Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'orasi 'ipasa-pasa naga ma Jo'oungu ma Dutu 'awi 'umatioka de ma 'enau 'o nabii-nabii ma ngeluku. Koge'enali mita nginioka 'asa de ma 'ena 'o guru-guru ma ngeluku. 'Ona 'asa yosingosama 'o do-dotoko ma ngeluku gee ma duanguku 'o nyawa yobinasa. De 'ona 'asa yomalawani ma Jouka wopa-pareta gu'una gee wakituusokau. De ge'enau so 'ona yacobou yobinasa.

² Dua manga gudai yamoteke 'o guru-guru ma ngeluku go'ona manga 'ahu, gee manga nyafisuu ma dorou yakiparetano. De 'o guru-guru go'onau manga manarama, so dua 'o nyawa manga gudai 'asa yasela-sela 'o Ngekomo 'Iti-tiai ma Jo'oungu ma Dutuka ge'ena la 'o Habari ma Owa ma ngale ma Kristus.

³ Sababu 'o guru-guru ma ngeluku go'ona yakitopokana, so 'asa nidajarita 'o jarita gee ka 'ona ma sirete yodiaide la yomadamake 'o pipi nginino. Ma manga hukumani 'o do'ingou ma Jo'oungu ma Dutu wadua-duangou ma ngale rekeni yobinasakau.

⁴ 'O sagala mala'ekati 'isowo-sowono mita ma Jo'oungu ma Dutu kowosipidiluwa 'o hukumanioka, so 'ena wa'umuokau 'o narakaka. 'Ena yosingosamokau 'o luwutasa 'itaru-tarusuku dau ma ngale yatahanuku ge'enaka sigado ma 'orasi ma Jo'oungu ma Dutu wahakimi.

⁵ Koge'enali mita 'o dunia ma 'orasi ma sirasi, ma Jo'oungu ma Dutu kowosimadawa 'o hukumanioka. Ma 'orasi ge'ena 'una wodiai 'o ngu'uisi ma amoko 'o nyawa manga singina 'ito-torou manga ngiioka. Ka 'o Nuh de yatumudiingi duga yakisilaha, 'unau wositotara 'o habari ge'ena la 'o 'ahu gee ma Jo'oungu ma Dutu 'awi singina yadae-daene.

⁶ Kaimatero mita de 'o Sodom de 'o Gomora ma kota: Ma Jo'oungu ma Dutu wabinasa de 'o 'uku, la 'imadadi 'o kasinaa dua kokia 'idadi de 'o nyawa gee manga singina 'ito-torou.

⁷ Ma 'o Lot wisilaha, sababu 'una wamoteke ma Jo'oungu ma Dutu wi mau; 'una 'awi singina 'isusa de wosangisara sababu 'o nyawa yoti-tingkai manga di-diai 'itorou.

⁸ 'O nyawa koge'ena-'ena manga sigoronaka 'o Lot 'o nyawa ma owa gu'una wo'ahu 'awi singina ma sirioka, sababu 'o wange 'isinoi-noimi wamake de wo'isene manga di-diai 'ito-torou.

⁹ Ma Jou wa'akunu wakisilaha 'o nyawa gee yamote-moteke 'awi mau nako yakitaili. De ma Jou wa'akunu wakitahanuku 'o nyawa manga singina 'ito-torou ma ngale dua yakisikisaa gee wakilega ma diai ma wangeka,

¹⁰ 'ifoloiosi gee yamote-moteke manga nyafisuu 'ito-torou de gee yositi-tingoono ma Jo'oungu ma Dutu 'awi kuasa. 'O guru-guru ma ngeluku go'ona manga moroinoka de manga gedengoka, sigado 'ona kayomoroini yositi-tingoono ngaro 'o do-dadi 'iku-kumati.

¹¹ 'Ena 'o sagala mala'ekati gee 'ifoloiosi 'ikuata de 'ikuasa de gee 'o guru-guru ma ngeluku go'ona, ma koyakalakiwa 'o do-dadi 'iku-kumati ge'ena de 'o demo-demo 'isiti-tingoono ma Jou wi bionoka.

¹² Ma 'o guru-guru ma ngeluku go'ona posironga de yotabaeluoka! 'Ona koyomatibanguwa so duga kayamoteke manga singina ma mau. 'Ona 'isoka 'o haewani 'iti-tingkai gee koimasidongoowa dua 'okia 'idadi so yatagoko de yato'omaka. So 'ona yangelo gee koyasahe-sahewa de manga demo-demo gee yositi-tingoono. Sababu ge'ena de to 'ona ma sirete manga di-diai, 'ona 'asa yobinasa 'isoka 'o haewani 'iti-tingkai.

¹³ To 'ona manga hukumani de manga sikisaa ma sababu to 'ona ma sirete manga di-diai, so 'ona 'asa yosangisara. 'Ona manga du-duaka yodiai 'okia naga bato ge'ena ka 'o wangeka ma kayodiaiou, ma ngale yosisanangi manga roese ma du-duaka. Gee ngini nimasidogogeruku nimasido'odomo de de 'ona 'o rameka, ge'ena to 'ona manga jako 'ina'emono de poda-damaeke sababu manga nyafisuu ma dorou yosigeto-geto.

¹⁴ 'Ona koyakikiwounuwa 'o sowono yodiai, de manga ako 'ikudai. De 'o nyawa gee 'asa kaikurue yongaku ma Kristusika de gee koyasahewasi rekeni, yakikadiai la yakidomoteke 'onaka. 'Ona manga singinaka yabiasakau 'o dopokana, 'ona ge'ena 'o nyawa gee yoko-korosau!

¹⁵ Sababu 'ona yooluku yamoteke 'o ngekomo 'ibo-boooto, so ma rai yoliba. 'Ona yamoteke 'o ngekomo gee ma sira 'o Bileam 'o Beor wi ngowaka waboa-boa. 'O Bileam 'una woduaka ma sala 'o pipi womadamake ma ngekomo wi di-diai 'ito-torou.

¹⁶ Ma 'una 'o da-dawanono 'ikua-kuata wamake sababu 'awi di-diai 'ito-torou ge'ena, ma 'orasi 'awi keledai 'ibicara 'isoka 'o nyawa. So 'o nabii gu'una wisuloko wamada wi di-diai 'ito-torou ge'ena.

¹⁷ 'O guru-guru ma ngeluku 'ona ge'ena manga faedaa koi'iwa 'isoka 'o 'akere gee ma utu kaitado-tadono de 'isoka 'o lobi gee 'o rato yadaene. Ma Jo'oungu ma Dutu wadua-duangou to 'ona manga ngii moi posironga 'itarusoka.

¹⁸ 'Ona yobicara de 'o demo 'ikuru-kurutie de kayosiso-somoa; 'ona de manga nyafisuu 'ito-torou yakisi'asa 'o nyawa gee 'asa kayamada manga 'ahu koiti-tiaiwa.

¹⁹ 'O guru-guru ma ngeluku go'ona yosijaji 'onaka dua koyoyongosuawau, 'ena momongo 'ona ma sirete yoyongosika 'o dorouka. Sababu nako 'o nyawa 'o kianikia yakisikala, ge'enau yakisiyongosi.

²⁰ 'O nyawa gee winako-nako ma Yesus Kristus nanga Jou de nanga laha ma titi, koyakiparetanowau 'o sowono ma kuasa gee 'o nyawa yakisimedi-mediri. Ma nako yodomotekoli so yakipareta 'o sowono ma kuasa ge'ena, 'o nyawa go'ona manga jako 'ifoloiosi 'itorou de ma sira ma.

²¹ 'Ifoloi yaowa 'o nyawa koge'ena koma'iwa yanako 'o ngekomo 'ibo-boooto ma Jo'oungu ma Dutuno, la 'uwa gee ngaro yanakokau ma dua yooluku yamoteke 'o besesongo gee ma Jo'oungu ma Dutu wakikula-kulaka.

²² 'Okia naga gee 'ona yadiai, 'isinyata 'ato 'itiai 'o dolabololo naneda, "'O kaso dua ya'odomoli 'okia naga gee yosinguna-ngunanie," de "'O titi gee ya'osikokau, 'asa 'imagawali."

2 Petrus

Video 2 Petrus 2

Ikuti Kami:

KONTAK | PARTISIPASI | DONASI