Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi sanggah jumpah ari Pentakosta, martumpu do sidea haganup bani sada ianan.
2 Jadi roh ma sompong sora hun langit songon parombus ni logou na gogoh montas, gabe igoki ma rumah ianan ni sidea na hundul ai.
3 Jadi taridah ma bani sidea usih hubani silah ni apuy na marjilam-jilam, anjaha sogop ma bani ganup sidea.
4 Gabe gok Tonduy Na Pansing ma sidea ganupan, jadi mamungkah marsahap na legan ma sidea ganupan, songon pambere ni Tonduy in bani sidea mansahapkonsi.
5 Tapi adong ma halak Jahudi na marianan i Jerusalem, ai ma halak na daulat humbani sagala bangsa na i toruh ni langit.
6 Sanggah na masa ai sora ai, martumpu ma na mabuei ai; jadi longang ma sidea, ai ganup do sidea mambogei hata ai ibagas sahapni bei.
7 Jadi malitonduy ma sidea anjaha longang, nini sidea ma, “Ai lang halak Galilea do sidea haganup na marsahap in?
8 Mase ma ganup hita mambogei ibagas hata ni tanoh hatubuhanta bei?
9 Hita, halak Partia pakon Media pakon Elamit ampa na marianan i Mesopotamia, i Judea ampa Kappadosia, i Pontus ampa i Asia,
10 i Prigia, Pampilia, Masir ampa i nagori Libia na hampit Kirene, ampa halak Rom na marianan ijon, halak Jahudi ampa parguru,
11 halak Kreta ampa halak Arab; ibagas hatanta bei do ibogei hita sidea mansahapkon habanggalon ni Naibata.”
12 Jadi longang ma sidea haganup, jut bei ma uhurni, nini ma samah sidea, “Ai aha do artini in?”
13 Tapi manrisai do na deba, nini ma, “Na bosurtu do in bani anggur na matobu.”
14 Jadi jongjong ma si Petrus rap pakon na sapuluh sada ai, ipagogoh ma sorani anjaha iparsahapkon ma sidea, “Nasiam halak Jahudi ampa haganup na marianan i Jerusalem, botoh nasiam ma on, anjaha parimbagaskon nasiam ma hatangku!
15 Seng na mabuk hanami on, songon pangagan ni uhur nasiam, ai pukul siah ope ari,
16 tapi na hinatahon ni Nabi Joel do na masa on, ai nini do,
17 ʻBani ari parpudi, nini Naibata, useihonon-Ku do humbani Tonduy-Hu bani sagala daging, jadi manjahai ma anak nasiam, sonai boru nasiam, anjaha marnipi ma na matua nasiam.
18 Age bani jabolon-Ku dalahi ampa jabolon-Ku naboru bani panorang ai, useihonon-Ku do humbani Tonduy-Hu, ase manjahai sidea.
19 Anjaha bahenon-Ku do halongangan bani langit i babou, anjaha tanda bani tanoh i toruh, ai ma daroh apuy ampa timus na maripul.
20 Mataniari ai gabe golap ma, anjaha bulan gabe daroh, parlobei ni ari parroh ni Tuhan in, na banggal anjaha na marmulia in.
21 Jadi sagala na mandilo goran ni Tuhan in, maluah ma.ʼ
22 Nasiam halak Israel, tangihon nasiam ma hata on: Ia Jesus, na hun Nasaret in, in ma na dob pinatandahon ni Naibata bani nasiam marhitei hagogohon, halongangan ampa tanda, na binahen ni Naibata marhiteihon-Si i tongah-tongah nasiam, songon na binotoh nasiam,
23 na dob niondoskon mangihutkon sura-sura ni Naibata na totap in ampa humbani pamotohan-Ni hinan, Ia do na dob iparsilangkon anjaha ibunuh nasiam marhitei tangan ni na so martitah.
