Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Timbangan palsu hagigi do ai bani Jahowa, tapi batu timbangan na sintong do harosuh-Ni.

² Masa gijang ni uhur, masa ma habadoron, tapi hapentaran do jumpah bani sitoruh uhur.

³ Habonaron ni halak parpintor, ai do pambobai bani sidea, tapi hagedukon ni halak sipangosei do na parseda sidea.

⁴ Seng marguna habayakon bani panorang mardalan uhuman, tapi hapintoron do na paluahkon humbani hamatean.

⁵ Hapintoron ni halak na daulat do mambahen dalanni hornop, tapi tompas do parjahat ibahen hajahatonni.

⁶ Hapintoron ni halak parpintor do paluahkon sidea, tapi hona tangkap do halak sipangosei ibahen hisapni.

⁷ Anggo matei halak parjahat magou do pangarapanni, anjaha sinta-sinta ni halak na so pintor gabe na lang.

⁸ Maluah do halak parpintor humbani parmaraan, anjaha halak parjahat do masuk hujai, gantihni.

⁹ Marhitei pamangan ni halak parjahat madabuh hasoman hubagas hamagouan, tapi marhitei habotohon ipaluah halak parpintor.

¹⁰ Anggo mardohar halak parpintor masa do olob-olob ibagas huta, tapi halak parjahat, marsurak-surak ma parhuta anggo roh hamagouan bani.

¹¹ Marhitei pasu-pasu bani halak parpintor timbul do huta, tapi marumbak do ai marhitei pamangan ni halak parjahat.

¹² Siapasi hasomanni, ai ma halak na so marpangartian, tapi halak na marpambotoh masip do.

¹³ Halak na hujai-hujon pahata-hata halak, mambahen tarbotoh rusia, tapi ponop do ai ibahen halak hatengeran ni uhur.

¹⁴ Anggo seng dong be sipambobai, maseda ma bangsa, tapi dear ma ai anggo buei halak sipanuturi.

¹⁵ Harugian do ai manjamini halak na legan, tapi sonang do halak na so ra manjamini.

¹⁶ Parinangon siparbasar dapotan hormat, tapi bador do naboru na magigi bani na bonar.

¹⁷ Dirini do pinadearni anggo layak halak, tapi halak na kejam parseda dirini sandiri.

¹⁸ Halak siparjahat jumpahan pansarian sipaoto-oto, tapi halak na manidahkon hapintoron, dapotan untung na totap.

¹⁹ Halak na totap jongjong bani hapintoron jumpahan hagoluhan, tapi siayaki hajahaton sai matei do.

²⁰ Hagigi ni Jahowa do paruhur na geduk, tapi marosuh do Ia bani halak na so panurakon parlahouni.

²¹ Sintong tumang, seng anjai lang hona uhum halak parjahat, tapi sai maluah do ginompar ni halak parpintor.

²² Songon tintin omas na bani unsum ni babuy, sonai do naboru na majenges, na so maradat.

²³ Sinta-sinta ni halak parpintor parohkon hadearon, tapi niarapkon ni halak parjahat uhumon do.

²⁴ Halak na unjah marsibere-bere, lambin bayakni, tapi halak na sai pagugun-gugunkon, lambin miskin do.

²⁵ Halak pardear layak dapotan layak-layak, anjaha halak na ra mambere siinumon, jumpahan siinumon do.

²⁶ Halak sitahan-tahan gandum iburai halak do, tapi pasu-pasu do sogop bani ulu ni sipanjual.

²⁷ Halak siparayak na madear, gabe harosuh do, tapi sipindahi na masambor, sai roh do ai bani.

²⁸ Halak na marhatengeran bani habayakonni madabuh do, tapi halak parpintor martumbor do songon bulung-bulung na maratah.

²⁹ Halak na manggeori rumah tanggani, logou do teanonni, anjaha halak na oto gabe jabolon ni na pentar.

³⁰ Buah ni habonaran ai ma hayu hagoluhan, tapi na mandalankon na so uhum goluh do iparseda.

³¹ Tonggor ma, halak parpintor dapot pambalason do i tanoh on, samintolah ma halak parjahat ampa pardousa, lang?