Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Efesusoka 'iruahe 'iduangino de 'o Paulus wakipolu 'o jamati so manga singina wosikuatokasi. Ge'enaka de womasilo-loakasi 'asa de wosikaoko 'o Makedoniako.

² 'O Makedonia ma daeraa wanga-ngaimoi, de 'o nyawa yongaku-ngaku 'o Yesusika gee 'o gudai wakidongose ma ngale manga singina wosikuata. Ge'enaka de wotagi 'o Yunanisa.

³ Wi mede sa'ange ge'enaka dau. Gee wosidetou 'o Siriasa, de wogi'isene 'ato 'o Yahudioka yomau wito'oma. So ma rai yaowa kawolio, waboa 'o Makedonia.

⁴ Yamuruo naga 'o Paulus wimoteke 'awi do-dagioka ge'ena la 'o Sopater 'o Pirus wi ngowaka 'o Berea ma nyawa, mita 'o Aristarkhus de 'o Sekundus 'o Tesalonika ma nyawa. De 'o Gayus 'o Derbe ma nyawa, de mita 'o Timotius, de 'o Tikhikus, de 'o Trofimus, 'o Asia ma nyawa.

⁵ 'Ona yosira de midamaa 'o Troasoka.

⁶ 'O Roti Koiragi-ragiwa ma Wange ma Amoko 'ipasa 'asa de ge'ena 'o Filipioka ngomi de 'o Paulus miomagoraka, miotagi miosidete so 'o wange motoa 'asa de mimalomuoli 'o Troasoka. Ge'enaka ngomi mia minggu moi.

⁷ 'O Gareja ma obiruku de ngomi 'o giamanai mimasido'odomosi de mita miodiai 'o Ngodomo 'Itebi-tebini. Sababu ko ma bibinie 'o Paulus womajobou, so 'o utu goronau 'ena kawobi-bicarasi.

⁸ Ma ngii moi 'idaduieka ma silo 'ena 'o gudaioka, ge'enakau daku miomapoluno.

⁹ 'O dogu'uru wimoi wi ronga 'o Eutikhus, 'o jangelaka wogogerie wosigisene 'o Paulus wobi-bicara. Sababu 'o Paulus wobicara 'o do'ingoka, so ma dogu'uru gu'una wonisuku. Wonisuuku ge'ena ma jangelaka de wootaka, so wigoraka 'ena wosongenukou, sababu ma ngii ge'ena ma gurutie sigado 'iretene sa'angede.

¹⁰ Ma 'o Paulus wo'utiku de woma'idusa ge'ena ma dogu'uruoka de wikoooku. De kawongosekau, "'Uwa nimodongo! 'Una wowangokali so."

¹¹ Ge'enaka de 'o Paulus wodoakauoli dakuie, de 'o Ngodomo 'Itebi-tebini yodiai so 'o roti wosibula-bula de yo'odomo. Yo'odomo 'iduangino de ma do'ingosi wobi-bicara sigado wasaibibinuku. Ge'enaka deika wotagi.

¹² Ma dogu'uru gu'una wi woaka wisigilio wowango-wangou so kayomore-morene.

¹³ Ngomi miotagi 'o kapalika de miosira miosidete 'o Asos ma kotade ma ngale misibusuku 'o Paulus 'o kapalioka. 'Una wa'aturokau koge'ena sababu 'una dua waie kawotowongi.

¹⁴ Mimakamakeno ge'ena 'o Asos ma kotaka, de woparenokau 'o kapalie so ge'enaka de miosidetokau 'o Metilenede.

¹⁵ Ge'enaka de miosidetokauoli, so ma bibinoka 'ena miototarieu 'o ngii moioka gee 'imasidaarino de 'o Khios ma pulo. De ma bibinieli de miototaroli 'o Samos ma pulode, ge'enaka de 'o wange moiosi 'asa de mia'adono 'o Miletusisa.

¹⁶ 'O Paulus waputusokau 'ato kowotuluwau 'o Efesusika, la 'uwa 'o 'orasi wahalebiru 'o Asia ma daeraaka. So 'una womatai-taiti womau la nako 'idadi ge'ena 'o Yerusalemude wa'adono 'ena 'o Yahudioka manga Gutuku ma Ngodomo ma Wange gee yosironga 'o Pentakosta.

¹⁷ 'O Paulus 'o Miletusoka de wobesesongo 'o Efesusika 'ato 'o jamati ma balu-balusu yaino la yomakamakesi.

¹⁸ Gee yototarino de 'o Paulus kawongosekau, "'Esa moi, ngini nianakokau to ngoi 'ai 'ahu kokia nia sigoronaka, katototarinosi 'o Asia ma daeraaka sigado ne'ena.

¹⁹ De 'ai singina ma ma'ai de tosigari-gari ta'ao ma Jo'oungu ma Dutu wi manarama 'o sangisara ma dodaka sababu 'o Yahudioka manga singina 'itorou yomau 'ito'oma.

²⁰ 'Esa moi, ngini mita nianako, ngoi kotomaogo-ogoruwa tinisitotara 'okia naga gee de ma faedaaka ma ngale ngini. Ngoi tinidotoko naga 'o nyawa yoku-kudai manga bionoka de mita 'o woa-woaka.

²¹ 'O Yahudi ma nyawaka bolo 'o nyawa ma somoaka, kaitaurika takisinganono la yomaogoro 'o sowono yodiai, yoboa ma Jo'oungu ma Dutuka de yongaku ma Jou Yesusika.

²² Ne'ena 'o Ngomasa 'Itebi-tebini ma pareta tamoteke, so 'o Yerusalemude totagi. De ngoi kotanakowa dua 'okia 'idadi ngoino kadaku.

²³ Ngoi tanako duga naga 'o kota 'isinoi-noimi, 'o Ngomasa 'Itebi-tebini 'ingosekau 'ato ngoi dua tobui de tosangisara.

²⁴ Ma ngoi kotododatowa ma ngale tosongene, 'itilai tosiduanga 'ai manarama gee ma Jou Yesus woikula-kulano. De 'itilai tosingounu sigado 'ai 'ahu ma do-dogumika ma ngale tositotara 'o Habari ma Owa, ge'ena la ma Jo'oungu ma Dutu wi singina ma sure.

²⁵ Nioodumu tinikoki'adonokau, de tinidongosekau ma ngale kokia ma Jou wopareta ma ngale wokoana. Ne'ena tamaoku dua kopomakamakewau de de ngini.

²⁶ Ge'enau so ne'ena ma wange tinidongose, ika-ika la moikani niobinasa, ge'ena ko ngoiwa 'isala.

²⁷ 'Ai manarama ma ngale tosiwaiti nginika 'iodumu gee ma Jo'oungu ma Dutu womau wadiai, ge'ena koma'iwa todoowara.

²⁸ Tanu ngini ma sirete nimajaga, de niakijaga 'o jamati 'iodumu mita gee 'o Ngomasa 'Itebi-tebini nisito-togumokau nginika ma ngale niakijaga. Sababu ngini 'o Ngomasa 'Itebi-tebini niirikokau ma ngale niakisilega-lega 'o jamati ge'ena. Tanu ngini niasowohi ma Jo'oungu ma Dutu wi jamati 'isoka 'o nyawa 'o domba yoso-sowohi manga domba yojaga, sababu 'o jamati ge'ena ma Jo'oungu ma Dutu watuusokau wadiai to 'unau ma sirete, ma ngekomo 'awi Ngowaka ma sirete wosongene.

²⁹ Topasaka dua de ma rai 'o guru-guru ma ngeluku nidoboa matero ka 'o haewani 'iti-tingkai. De gee niakijaga-jagano 'isoka 'o domba, yodadi matero ka 'o haewani 'iti-tingkai ma 'inomo.

³⁰ De ka nginioka naga mita dua munuka yosihabari 'o habari ma ngeluku. Koge'ena yodiai la yomau yongaku-ngaku 'o Yesusika gee yakisiliba, la ka 'onaka yomoteke.

³¹ Sababu ge'ena nimasitiarino! De niosi-singina 'o taunu sa'angeno 'o wange de 'o obiri kotomaogo-ogoruwa takidotoko 'o nyawa 'iodumu gee nginino, de ma gudai tosigari-gari.

³² Ne'ena ngoi tinisisarakani ma Jo'oungu ma Dutuka la 'una winipaliara de nimasinganono 'awi singina ma sure ma habarika. Ma Jo'oungu ma Dutu 'awi kuasa de ma 'ena ma ngale winisikuata de winikula 'o co-catu gee wadua-duangou ma ngale 'awi nyawa 'iodumu.

³³ Koma'iwa totaleana nago'ona bato manga pipi bolo manga pakeangi.

³⁴ Ngini ma sirete nianako, ka to ngoi 'ai gasauku ma duara ngoi de 'ai ma-manai 'imote-moteke miapake ma ngale 'okia naga mia paraluu.

³⁵ Naga 'o sagala moi-moioka ngoi tosidumutokau 'ai 'ahu ma sigoronaka 'ato pomakuata pomanarama kone'ena, ge'ena salingou pakiriwo 'o nyawa gee koyomado-do'oawa. Sababu ngone salingou pongano-nganono 'okia naga ma Jou Yesus wongosekau, 'Podawongo de pokula 'ifoloi 'isanangi pokula.'"

³⁶ 'O Paulus wobicara 'iduangino, de yoodumu yokokibukuku 'asa de yolahidoa.

³⁷ 'Ona yoodumu yo'ari yomasigoono 'o Paulusoka de wiame deika yongose 'ato, "Tei sioko notagiou!"

³⁸ 'Ona manga singina 'ifoloi 'isusa sababu 'o Paulus wongose 'ato dua koyomakamakewau. Ge'enaka de 'ona wisi'otaka sigado 'o kapalika.

Kisah Para Rasul

Video Kisah Para Rasul 20

Ikuti Kami:

KONTAK | PARTISIPASI | DONASI