Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Doba edebeij Lona Sug Ouwedoc gin, kaba, gogom medam eb naugb mamang Krisden toua deit. Hang dan demouwan naugb ban abdoc moc dougwo gin touwero. Doba ban abdoc eiseisan gini terimda.

² Anai se Lona ingga, kaba, lusud leinyana len lemed len gus an ara ara toua deitero. Doba len merdoc gororougb lenin dous. Dangga hang, len lemousa lusud touwero. Doba len lagungun len an meren aremougb dau len terimda. Anai len merdoc etrij icira gin namcirohob. Dara len merdoc emarjaga touwero. Doba len merdoc agas namcir, kaba, len leimiman lenin an meren geicara deseino lusud. Hanoba len lemeigdoumesa lusud gus len meroho touwero. Doba len lowun len meroho toua terimda. Hang len lemaimo merner dara merimir len merir an areg len larougb len an gin touwero. Doba len lohoiya len merir. Dara len lemesijaresa Allah touwero. Doba len merdoc esdigeij en mer an men geicara augwan toua namcir.

³ Dangga len merdoc emeineg an lusud touwero. Doba len merdoc agadgeij an len, hanoba len lemaigdougwo meren aremer. Dara len lemeic gesgigouhwesa dou len touwero. Doba len lecic len meroho gouhw genes dous. Dara len merdoc emagadgeij dau areg gecgu touwero. Doba sug len merdoc etetaha naugb len laimo ara ara aibibrida dag ginohob, kaba, len merdoc oung mogo naugb len leic gogom dou len gus toua terimda. Hang len lemouwan naugb len lemaimo areg geigouhw touwero. Doba len merdoc esdigeij gin namcir.

⁴ Hang maman mamod mamina debsa len an areg len len dou maman touwero. Doba maman mamdoc obsara dau gin namcir. Anai areg len len gin, kaba, augwan dag augwougb dous. Dara len lemed aremeijouhw daum toua habero. Doba sug len leigdoumesa lenin meroho agas naugb augwanohob, kaba, len merdoc agas naugb len laimo areg len louwan augwan toua dedemeda terimda. Dangga len merdoc gororougb Allah touwero. Doba len merdoc gororougb areg eic len merdoc eigouhw dou len se cinogo gin dous.

⁵ Hang len lemouwan naugb Allah men goubesa arautut len aud areg gedag beim touwero. Doba len laimo en an areg geb ainyes gin dous. Sug len leicara dag gin terimda, kaba, ban bemaimo len se meren geicara gin touwero. Doba ban basid banin dau len namcir.

⁶ Ligbum dau len gin, kaba, len ledu len meraga naugb len leinesa lusud gus meren tu aud ligida. Hanoba len lagaigeij len dag meren sogougb ogdoc areg len lebedbed gin dou len toua. Anai ligida gin, kaba, len lemaiyan merdocesem dougwo areg gecgu touebma. Doba len merdoc etrij icira ara ara namcir, kaba, ahwan len aud areg gecgu einyana gin touohob.

⁷ Dangga hang, len louwan naugb lusud gus lens ucina dou len. Dauntoba sesar men gogom emeb naugb len toua deitero, doba ediyebeiya dau len toua. Anai len merdoc ogod len an meren sesar gin terimdohob. Dobnaro. Len lemecinaga Allah men ucina naugb sug en eigdoc len dau sesar men gogom touwero. Doba len meru emaiyero dangga terimda. Anai areg gembala areibahau len lebedbed dou ligida gin, kaba, dag mer areibahau dous.

⁸ Dara len lemaugwohosa ligida gin dousero. Doba gareg en esai mer misen eisaugb Krisdus dou lusud, kaba, len lenara laugbtarera dougwo len merir an mer misen gin toua terimda. Anai len lemaimo ucina se geica gin deitero. Doba len lobsara dau gin namcirohob. Hang eic dag len mersdemaga emesgiraha touwero, doba dag embreij dous. Augwan gini aninim dag Musa sug en esai Allah en moro dou Piraun sug nosa. Anai se lona ingga, kaba, lasud lahwai lan maroho Yanes dara Yambres lan lamenara lamouma debin Musa en mer an areg en esai gin touwero. Doba lan lanara laugbtarera dougwo Piraun mebes an gin toua namcir.