24 Tapi ipapuho Naibata do Ia, dob itanggali haparngiton ni hamatean, ai seng tarjolomi hamatean in Ia.
25 Ai ihatahon si Daud do pasal ai, ʻHuidah do Tuhan in tongtong i lobeihu, ai i siamunku do Ia, ase ulang dugur ahu.
26 Halani ai malas do uhurhu, anjaha marolob-olob dilahku; dagingku pe marsaran do halani pangarapan.
27 Ai seng paturuton-Mu tonduyhu i nagori toruh, anjaha seng lopason-Mu Na Pansing-Mu mangidah hamarsikon.
28 Ipabotohkon Ham do bangku dalan hagoluhan, gokan-Mu do bangku malas ni uhur i lobei-Mu.ʼ
29 Nasiam sanina, huhatahon ma bani nasiam torang-torang, ia ompungta si Daud matei do anjaha hona tanom, anjaha i tongah-tongahta do tanomanni ronsi sadari on.
30 Halani nabi do ia, anjaha ibotoh, na dob ibijahon Naibata do bani, pabangkiton sahalak humbani ginomparni bani paratasni,
31 ibagas botohni hinan domma isahapkon pasal parpuhoon ni Kristus in, ai ma na so paturuton Ia i nagori toruh, atap idahon ni daging-Ni hamarsikon.
32 In ma Jesus, na dob pinapuho ni Naibata, haganup do hanami manaksihon ai.
33 Dob ipagijang Ia hu siamun ni Naibata, anjaha ijalo Tonduy Na Pansing na pinarbagah-bagah in humbani Naibata, gabe iuseihon ma in songon na nididah anjaha ibogei nasiam.
34 Ai seng si Daud naik hu nagori atas, tapi ihatahon do, ʻNini Tuhan in dompak Tuhanku: Hundul ma ho hu siamunkon,
35 paima Hubahen munsuhmu, gabe sidogei-dogeian bani naheimu.ʼ
36 Ase torang ma ibotoh haganup bangsa Israel: Ia Jesus na pinarsilangkon nasiam in, domma ipabangkit Naibata gabe Tuhan anjaha Kristus.”
37 Manangar ai, itorusi ma uhur ni sidea, gabe ihatahon sidea ma hubani si Petrus ampa hubani hasomanni apostel, “Aha ma sibahenonnami, nasiam hasoman?”
38 Ihatahon si Petrus ma hubani sidea, “Paubah nasiam ma uhur nasiam, anjaha padidihon nasiam ma ganup nasiam hubagas goran ni Jesus Kristus, bahen hasasapan ni dousa nasiam, ase ijalo sibere-bere ni Tonduy Na Pansing.
39 Ai bani nasiam do bagah-bagah in ampa bani anak nasiam ampa bani haganup halak na daoh, sidiloon ni Tuhan Naibatanta ope.”
40 Buei ope hata na legan isaksihon, laho mangojur sidea, nini do, “Paluah nasiam ma diri nasiam, humbani bangsa na geduk on!”
41 Jadi tardidi ma haganup na manjalo hatani ai, anjaha adong do hira-hira tolu ribu halak na tambah bani na sadari ai.
42 Anjaha totap do sidea bani podah ni apostel ampa ibagas parsaoran, ibagas na manopiki ruti ampa na martonggo.
43 Sogop do uhur na mabiar bani haganup; buei do halongangan ampa tanda ibahen apostel ai.
44 Sai sada do ganup na porsaya ai, anjaha parbagianan rup do ihira sidea arta ni sidea.
45 Ijuali sidea do arta ampa barang-barang ni sidea, ibagihon ma ai bani haganup, domu hubani haporluanni bei.
46 Anjaha ganup ari do sidea sauhur i rumah panumbahan; jojor rumah do sidea manopiki ruti, anjaha ibagas malas ni uhur ampa uhur na bulus do ijalo sidea sipanganon ai.
47 Ipuji sidea do Naibata anjaha rosuh do uhur ni simbuei mangidah sidea. Anjaha ganup ari do itambahi Tuhan in na dapotan haluahon bani kuria ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA