Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ewa wetu mangkonong to pantuntu tuntu i mPue Allah tempo owi. Pei tempo owi etu, re’e seja to pantuntu tuntu to taa monso. Pasi ewa see seja tempo si’i, apa re’e seja tau to damasuwu ri oyo ngkomi to damampoanika mampotunde tuntu i mPue Allah, pei kamonsonya sira to panipu. Apa tempo sira damampotundeka komi, sira damangagaloka seja anu to taa monso to ojo damampakaja’a pangaya ngkomi. Pasi sakowa i Yesu to roomo mangoli yau sira see sira maya mawali Ia Puenya, sira manganto’o Ia si’a Pue. Wali see naka sira kodi majoli damangarata huku saba yako sala nsira semo. Pei tempo sira tiroowa mampotunde, boros tau to mangalulu lengko nsira to masipato rapokea. Wali apa saba palaong to naika ntau etu, see naka sa’e damanganto’o maja’a jaya to monso.
2 (2:1)
3 Wali tau to mampotunde anu to taa monso etu, sira rani kojo sugi. See naka sira damanganto’o gombo to mawuti damangamomis komi see komi damangawaika sira doi. Pei tamo masae sira darahuku. Apa masaemo i Pue Allah, to Pobotus nsira, Ia mangansani sala nsira etu pasi Ia mangansani seja ewa wimba Ia mangangika damangahuku sira. Wali huku to etu tamo masae dakonomo sira.
4 Wali kita manasa resi kita, sira matantu darahuku apa sakowa pomakau-pomakau i mPue Allah ndate saruga, sira to nangika dosa tempo owi, sira taa raporayang. Sira napanasoka yau i mPue Allah lo’u lipu ntau mate. Wali sira rapunguka rante pasi maroo-roo ri tampa to mawuri la’u ria mangampeas temponya darapangabotus.
5 Pasi tau to maja’a to tuwu tempo i Nuh tempo owi, sira taa seja raporayang. Apa i Pue Allah mangika samal ue to mangalodong yau samparia to lino to bo’onya mampolaika Ia. Wali ojo i Nuh sira wayu to napalaes i mPue Allah yako ri samal ue etu. I Nuh etu, ia semo to nampakarebaka resi sa’e mangkonong anu to singkonong pei i Pue Allah.
6 Wali yako etu tau to maroo ri kota Sodom pasi kota Gomora, sira mangarata seja huku to mapari kojo. Apa i Pue Allah nantunju yau Sodom pasi Gomora etu wali jamo awu to nja’u kota etu. Wali palaong to etu mawali tondong mangkonong huku to danarata nto lino to taa mampalaika i Pue Allah.
7 Pei i Lot napalaes i mPue Allah tempo etu apa ia tau to lengkonya singkonong pei i Pue Allah. Pasi ia masusa rayanya mangkita lengko ngkatuwu to masipato rapokea to naika ntau to maja’a nja’u lipu etu.
8 Apa ia maroo ri oyo ntau to maja’a etu, wali ia sangkani masusa rayanya. Apa ia tau to rayanya singkonong pei i Pue Allah, pei ponto-ponto eo ia re’e mangandonge gombo nsira pasi mangangkita palaong nsira to mangewa pamporani i mPue Allah.
9 Wali samparia palaong to nawali tempo owi etu mawali tondong to mampakanasaka kita i Pue Allah mangansani ewa wimba daraika mangampalaes tau to singkonong pei Ia yako ri soba to narata nsira. Pasi Ia mangansani seja ewa wimba daraika mangansabaraka tau to taa singkonong pei Ia damangampeas temponya sira darahuku ane ratamo eonya sira darapangabotus.
10 Wali samparia tau to maja’a lengkonya darahuku, taa manto’o tau to mangika lengko ngkatuwu to ojo mangaluluka yau pamporani ngkoro nsira to makarika, pasi tau to taa manga’angga i Pue anu bae kayawaNya. Wali tau to mampotunde anu to taa monso, sira makoje pasi mangei. Pasi sira taa meka manganto’o maja’a tau to bose pangkanya.
11 Wali makoje kojo sira etu, apa sakowa pomakau i mPue Allah ndate saruga tare to manto’o maja’a tau to bose pangkanya etu ri tango i mPue Allah. Pomakau i mPue Allah etu, sira to roso-roso pei tau to mampotunde to taa monso etu pei sira taa rani manto’o maja’a tau etu ri tango i mPue Allah.
12 Pei tau to mampotunde anu to taa monso etu, sira ojo manganto’o maja’a anu to taa nansani nsira. Sira maya raporapaka ewa binatang, apa binatang taa pande kojo mampobuuka, pei ojo mangaluluka anu to nansani yami nsira. Wali naka pei binatang etu rapoanaka see maya darasoko pasi darasimbale yau. Pasi ewa see seja tau to mampotunde anu to taa monso, apa sira maja’a lengkonya, see naka sira darapakaja’aka yau.
13 Pasi sira damangarata huku to singkonong kojo pei lengko nsira to maja’a etu. Huku etu rato’oka ntanapanya. Apa palaong to mampakasanang sira, etu semo mangika roa-roa to marotai kojo. Pei si’a ojo raya mburi napongika nsira. Pasiwa bae eo seja! Pasi sira masanang kojo mangantipu komi. Pasi tempo komi mangkoni sindarandara mangendo kapate i mPue Yesu, tempo etu sira ojo mangika ngkewanya apa sira kayangu pasi bae kojo mangkoni. Wali palaong etu masipato rapokea. Pasi lengko nsira etu maya raporapaka ewa anu to mampakarintangika baju.
14 Sira sangkani rani masala ane mangalo’aka tau we’a. Pasi sira tare pandoonya mangika dosa. Sira mangakal tau to taa maroso pangayanya. Pasi raya nsira sangkani mamporani anu nsa’e. Wali sira natanaa yau i mPue Allah.
15 Wali tau to mampotunde anu to taa monso etu, sira roomo mampiyaika yau jaya to kono panewa mangalulu yau jaya to taa monso. Wali anu to nalulu nsira, etu semo palaong to naika i Bileam, ana i Beor tempo owi. Dosa i Bileam ewa si’i, ia masanang mangika palaong to maja’a ane rawaika doi.
16 Pei i Bileam naseko ngkeledai! Kamonsonya keledai etu ojo keledai to biasa. Pei yako kuasa i mPue Allah, see naka keledai etu magombo ewa tau pei manganseko i Bileam apa saba palaong to maja’a to inikanya. Wali see naka i Bileam mandoo yau mangika palaong to ewa palaong ntau to bea etu. Pei nempo ewa wetu, tau to mampotundeka anu to taa monso, sira tiroowa mangalulu lengko i Bileam to ruyu etu.
17 Wali tau to mampotunde anu to taa monso etu, sira ewa mata nue to otim. Pasi sira ewa limu to roomo natawuis yau nu ngoyu. Apa gombo nsira tabaro kojo pei kamonsonya tare batuanginya. Wali gombo nsira etu mangakal tau to owo roo maga’a yako resi yununya to mangika lengko ngkatuwu to sala. Apa sira manganto’oka tau to owo room mampoga’aka yununya etu, manganto’o, “Taa mawei nempo mangaluluka yau pamporani ngkoro to maja’a pasi mangika palaong to masipato rapokea.” Pasi sira manganto’o, “Ane komi mangalulu jaya mami, nempo tamo mampalaika i Pue Allah, taa mawei.” Wali ewa wetu nato’o nsira. Pei kamonsonya tau to manganto’o gombo to etu sira semo to ewa watua. Apa sira nakuasang nu lengko to mampakaja’aka sira. Wali nempo bara kesaa to mangkuasang tau, etu semo to mampowatua ia. Wali lipu to mawuri kiji roomo napasigenaka i mPue Allah sira, pasi sira damaroo ri lipu to mawuri kiji etu rataka ri singkasaenya.
18 (2:17)
19 (2:17)
20 Pei tau to mangansani i Yesu Kerisitu, Pue ngkita pasi to Pansompo ngkita, tau etu tilapamo yako ri lengko ngkatuwu nto lino. Apa lengko ngkatuwu to etu mampakaja’a yau tau to mampolengkoka. Pei ane tau to tilapamo pei roo see mangika muni lengko to ewa wetu, tau etu raporapaka ewa binatang to ra’akal apa ia tamo maya miyai wo’u. Wali apa ewa see, see naka katuwunya to purinya, etu semo to ja’a-ja’a pei katuwunya tempo ruyu, tempo ia tawa mangansani i Yesu Kerisitu.
21 Wali to tao-tao ane tau etu taware mangandonge mangkonong lengko ngkatuwu to singkonong pei i Pue Allah, sakowa to mangandongemo panewa mangandolika tango nsira yako ri lengko to etu. Apa ane sira mangika ewa wetu, batuanginya sira mangandolika tango nsira yako porenta i mPue Allah to roomo raporata resi sira.
22 Wali palaong to naika nsira etu singkonong kojo pei ligi to manganto’o, “Anu to nalua yau nu asu, roo see nakoni muni nu asu etu.” Pasi re’e wo’u ligi to manganto’o, “Wawu to roomo nariu ntau, wawu etu ojo mawolili muni pei matomba ri raya nggege.” Wali ligi to etu singkonong kojo pei tau to mawolili muni ri lengko to maja’a to roomo napiyaika nsira.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA