Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nembeh ate TUHAN ngenehen kalak si make sukat-sukat si la bujur, tapi meriah AkapNa adi ipake timbangen si bujur.

² Kalak megombang, minter nge pagi juru, madin jadi kalak si rukur meteruk.

³ Kalak bujur itegu-tegu kebujuren, kalak perbual kernep erkiteken bualna.

⁴ Tupung kematen nggo ndeher, erta lanai lit ertina, tapi kebujuren mulahi kalak i bas kematen nari.

⁵ Dalan kegeluhen kalak bujur, kebujuren si pekenditsa, tapi kejahaten erbahanca kalak jongkang.

⁶ Kalak bujur terkelin erkiteken kebujurenna, tapi kalak si la terteki isidingi kerangapenna.

⁷ Tupung kalak jahat mate, pengarapenna pe mate, ngarapken gegeh jine la lit ertina kepe.

⁸ Kiniseran kalak bujur isalihken, tapi kalak jahat idempar kesusahen.

⁹ Ranan kalak jahat erbahanca bene kalak, tapi kepentaren kalak bujur erbahanca kalak terkelin.

¹⁰ Dem keriahen i bas kota, tupung kalak bujur jumpa rejeki, adi kalak jahat mate, ersurak-surak kalak.

¹¹ Pasu-pasu kalak bujur erbahan kota jadi mejile, tapi ranan kalak jahat ncedakenca.

¹² Lenge kap adi mpeteruk kalak si deban, adi kam erpemeteh, tentu sinik saja kam.

¹³ Kalak perancuk-ancuk la banci muniken rusia, tapi kalak si banci iteki ngasup muniken ranan.

¹⁴ Bangsa si la erpeminpin la banci lang bene me, reh teremna kalak si beluh mereken ukur, dame me negeri.

¹⁵ Ula padanken nggalar utang kalak si la itandaindu, madin ula campuri gelah ula erkadiola.

¹⁶ Diberu si melias ihamati kap, kalak si merangap kebayaken saja ipepulungna.

¹⁷ Runtung kalak si mehuli ukurna, tapi kalak si kejam ngerugiken bana kap.

¹⁸ Kalak jahat situhuna labo lit untungna, tapi kalak si erbahan mehuli nggo tentu ngalo upah.

¹⁹ Ise tutus atena ndahiken si mehuli, nggeluh me ia, tapi ise tetap erbahan jahat mate me ia.

²⁰ Nembeh ate TUHAN nandangi kalak si jahat ukurna, tapi kalak si mahan bujur IkelengiNa.

²¹ Teklah kam maka kalak jahat la banci la iukum, tapi kalak bujur terkelin.

²² Diberu si mejile tapi la beluh ertimbang i bas ukurna, bali kap ras cincin emas i bas uncim babi.

²³ Sura-sura kalak bujur erbuahken kiniulin tapi adi seh sura-sura kalak jahat nembeh ate kalak kerina.

²⁴ Lit kalak si melumbar mere, tapi tambah-tambah kebayakenna, lit kalak degil, tapi tambah-tambah kemusilenna.

²⁵ Melumbarlah mere maka kam reh bayakna, sampatilah kalak maka kam pe isampati.

²⁶ Kalak si nahan gandumna lako muat untung, isumpahi kalak kap; tapi si ndayakenca ndatken pasu-pasu.

²⁷ Ise si mehuli perayakenna, malang kap kalak man bana, tapi si ndaram-ndarami perubaten, jumpa me ia kiniseran.

²⁸ Kalak si ernalem man erta, nartar bagi bulung-bulung metua, tapi kalak bujur terlak bagi tunas nguda.

²⁹ Kalak si nama kecedan man isi jabuna, angin saja ngenca pagi ulihna; kalak bodoh lalap jadi suruh-suruhen kalak beluh.

³⁰ Ulih kebujuren eme kegeluhen, tapi kalak merawa menekenca.

³¹ Kalak bujur ndatken si mehuli kap i bas doni enda, dage kalak jahat ugapa pe dat ukumen.