Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pohol kinang eleg arik ohoma alem siyahon eke hag eke hag inam aruhu angge re hat holuk toho welamin.
2 Ari roho tuhu li ap welamuhubon arimanowen ininggareg fahet eneg wenggel haruk lit uang amingmingangge welamuhup. Nininggareg palimu welahe ulug hemet til noruk. Ap enebug eneg uruk lit ikni isinga enele holtuk eleg. Hi eneptuk ane enepeleg toho wereg lit wene fahet enembol yig utuk.
3 Ap inindi isa fug angge ap hili roho werehon men mangno roho wereg eleg. Ap winon fahet enele si uruk lit ininggareg unubabut hale feruk eleg. Onolok ane eneg wenggel haruk lit fanowon fahet inirim toho wereg.
4 Huruwe lul peruk lit fuki roho wenggel ha fug angge witnik-wetnog angge turuk. Allahn telep peruk ane embeseruk lit ininggareg inindiyen tila perukon eneg turuk.
5 Allah ine wereg ulug wenggel ha fug anggeyen wene apma wereg inap pukag ulug un ane turuk. It ari roho turuk inap arimano fahet hambol yig isahun.
6 It ari roho turuk inap arimano winonen ap olma kurukon sapsabi kulug hiyap siyag-siyag ane turuk hiyap inindimuwen eke hag eke hag hilila peruk hiyap arimano men ying aptuk lit umahayeg uruk lit inda yako wereg.
7 Hiyap arimanowen hiyag nesemek eneg uruk angge famen Allah wene fanowon ino inindi anggar am fug teg.
8 Yanes men Yambres menen Musan Allah wene fanowon hiyag isarukmu ninirim uruk latfag hag toho iren oho ari roho turuk. Un ane eneg inindimu wenggel haruk lit fanowon Allah fam wenggel ha fug teg.
9 Siyag ane ari turukmen eneg welamuhup fug. It Yanes men Yambres menen turuk latfahon hikit toho sohu-sohu ane eneg turuk inap wereg ulug ap obog tohowen yer isahupteg onoluk amuhup.
10 Anden hiyag hitikik ane holtikinteg nubabut pal niyaruk lit anden peruk ane hikit toho turuk lahen. Allah fam wenggel haruk lit nindi imbik wamburuk lit ap nindi enesug lit nindi yuwag toho weregma yet niyarikin.
11 O Antiokhia men o Ikonium men o Listra men inap arimanowen nuwatuk lit mug naplug larukmu sat anggolo haruk latikikmu haren an niyarikin. Anggolo roho nele ying naptuk lit nuwatuk latusama Nonowe Yesusen windat naptisi.
12 Ap obog toho Yesus Kristus men mangno roho wereg lit Ubam wenggel harukon arimano aben unusuruk lit mug eneplug laruk.
13 Onolok ane turuk lit enele si uruk inap arimano nin anggolo onolok amuhup. Ap winon inindi ninap enebul peruk angge famen ininggareg inindi ninap eneptukmu ke hareyon laruk.
14 Hat wene fanowon hiyag hutusama holtikinteg tem toho perikinon ino hinggik ine roho seneg laruhun. Milal haptuk lit hiyag hutusa inap holuk toho welaruhun.
15 Hat hebe totma wene fanowon haharoho werehon holuk atisi. Wene haharoho werehon inowen Yesus Kristus fam hindimu wenggel hahunteg fano aruhun ulug hindi anggarap haptuk.
16 Wene fanowon suwesingga fam haharoho imbibahon arimano Allah hime fanowon unubam weregma haharoho imbibag. Suwesingga haharoho imbibag ane re ap fano ane milal eneptuk lit siyag ane turukon fag turuk lit unubabut hale feruk lit Allahn peruk ane fahet komo eneptukon fahet imbibag.
17 Ap san Allah ngi roho werehon arimano haharoho imbibahon ino fam unubabut fano aruhumu fano ane eneg tuk hag teg lamuhup.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA