Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ja’ ere ka oreng jahat ban ja’ terro akanca’a ban reng-oreng jareya.
2 Se epekker reng-oreng jareya coma kakejjemman ban se ekacaca coma barang se macalaka’a oreng.
3 Roma tangga reya epaddek kalaban hekmat ban pangarteyan.
4 Ban mon badha pangataowan, mar-kamarra bakal genna’a aesse rang-barang se aji ban bagus.
5 Oreng bicaksana lebbi wibawa ban ehormadi oreng etembang oreng kowat; pangataowan lebbi penting etembang kakowadan.
6 Sabab sabellunna aperrang kodu agabay rancangan se massa’ gallu, ban sajan bannya’ babala’anna oreng, sajan raja pangarep se mennanga.
7 Oreng budhu ta’ bisa ngarte ka hekmat, ta’ bisa ngoca’ pa-apa mon oreng acaca parkara se ting-penting.
8 Oreng se ros-terrosan andhi’ sajja jahat, bakal enyama’ana tokang mabaridhu.
9 Saneyap siyasadda oreng budhu reya dusa. Oreng se ros-terrosan nyale oreng laen, ta’ ekaleburi sapa’a bai.
10 Mon ba’na kaelangan pangarep e dhalem kabadha’an gawat, ba’na reya oreng se ta’ kowat.
11 Ja’ mangmang mabebasa oreng se la etantowagi eokom mate; pasalamet oreng se eeret ka cangga pagantongan.
12 Ba’na olle ngoca’, "Jareya banne tang orosan." Tape Allah ngoladi ka ba’na; ngagali ban ngadili pekkeranna ba’na. Allah reya males manossa menorot tengka gulina.
13 Na’, ngakan maddu, sabab jareya bagus. Akantha maddu dhari kalapkabanna nyarowan, manes mon ekakan,
14 bariya keya hekmat reya bagus kaangguy sokmana ba’na. Mon ba’na bicaksana, tanto tera’ odhi’na ba’na e budhi are.
15 Ja’ akantha oreng jahat se asakongkel arampok oreng jujur ban arampas bengkona.
16 Sabab oreng jujur reya, maske labuwa pan-barampan kale, gi’ jaga’a pole. Tape sabaligga, oreng jahat bakal ancora mon katebanan balai.
17 Ja’ perak mon mosona ba’na nemmo calaka’, ban ja’ perak mon mosona jareya labu.
18 Sabab PANGERAN tanto ngoladi lalakonna ba’na se kantha jareya ban nganggep lalakon jareya juba’, pas ta’ kasokan ngokom mosona ba’na pole.
19 Ja’ peggel otabana ere ka oreng jahat.
20 Oreng jahat ta’ andhi’ se ekenneng arep kaangguy odhi’na se bakal dhateng, ban ta’ andhi’ pangarebban.
21 Mara patako’ ka PANGERAN, na’, ban pahormat ka rato. Ja’ ro’-noro’an oreng se nangtang ka PANGERAN ban ka rato jareya.
22 Oreng se kantha jareya bisa ancor e dhalem saparngedep, sabab balai se epadhateng bi’ Allah otabana rato banne barang kene’.
23 Reng-oreng penter tao ngoca’ kantha reya: Hakim ta’ olle berra’ salaja.
24 Mon oreng se sala ekoca’ ta’ sala, hakim jareya tanto ebasto ban epesowe sakabbinna oreng.
25 Tape hakim se ngokom oreng se sala tanto senneng odhi’na ban ehormadi oreng.
26 Oreng se aberri’ jawaban se bendher tandhana ja’ jareya kanca se saongguna.
27 Ja’ ako-bengko sabellunna ba’na masadhiya teggalla ban sabellunna ba’na andhi’ kasap.
28 Ja’ nyakse’e parkarana oreng mon tadha’ lantaranna se patot; bariya keya ja’ sampe’ aberri’ sakse se lecek parkara oreng jareya.
29 Ja’ ngoca’, "Sengko’ malessa ka oreng jareya apa se la eteba’agi ka sengko’ bi’ aba’na."
30 Sengko’ tao lebat e teggal ban kebbun anggurra oreng se males ban budhu.
31 Se etangale’e sengko’ e jadhiya tadha’ laen kajabana ombut se adhuri ban lalang. Pagar alassa la gujur.
32 Saellana parkara jareya bi’ sengko’ epekker epadhalem, sengko’ olle pangajaran kantha reya:
33 Kalaban ngantok ban tedhung sakejja’, kalaban toju’ asandhakep ban neng-enneng sakejja’,
34 kakorangan ban kameskenan dhateng nyerrang akantha bigal se asekep gagaman.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA