Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ La ratu pole' to Puang Isa Almaseh mangparenta susi Raja. La rra'tah kara-karana totuo sola tomate. Iamo joo, nakita Puang Allataala na Puang Isa Almaseh, kumeta'da tongan lako iko

² ammupangpeissenanni to Kareba Kasalamatan lako tau, madoangrika ba'tu cia'rika, na la mupakainga' na mupapahangngi tooi to kasalanna. Apa la mupaendek tooi sumanga'na na musabbara' nnajahhii.

³ Nasaba' la den wattunna nate'damo namadoang to tau mpesa'dingngi pangngajaran tongan. Sibalikanna rrempunri buda guru naajahhii to apa napumasannang penawanna, anna wa'ding nturu'i bang kamadoangan gaja'na.

⁴ Cia'i mpesa'dingngi to pangngajaran tongan, apa iara napesa'dingngi to curita tojolo to tangkebattuan.

⁵ Apa ia to iko, la mangngingaranko moi apa to jaji. La sabbara'ko moi muoloi buda parri'. La mupangpeissenan tarruhhi to Kareba Kasalamatan. Na susi mesa' tompangjaman Puang Allataala la mujamai moi apa nasuanko.

⁶ Na ia tee aku', nadete'mi wattunna, la matena' butung karoba lako Puang Allataala. Te'damo namasai kusalaiko.

⁷ Mangka kupengkulle-kullei mpangpeissenanni to Kareba Kasalamatan susi to massiewa watang na kudete'mi to kupangngujuinna. Matappa' tarruhna' lako Puang Isa angge cappa'na.

⁸ Na ia tee too dipasadianmo' paraseng kapataloan. Ia to Puang Isa, tomangra'tah tangbimbang, la mbenna' joo paraseng kapataloan ke Kiama'mi lino, nasaba' napupenjaji tomelona' Puang Allataala. Na tangngia aku' manda to la llolonganni, apa sininna to tomamali' ntajan karatuan-Na Puangta'.

⁹ La mupengkulle-kullei madoi' ratu ssikitanna'.

¹⁰ Nasalaimo' Demas, nasaba' la'bi nakabudaimo ia tee lino, na male lako kota Tesalonika. Male toomi Kreskes lako tana Galatia na Titus lako tana Dalmatia.

¹¹ Lukas mandamo torro kusolan. Angahhi Markus ammuratu sola, nasaba' wa'dingngi mbaliina' lan jamanku'.

¹² Kusuamo Tikhikus male mati' kota Efesus.

¹³ Ia ammuratu, bawanna' baju kamban to kupatorro jio kota Troas, jio bolana Karpus. Bawa ngasan tooi to sura'ku', la'bipa to sura' balulang dikabua'.

¹⁴ Aleksander, to pande tambaga, mangka mpugaukki to liwa' ganjang lako aku'. Na Puang Allataalamora mpabalahhii to sipato'na panggaukanna.

¹⁵ La majagako lako ia, nasaba' gaja nakaba'ci to apa tapangpeissenan.

¹⁶ Ia tongkubungah dipangngolo mpangkadanan kaleku' jio olona tomangra'tah kara-kara, te'da bang moi mesa' tau kusolan, nasalai ngasanmo'. Apa dennaa upa' nadanggi' napasalai Puang Allataala.

¹⁷ Apa naampaimo' Puang, naben toomo' kapakullean, angkuwa'ding mmangkai jamanku' mpangpeissenan Kareba Kasalamatan lako sininna bangsa tangngia to-Yahudi inde', napasalama'na' Puang jio mai kamatean.

¹⁸ La nala'paranna' Puang jio mai sininna kagajatan to mpatuna' anna ssolanna' tama suruga to nanii mangparenta. Iami joo, la dipakala'bih tarruhhi te'da cappa'na. Amin.

¹⁹ Sallangku' lako Priskila sola Akwila na lako rapunna Onesiforus.

²⁰ Ia to Erastus torroi jio kota Korintus. Kupatorroi Trofimus jio kota Miletus, nasaba' masakii.

²¹ La mupengkulle-kullei muratumo inde' namane' wattu macakke'. Massallangngi Ebulus, Pudes, Linus sola Klaudia lako iko. Susi toda to sininna tomatappa' pira' inde'.

²² Dennaa upa' naampaiko Puang nabarakka'i kamu' sola ngasan! Padamo jolo' too. Sallangki' mati', Paulus

2 Timotius

Video 2 Timotius 4

Ikuti Kami:

KONTAK | PARTISIPASI | DONASI