Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Teako angngiri matai mae ri tau ja’dalaka, siagang teako eroki a’bela siagang ke’nanga.
2 Poro kapallakkang bawang nanawa-nawa ke’nanga siagang apa langngeranga bawang bala nacarita.
3 Pakkalabinianga nibangungi siagang kacara’dekang kammayatompa pammahang baji’.
4 Na punna nia’ pangngassengang, lalangka’mi kaboneang sikamma kamara’na siagang barang-barang ka’jala’ na ga’ga.
5 Tau cara’deka la’bi nikangalikangi na tau kassaka; pangngassenganga la’bi paralluangngangi na kagassinganga.
6 Nasaba’ ri tenanapa ni’bundu parallui nia’ rancana baji’ rolong, siagang pila’ jai tumappakainga’, pila’ lompoi panrannuanga lammeta.
7 Tau toloa takkulleai naselangngi kacara’dekanga. Tena apa-apa akkulle napau punna a’bicara taua ri passala’ apa-apa parallua.
8 Tau tuli a’rancanaya kaja’dallang, laniarengi tupparicu.
9 Tunggala’ akkala’na tau toloa iamintu dosa. Tau tuli accallaya ri paranna tau, tena ningai ri yangasenna taua.
10 Punna tappu’ pa’minasako lalang ri kasukkarang, ikau tau lammako.
11 Teako ranggaselai allappassangi tau nihukkung mateamo; pasalamaki tau nierangamo mae ri panggentunganga.
12 Akkulle jako angkana, "Anjo teai urusangku." Mingka Najannangngiko Allata’ala. Naassengi siagang Naadeli pikkirannu. Nabalasaki rupataua situru’ panggaukanna.
13 Ana’, angnganreko bani, saba’ anjo bajiki. Sangkamma anjo je’ne’ bania battui ri ru’mung bania, te’nei untu’ nikanre,
14 kammatommi anjo, anjo kacara’dekanga bajiki untu’ nyawanu. Punna cara’dekko, singara’mi allo lanudallekanga.
15 Teako sangkammai tau ja’dalaka, assikongkoloki untu’ angngellaki tau lambusuka siagang anrampasaki balla’na.
16 Saba’, manna pole a’mole-mole tu’guru’ tau lambusuka, tuli lambangung poleangi nai’. Mingka kabalekanna, tau ja’dalaka laancuruki nituju ri bala lompo.
17 Teako sannangngi pa’mai’nu punna natuju bala musunnu, siagang teako rannui punna tu’guruki.
18 Saba’, mattantu laNaciniki Batara anjo panggaukannu siagang Nabilang ja’dalaki, nampa tenamo Nahukkungi anjo musunnu.
19 Teako birisiki yareka angngiri matai mae ri tau ja’dalaka.
20 Tau ja’dalaka tena allo ri bokona siagang tena panrannuanna.
21 Ana’, mallakko ri Batara, siagang pakalompoi karaenga. Teako katuru’-turukangi mae ri tau angngewayai ke’nanga.
22 Tau kammaya anjo akkullei ancuru’ lalang sipakkida mata, lanri anjo bala Napa’niaka Allata’ala yareka karaenga teai parkara ca’di-ca’di.
23 Tau cara’deka le’baki akkana kamma anne: Hakinga takkulleai battala’ siali.
24 Punna tau salaya nakana tena nasala, anjo hakinga lanitunrai siagang lanipakkanai ri sikontu tau jaia.
25 Mingka haking anghukkungai tau salaya lamate’nei siagang lanipakalompoi.
26 Pappiali annabaya iami tanra passiagangngang sitojennaya.
27 Teako ambangungi pakkalabiniang punna tenapa nupasadiai kokonnu siagang nia’mo pa’boya-boyannu.
28 Teako a’jari sa’bi mae ri tau maraenga punna tena siratang alasannu; teako a’balle-ballei ri passala’na anjo taua.
29 Teako angkanai, "Lakubalasaki mae ri ia apa le’baka nagaukang mae ri kalengku!"
30 Le’baka’ allalo ri kokonna siagang koko anggoro’na se’rea tau malasa’ siagang tolo.
31 Ia kucinika anjoreng poro timbo-timboang akkatinting siagang rea bawang. Runtummi kalli’ tembo’na.
32 Le’ba’na kuparhatikang siagang kunawa-nawa anjo passalaka, kugappami anne pappilajaranga:
33 Lanri ta’do’do’ siagang attinro sinampe’, lanri ammempo a’raka’ lima siagang ammari-mari sinampe’,
34 battumi kakuranganga siagang kakasi-asianga a’bakka sanrapang paella’ angngerang sanjata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA