Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali aku rani mampatiendoka korom mangkonong anu to damawali ane mosumo kapuranya temponya to si’i. Wali tempo etu damapari kojo.
2 Apa tau to tuwu ri tempo etu, sira ojo damamporayang koronya ngkalio, pasi ojo rani sugi. Sira datibaro pasi mangei. Pasi sira damangarowis sa’e, pasi mangewa tau tu’anya, pasi bo’onya manganto’oka sa’e tarima matao, pasi bo’onya seja manga’angga i Pue Allah.
3 Pasi tau ri tempo etu taa damamporayang sa’e, pasi bo’onya mangalapa sala nsa’e. Sira damanto’o maja’a sa’e pasi taa damanganta’amaka pamporani ndayanya to maja’a. Sira damaja’a kiranya pasi maja’a nakita anu to matao.
4 Tau etu seja taa maya rasarumaka, pasi taa mampobuuka ruyu, sira mansaka mangika palaong bara kesaa, pasi tau etu mampobuuka sira semo to bae batuanginya pei sa’e. Sira taa damamporayang i Pue Allah, sira ojo damangaluluka yau anu to mampakasanang raya nsira.
5 Pasi tau etu ane ri pangkita nu mata nsa’e, sira mangalulu ada nu agama, pei kamonsonya sira bo’onya mangawaika kuasa i mPue Allah mangawali raya nsira. Wali ne’e masingkatao pei tau to ewa wetu.
6 Apa ri oyo ntau etu, re’e tau to mampotundeka anu to taa monso, tau etu biasa mangantipu tau panewa masua ri raya banua ntau etu. Roo see sira mangakal tau we’a to taa bae karoso ndayanya see tau we’a etu mangaluluka yau anu to napotundeka nsira etu. Tau we’a etu sira masusa mampobuuka dosa nsira to malagi kojo, pasi sira ojo mangaluluka yau pamporani ndaya nsira to mpangayangaya.
7 Wali tau we’a etu sangkani masanang maguru, pei sira tawa kojo mangansani anu to monso.
8 Wali tau to mampotundeka anu to taa monso etu, tau etu tamo matao pampobuuka nsira. Pasi pangaya nsira taa monso wali sira napobo’o i mPue Allah. Sira mangewa anu to monso ewa naika i Yanes sira dua i Yambres mangewa i Musa tempo owi.
9 Pei ewa naika ngkuasa i mPue Allah manganangi tau dua etu ri pangkita ntau boros, ewa see seja damawali resi tau to mampotundeka anu to taa monso. Taa masae sira danangi seja apa kadoyo nsira damanasa resi tau boros.
10 Pei korom masaemo mangalulu aku, wali korom mangansani kojo anu to aku mampotundeka tau. Pasi korom mangansani seja ewa wimba lengko ngkatuwungku, pasi songkangku, pangayangku, kasabarangku, pasi pamporayangku. Pasi korom mangansani seja ewa wimba kuika mampakaroso rayangku mangalulu i Pue tempo mangarata kasesa.
11 Korom mangansani seja ewa wimba aku nasesai ntau pasi mangarata soba, pasi mangkonong samparia to mawali resi aku seore tempo nja’u kota Antiokia, Ikonium pasi Listra. Mapari kojo naika ntau mangansesai aku nja’u kota-kota etu, pei i Pue Allah mampalaes aku yako samparia kasesa to etu.
12 Wali kamonsonya samparia tau to samba’a pei i Kerisitu Yesu, to rani mangika lengko ngkatuwu to singkonong pei i Pue Allah, tau etu darasesai.
13 Pei tau to maja’a pasi to panipu, tau etu kanjo’u-njo’u tiduga-dugang wo’u kaja’anya. Sira mangantipu sa’e pasi sira seja ratipu.
14 Pei ane korom, Timotius, ne’e mandoo mangangkongko anu to korom room rapotundeka pasi to korom mangaya kojo. Korom manasa monso pu’u anu to rapotundeka etu apa korom mangansani sira to mampotundeka korom.
15 Pasi yako dakodiwa korom mangansani anu to ratulis ri raya ntuntu i mPue Allah, etu semo buku to mapasing. Buku to mapasing etu semo to maya mampakanasaka raya ngkita see kita darapalaes apa saba mangaya i Kerisitu Yesu.
16 Wali samparia anu to ratulis ri raya ntuntu i mPue Allah paka yako resi i Pue Allah semo. Ia semo to mangawaika tau pampobuukanya panewa sira mangantulis. Wali samparia tuntu i mPue Allah etu bae batuanginya resi kita, apa kita maya mangampake mampotundeka tau anu to monso, pasi manganseko tau to sala, mampakakonoka lengko to sala pasi mampotundeka tau lengko to singkonong pei i Pue Allah.
17 Wali apa saba kita re’e tuntu i mPue Allah etu, see naka kita to papolaong i mPue Allah rapasilonga damangika samparia palaong to matao. Apa ojo tuntu i mPue semo to kita mangampake mangika palaong to etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA