Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma Kristus Yesus 'asa woboali 'o duniano ne'ena ma ngale wakihakimi de wabalasi 'o nyawa kayowango-wangosi de yosonge-songenokau manga di-diai 'ito-torou de yaowa-owa. De 'una 'asa wopareta ma ngale wokoana. Ge'enau so ma Jo'oungu ma Dutu de ma Kristus Yesus manga bionoka, ngoi toga'asoko tosigou-goungu nginika, ge'ena la:

² Ngona salingou nositotara 'o habari ma Jo'oungu ma Dutuno. Salingou nomadudu-duanga la kaitaurika nositotara 'o habari ge'ena ngaro 'o nyawa yooluku yosigisene bolo yosigisene. Nakitawanono de nosikadiai gee koiti-tiaiwasi de 'o nyawa manga singina nosikuata. Nakisidemo 'onaka 'okia naga salingou 'ona yadiai de 'ani sabari 'iamoko gee ma 'orasi nakidotoko.

³ Sababu dua 'asa ma 'orasi ya'adono, 'o nyawa 'asa koyamotekuawau 'o do-dotoko 'iti-tiai. Ma 'ona 'asa yamoteke ka to 'ona ma sirete manga mau, de yomadolomu 'o guru yaku-kudaino la yakidotoko 'okia sonaa gee yo'isenika 'isa-sanangi.

⁴ 'Ona 'asa yomatopongonoka gee 'iti-tiaika, ma dua 'asa yosigisene 'o jarita ma so-somoaka.

⁵ Ngaro 'o susa de 'o sangisara bolo 'o sanangi ma sigoronaka ma ngona salingou nomasidiaino. Notongosono 'o sangisaraka, nadiai 'ani manarama nositota-totara 'o Habari ma Owa, de nosidagi nosidi-diai 'iso de ni manaramou ge'ena la ma Jo'oungu ma Dutu wonileleani.

⁶ Ma ngale ngoi ne'ena, koito'ingowau de tosongenou la 'ai 'ahu tokula 'imadadi 'o su-suba ma Jo'oungu ma Dutuka. Ngoi rekeni tamadaka 'o dunia ne'ena.

⁷ Ngoi tamotekokau totandingi tosigou-gounguku, de ta'adononinou ma gare ma do-dogumoka. Ngoi kotomasimadawa de ma Kristus sigado ma do-dogumika.

⁸ De ma 'orasi ne'ena, gee tomada-dagakunu ma parasengi 'ida-damaau ngoi. 'O 'orasi ma do-dogumoka, ma Jou 'o hakimi woloa-loa gu'una 'asa woikula 'o parasengi ge'ena, sababu ngoi to'ahu mimakasanangi de ma Jo'oungu ma Dutu. De duga ka ngoiwa 'asa tamake 'o parasengi ge'ena, ma mita 'o nyawa 'iodumu gee yoda-dadanu de yodua-duaka ma Jou 'awi bo-boa.

⁹ Nomariwo la nomataino ngoino,

¹⁰ sababu 'o Demas woidoowarukou ngano wosi-singina 'o dunia ne'ena. 'Una wotagiokau 'o Tesalonikaka. 'O Kreskes wotagiokau 'o Galatiaka, de 'o Titus 'una 'o Dalmatiaka.

¹¹ Ka 'o Lukasou duga naga de de ngoi. Woni'asokino 'o Markus de woni'asano nimatuonino, sababu 'una 'idadi 'ai manarama wariwo.

¹² Ngoi towisulokokau 'o Tikhikus 'o Efesusika.

¹³ Gee naino de na'asano 'ai baju 'o 'alo ma da-datoko, gee tamadaku 'o Karpus wi woaka 'o Troasoka. De mita na'asano 'o buku-buku gee 'ipe-peleleno 'o haewani ma kai yadi-diaiku.

¹⁴ 'O Aleksander, 'o tambaga wodi-diai gu'una, wodiaiokau 'o hali 'ito-torou ngoino. Ma Jou 'asa wosikilioro 'unaka moteke to 'una 'awi di-diai.

¹⁵ Ngona ma sirete salingou nomasitiari 'unaka sababu 'una posironga wodu'udukuoka to ngone nanga do-dotoko.

¹⁶ Gee ngoi tomadasango ma di-disiraka, komoiwa moi 'isiboa. 'Ona yoodumu 'idoowara. Tanu ma Jo'oungu ma Dutu 'uwa wakisisowono ne'ena ma halioka!

¹⁷ Duga ma Jo'oungu ma Dutu kowoimadakawa. 'Una 'ai singina wosikuata so ma rai 'idadi ta'akunu tosihabari 'o Habari ma Owa 'iodumu ge'ena, la ko 'o Yahudiokawa ma nyawa yoodumu yokoki'isene. De ngaro rekeni tosongenoka ma ma Jo'oungu ma Dutu woiriwo woisipidili.

¹⁸ Ma goungu ma Jou dua 'asa woisipidili naga 'o sagala niati 'ito-torouoka gee ngoino 'itaari. Dua 'asa koido'oawa 'una woi'asa 'awi pareta ma ngiika 'o sorogaaka. Tanu 'o nyawa-nyawa wisikokiarene 'una kaisi'ado-'adonika. 'Amin. Koge'enau.

¹⁹ 'Ai tabea nositotara ngo Priskilaka de 'o Akwilaka, de 'o Onesiforus 'awi woa ma dodaku.

²⁰ 'O Erastus wogo-gogere 'o Korintusoka, de 'o Trofimus towimadaku 'o Miletusoka wigogamuku.

²¹ Nomariwo de ma goungu la koya'adonuawasi 'o 'alo ma 'orasi 'ena noboakau ne'enano. 'O Ebulus, 'o Pudes, 'o Linus, 'o ngo Klaudia de nanga riaka dodoto yoodumu gee ka 'o ngo-ngaku moi manga tabea yosidingoto nginika.

²² Tanu ma Jou naga de de ngona, de ma Jo'oungu ma Dutu 'awi simara'ai naga de de ngini nioodumu 'Esa moi! Ngoi 'o Paulus, tinitabea!

2 Timotius

Video 2 Timotius 4

Ikuti Kami:

KONTAK | PARTISIPASI | DONASI