Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yesus Kristus ino fobik inam aruhureg ap obog toho Inikni atuk lit ap onolukon warehon minggir enebuhuk ulug waruhu. At Yesus Kristus ino men Ikni Allah men enepma wereg lit komo haptuk lahi.
2 Haren wene hiyag isaruk lit holtul peruk sambil oho holtul fug peruk sambil oho wene fanowon hiyag isamin ulug wep toho welaruhun. Haren siyag ane inamap turuk lit fag toho komo eneptuk laruhun. Hele fano roho uruk lit inindi seyap enebuhun. Hindi imbik wamburuk lit milal eneptuk laruhun.
3 Tot welamuhukteg tem toho uruk awene fahet ninirim ulug holtul fug uhup. Nininggarehen peruk lahe ane tul peruk lit ninisanggo fam fano holtul peruk ane hiyag nisawag ulug milal eneptuk inap enemuwen wol toho kilap eneptuk lamuhup.
4 Tem ane urukon fahet inisanggo latuk anggeyen suwit urukon fahet fano holtul ulug inisanggo husuruk lamuhup.
5 Hat hil wirik toho wereg lit mun ane man ane fahet hindi anggat toho welaruhun. Siyag ane hubam atuk halug hindi imbik wamburuk lit wene fanowon hiyag isaruk ahunen tuk teg ane turuk laruhun. Allah amingminganggeyen tuk teg ane fano roho turuk laruhun.
6 Ninggareg fahet uruk lahiyon te wam hubu lahabuk oho lit senggeltukmu mep wilip atuk hag toho an ninggareg namep wambik oho turukon ari an ninggareg war atuk ane horog teg lahi.
7 Ap sa tam lamisi ulug pupu angge laruk lit turuk hag toho an oho fano roho laruk lit enehangge tamon ino fam larikik. Anden Kristus fam wenggel haruk lit nindi wirik toho welatikik.
8 At pikir ane turuk lit palimu atisi ulug naliliyangge Allahn og nuruhuwon wep toho emberuk. At waruhureg ap minggir enebuhu sambil ino og uruhuk ulug wep toho emberuk. An eneg og nuruhu fug, Yesus waruhu ulug mangno ruruk inap obog toho arimano oho og isahu.
9 Hun Demas ino kinangma angge fahet wenggel haruk lit an numbaharisimu folo-folo an at ambeg lahuk peruk laruhun. Hun Demas ino o Tesalonika larisimu hun Kreskes oho o Galatia larisimu Titus oho o Dalmatia larisimu
10 (4:9)
11 Lukas eneg an men wereg lahe. Anden turuk lahi ane hun Markusen fano let nabuk tehen at ambeg lahunteg an nambeg hondoholug waruhun.
12 Hun Tikhikus o Efesus lamihin ulug monde ferikik.
13 Osit sambun o Troas hun Karpus ibam emberikikon men nambuku wam ahap fam wirihon men buku winon men walug waruhun.
14 Hun Aleksander posiyemanggen laltuk ahun inowen siyag ane anggolo nubam turuk latisi. Turuk latisi ane hikit toho Ninikni Allahn ayeg war uruhu.
15 At ino wene niren hiyag isaruk laheyon fahet irim toho werehen aren har oho siyahap habuhu rohon hindi holuk toho yet teg laruhun.
16 An nubam alem emberusareg kapal naptusa sambil ap misig oho an nibil atisi fug, obog toho wilip atusareg longgo urusa. It longgo uruson arimano Allahn kapal isahu fug ulug it unubahet sembahyang uruk lahi.
17 Ari turusa angge famen Ninikni an nibil atuk lit nineyap naptisimu iren kapal niyaruk ane fahet anden hebeloho hiyag isarukmu Allah unuk enepeleg inap obog toho wene fanowon holtusa. Wene fanowon holtusama olomene olokonen senggel naplep angge famen Allahn windat naptisimu wilip atikik.
18 Ap anggolowen an fahet wabuhuk peruk angge famen Nikni Allahn it ininggikmu angge kobog nabuhu. At wereg ambeg fanoma hondog nabuhuwen windat nabuhu. At palimu weregma mondabi wel turuk lamuhup. Amin.
19 Priskila men Akwila men Onesiforus ori men uhe malik men hi enebuhun.
20 Erastus o Korintus pok atisi, Trofimus ouk ubam atisimu o Miletus embeselug waharikik.
21 Siyelu li inam am fugmu an ambeg lahuk peruk laruhun. It Ebulus men Pudes men Linus men Klaudia men nonori winon obog toho tuma welaheyonen hi haptuk lahe.
22 Ninikniyen hat let haptuk lit hit obog toho Indi henesug laruhu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA