Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nakabirisi Batara tau ammakea timbangang jekkong, mingka sannangi nyawaNa mae ri tau ammakea timbangang annaba.

² Tau borroa lanihinai; tau tuna pa’maika cara’deki.

³ Tau bajika nirenrengi ri kalambusanga; tau paballe-ballea lanipanraki ri balle-ballena.

⁴ Punna nadallekang kamateanga, tenamo matu-matunna barang-baranna; lasalamaki tallasa’nu punna te’ne pa’maikko.

⁵ Oloanna tau bajika nilapparri ri kalambusang, mingka tau ja’dalaka naerangi kalenna mae ri kapanrakanga.

⁶ Tau lambusuka salamaki lanri te’nena pa’mai’na; tau tenaya nakkulle nipatappa’, ta’loposoki lanri kangoanna.

⁷ Punna mate tau ja’dalaka, mate tommi panrannuanna; manrannuanga ri kale, tena matu-matunna.

⁸ Tau bajika nipalili battu ri kasukkarranga; tau ja’dalaka anggappai salibanra.

⁹ Pa’bicaranna tau ja’dalaka ammanraki; kacara’dekanna tau bajika lappasalamaki.

¹⁰ Accayai kotaya punna anggappa dalle’ tau lambusuka; akkio’ rannui ra’yaka punna mate tau ja’dalaka.

¹¹ Pangngellainna tau lambusuka ampakaga’gai kotaya; kana-kananna tau ja’dalaka ammanraki.

¹² Anghinai tau maraenga, iami panggaukang dongo’; tau bajika akkala’na tena nalakkana-kana.

¹³ Tau appa’la’banga kabara’ anging takkulleai anna’gala’ rahasia, mingka tau nipatappaka akkullei narahasiakang parkaraya.

¹⁴ Lapanraki bansaya punna tena ampimpingi; pila’ jai tumappakainga’, pila’ akkullei nirannuang kasalamakkanga.

¹⁵ A’janjia lambayarrangi inranna tau maraenga lappabattui bala; bajikangngangi tenaya nipantamaki kalea ri anjo passalaka, sollanna niamang.

¹⁶ Baine bajika akkala’na lanipakalompoi; tau pallaka lappasse’rei kakalumanynyangngang.

¹⁷ Tau baji’ pa’maika napakaupaki kalenna; tau pallaka napakarugi kalenna.

¹⁸ Kaupakkanna tau ja’dalaka iamintu kaupakkang takontutojeng, kaupakkanna tau a’gau’ bajika iami kaupakkang sitojennaya.

¹⁹ Inai talanrea a’gau’ baji’, lamate’nei tallasa’na; inai ero’ dudu a’gau’ ja’dala’ lamangei ri kamateang.

²⁰ Nakabirisi Batara tau ja’dalaka pa’mai’na, mingka Nakamaseangi tau tenaya callanna tallasa’na.

²¹ Tau ja’dalaka mattantu langgappai hukkungang; tau bajika lasalamaki.

²² Kaga’ganna baine tenaya nabaji’ akkala’na sanrapangi cincing bulaeng ri ka’murunna bawia.

²³ Kaerokanna tau bajika langngerangi kabajikang, mingka akkullea narannuang tau ja’dalaka iamintu pangngalarroi bawang.

²⁴ Nia’ tau nangai assare, mingka pila’ kalumanynyangi, nia’ tau gi’giliki, mingka pila’ kasi-asi puppusuki.

²⁵ Tau jaia passarena, lakala’biangi, tau nangai annulung lanitulung tongi.

²⁶ Inai appatambung apa-apa lanitunrai ri taua, mingka inai ambalukangi langgappai pammuji.

²⁷ Inai rajeng a’gau’ baji’ laningai ri taua; mingka inai a’boya kaja’dallang, lanitujui ri kasukkarrang.

²⁸ Inai ampattoangi barang-baranna, larunangi sanrapang leko’ toa; tau bajika la’bakkaki sanrapang cu’la’ loloa.

²⁹ Tau ampakasusayai pakkalabinianna, latappelaki sikontu apa-apanna. Tau toloa lanalayani tau cara’deka.

³⁰ Tau bajika lanikatutui tallasa’na; tau cara’deka lakatambangi tau amminawanga ri ia.

³¹ Punna lannarima todong pa’balasa’ tau bajika ri anne linoa, mattantumi langgappana hukkungang tau ja’dalaka siagang tau dorakaya.