⁹ Dobnaro. Leng areibahau gin, kaba, len lemeicara dag gin an lusud terimda touwero. Anai cum, kaba, lusud lecinaga dag areg len lebedbed gin, kaba, en dau areg len meru edgom an dous. Aninim dag Yanes dara Yambres maran geicara ens ainyes dou lusud dag meren ganusbus augwan, kaba, dag misen touwero. Doba dag len leic naugb laugwohosa lusud dous an gin touohob.

¹⁰ Doba ban, kaba, ban becinaga dau areg dan desai dou lusud, dara indan geicara, dara areg dan decgun dan insira debin naugb dan daimo augwan dag misenohob. Dara banin beiya dag dan demobsara dau Krisdus touwero. Doba dan daimo en dara dan indoc augwan namcir. Dara dan indoc gororougb en dara lusud laugwan touohob.

¹¹ Dara sug lusud leic mog erij dara gogom dou dan, kaba, ban becinaga dag dan demobsara dau gin touwero. Doba dan daiyan indocesem naugb dan daimo gin terimda. Anai ban becinaga dau sug dan desai Mer Geigouhw eisaugb Krisdus dou leng se Antiokia, dara Ikonium, dara Lisdra, kaba, dag len leic gogom medam dou dan, dara len logod dan dag dan dahauwa an touohob. Doba maman Adehsud, kaba, en eigdoc dan dau gogom augwan gini. Hanoba dan indina agau namcir.

¹² Dara ucina mog erij gin, kaba, emeb dou danin dousero. Doba gareg en edag hom dara Krisdusohob, hanoba en ouwan aimo areg Allah arougb en an gin toua terimda, kaba, en toua emaimo ucina mog erij gin dag misen toues.

¹³ Doba leng merug mog dara leng laugwohosa lusud gin, kaba, len lemobsara dau meren geicara gecgu gin touwero. Doba len leicara dangga beiseisaugb terimda. Dangga gini dag len lamaugwohosa lusud gus dousero. Doba len augwohosa lenin toua se ara gecgu namcir.

¹⁴ Doba, Timotius, naugb ban, kaba, ban bemobsara dau mer misen areg lusud lomnomnan dou banohob touwero. Doba ban becgun ban absira debin naugb ban baimo augwan gin terimda. Anai ban bogo augwan gini dag buc gototo se ban abdoc mes sug nosohob. Dara ban becinaga dau leng lesai mer misen gin dou ban, kaba, dag meren geicara, doba edag beim an gin touohob.

¹⁵ Dangga hang, ban abdoc moc dougwo areg len ledidib dau Surad Injil Meb Mohon dou ban sug ban bedag bugdehaba touwero. Doba ban abdoc eiseisan augwan gin toua terimda. Anai areg len log se Surad Injil Meb Mohon ginohob, kaba, eic mou ouforoho dou ban. Hang ban bemecinaga dag gareg en medoc ebdebin an Krisdus Yesusohob, kaba, en emomom touwero. Doba Allah eigdoc en dau sesar men gogom augwan aud maireseb menau geb huhugb gin toua namcir.

¹⁶ Anai areg len log se Surad Injil Meb Mohon gin, kaba, len lemog dau lenin merdoc mes touwero. Doba len log augwan gini aimo dau areg Allah enin eng ens dou len dous. Hang edeinyum naugb astesda dau Allah men lusud maman maimo areg geigouhw augwan dag lusud mos an len gus toua terimda. Anai en mer gin, kaba, eic mou ouforoho dou maman naugb sug maman masai areg se geica dou len. Dara man dougwo len an meren sesar, dara marautut len asa ucina misen, dara mans dau areg asesa Allah enin medoc mes augwan dag misen dou len toua.

¹⁷ (3:16)

2 Timotius

Video 2 Timotius 3

Ikuti Kami:

KONTAK | PARTISIPASI | DONASI