Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Atun inan nabi-nabi luk mebalih rat arang pupu ini, kudeng ineh teh tuda'-tuda' guru luk mebalih miak tumui rat arang muyuh. Ideh miak nguit bada' luk mebalih idi luk ngeraruh. Lemulun ineh ngalum Tuhan luk pangeh nenguli' nedeh, idi ngacing até kuan bururdeh sebuleng dengan mesaget.
2 Mula' lemulun miak maya' kekamendeh luk melutak, idi dalan luk matu ruen lemulun nguyo ngaceku ideh.
3 Dengan lilideh ideh miak nakap tabpar rat nemuyuh dengan bala luk naluk. Iamo' ngaceku kekamendeh ineh, rat mon ukum pangeh tinina' kuandeh, idi atédeh na miak uen ngiuk.
4 Allah na méi' kuan melaikat-melaikat luk nenganau' sala', luk tila'Neh bang apui idi kiling bang lubang luk medacem pad Ieh ngacing ukum kuandeh.
5 Ieh na méi' kuan lemulun bang kareb luk mon, iamo' Noh luk nemada' luk matu ineh, isa'Neh dengan tudu' burur lemulun kareb Ieh ngacing ereb kuan uang tana' ini luk na manu;
6 idi bawang Sodom idi Gemora ineh inukumNeh dengan até idi isebNeh pad mangun ku abuh, idi nenganau' neneh mangun ku luk pinginud kuan amung-amung lemulun luk sikal mulun dengan na sembayang.
7 Ieh nemuit ni Lut, seburur lemulun luk matu ineh, luk mesusa' niat ku ulun lemulun luk melutak idi luk dat ineh.
8 Lemulun luk matu ineh tudo arangdeh, idi anid-anid aco ieh nenier idi neninger luk dat pad ieh pelaba susa' niat ngaceku kekamendeh luk dat ineh.
9 Kudeng ineh teh Tuhan luk meluun kali' kudeng apeh muit lun manu ratnan tutun luk macing nedeh, idi kudeng apeh ngata lemulun luk dat pad macing Aco Ngukum, pad Ieh ngedereh nedeh,
10 meluun teh lemulun luk maya' pinian bururdeh luk melutak, idi ngebeneh lalud Allah. Idi guru-guru luk mebalih ineh mekuu' idi medita' niat, idi na matot nguyo amung-amung pudut luk rayeh déi' surga.
11 Melaikat-melaikat pana' luk meluun tueh idi meluun lalud ratnan guru-guru luk mebalih ineh, na ideh nguyo nedeh pa kiung Tuhan.
12 Iamo' lemulun ini mepad kudeng aceh pudut luk na ileh, idi mepad kudeng ulun pung luk uen nganup idi pitayen. Ideh nguyo amung-amung luk na kali'deh. Idi ideh miak pitayen.
13 Ideh ngalap tabpar dereh ngaceku ideh nengedereh nelun baken. Idi rotdeh luk dat luk ngacing awang kuandeh, ruendeh kareb macang, ieh ineh anun-anun luk maya' pinian burur. Ideh mangun ku aceh luk inan migu' kareb ideh pamung kuman dengan muyuh. Idi ideh ngeraruh nemuyuh dengan salukdeh bang irau ineh.
14 Ideh pian nier decur luk mesawa'. Ideh na sikal ugka' ratnan sala'. Ideh nguit lemulun luk melaya' anu semuet bang abpung, idi niatdeh pekalai bang lili. Ideh pa liang kediman Allah.
15 Ideh nenecan dalan luk mesiri, idi maya' luk meraruh. Ideh maya' dalan Bilam Bior luk geregan ku tabpar kekamen luk dat;
16 iamo' ieh sinala' ngaceku sala'neh. