Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN baji’ ka oreng se ngangguy tembangan se ta’ cocok, tape lebur ka oreng se ngangguy tembangan se teppa’.

² Oreng se sombong bakal eya’-seya’a; oreng se andhap asor reya bicaksana.

³ Oreng becce’ etonton bi’ kajujuran; oreng se lecegan epaancor bi’ kaleceganna.

⁴ Mon ngadhebbi maot arta tadha’ artena; odhi’na ba’na tanto salamet mon ba’na berse atena.

⁵ Kajujuran magampang jalanna odhi’na oreng becce’, tape oreng jahat maancor odhi’na dibi’.

⁶ Oreng jujur salamet lantaran kabagusanna atena; oreng se ta’ ekenneng parcaja tabalusok lantaran kadhakka’anna.

⁷ Mon oreng jahat mate, pangarebbanna noro’ mate keya, pangarep se esandharragi ka kakowadan dibi’ tadha’ gunana.

⁸ Oreng alem epalopot dhari kasossa’an; oreng jahat se agante narema kasossa’anna.

⁹ Cacana oreng jahat mamateyan oreng; hekmadda oreng becce’ masalamet oreng laen.

¹⁰ Kottha perak mon oreng jujur nemmo rajekke; ra’yat rak-soragan mon oreng jahat mate.

¹¹ Berkadda oreng jujur malebur kottha; cacana oreng jahat marosak kottha.

¹² Ya-nyeya oreng laen reya lalakon budhu; oreng se alos buddina neng-enneng ta’ acaca’an.

¹³ Oreng se dujan arasanan ta’ bisa neggu’ roseya, tape oreng se ekenneng parcaja bisa neggu’ roseya.

¹⁴ Bangsa bakal ancora mon tadha’ pamimpinna; sajan bannya’ panasehat sajan aman kasalameddanna.

¹⁵ Ajanji majarana otangnga oreng laen alamat calaka’a; lebbi becce’ ja’ ro’-noro’ parkara jareya mon terro salamedda.

¹⁶ Babine’ se bagus buddina ehormadi oreng; oreng se kejjem marogi aba’na dibi.

¹⁷ Oreng se bagus atena maontong aba’na dibi’; oreng se kejjem marogi aba’na.

¹⁸ Kaontonganna oreng jahat banne kaontongan se sabendherra, kaontonganna oreng se alako becce’ ganjaran raja.

¹⁹ Sapa se ta’ ambu alako becce’ bakal sennengngan odhi’na; sapa se maksa alako jahat bakal mateya.

²⁰ PANGERAN baji’ ka oreng se jahat atena, tape taresna ka oreng se odhi’na tadha’ calena.

²¹ Oreng jahat masthe olle okoman, oreng becce’ bakal salamedda.

²² Karaddinanna oreng babine’ se juba’ tengkana akantha sello’ emmas e elongnga babi.

²³ Pangaterrona oreng becce’ madhateng kabecce’an, pangarebba oreng jahat mapeggel oreng bannya’.

²⁴ Badha oreng se dujan ari’-berri’, tape atamba sogi, badha se dujan ra’-nyerra’ tape atamba ta’ andhi’.

²⁵ Oreng se bannya’ ari’-berri’ bakal narema’a sabannya’na, oreng se lebur atatolong tanto etolong oreng keya.

²⁶ Sapa se nombuk gandum bakal ebastowa oreng, tape se ajuwal gandum bakal ealemma oreng.

²⁷ Sapa se bajeng alako becce’ ekaleburi oreng; sapa se nyare kajahadan bakal nemmowa kasossa’an.

²⁸ Sapa se ngandellagi arta bakal ngalotora akantha dhaun se towa, oreng se alem bakal tombuwa akantha selbi’ se ngodha.

²⁹ Sapa se madhateng kasossa’an ka saessena bengkona bakal ta’ andhi’a pa-apa. Oreng budhu bakal aladinana oreng se bicaksana.

³⁰ Oreng se alem bakal salamedda odhi’na; oreng se bicaksana sajan bannya’ etoro’ oreng.

³¹ Mon e dunnya reya oreng becce’ narema’a ganjaran, la terrang oreng jahat ban se dusa bakal narema’a okoman.