalak bujur piga-piga kali guling tapi terus ia keke ka mulihi. Tapi kalak jahat kernep me ia erkiteken kena cilaka.
17 Ula megah akapndu kune musuhndu kena cilaka, ula kam ersurak adi guling ia.
18 Sabap la banci lang idah TUHAN kap perbahanenndu e jenari nembeh AteNa ngenehen kam, emaka lanai iukumna imbangndu ndai.
19 Ula kam rate segat ntah cian man kalak jahat.
20 Kalak jahat gelap kap warina si pepagi, janah la lit pengarapenna.
21 O anakku, erkemalangenlah man TUHAN janah mehamatlah man raja. Ula ikut-ikutndu kalak ngelawan ia.
22 Kalak si bage banci kap kernep i bas sengkemirep, sabap labo perkara kitik kune Dibata ntah raja mereken cilaka.
23 Kalak pentar pernah ngerana bagenda: Hakim la banci la rembang tengah.
24 Adi kalak si ersalah ikapitina, maka isumpahi me hakim e jenari kerina kalak rate nembeh man bana.
25 Tapi Hakim si mereken ukumen man kalak si ersalah dat pasu-pasu me ia janah ihamati pe.
26 Jabapen si bujur e kap encidahken teman si tuhu-tuhu.
27 Ula erjabu, ope denga lit jamin ras pencarinndu.
28 Ula kam jadi saksi nandangi kalak si deban, alu la lit alasen si patut; ngataken si la tuhu kerna ia.
29 Ula nindu, "Kubahan man bana sue ras perbahanenna man bangku! Kubalas ateku perbahanenna."
30 Erdalan aku arah juma peken anggur kalak perkisat, kalak si bodoh.
31 Nggo terulang kal janah mbages kal dukutna. Bide batuna nggo runtuh.
32 Kenca kuperdiateken, rukur aku kerna si e, jenari kubuat pelajaren kerna si e.
33 Banci kam munduk-unduk, banci kam medem. Cirempu kam janahndu ngada-ngada
34 tapi tarunndu munduk-unduk, reh me kemusilen ngelawan kam desken perampok si ersenjata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA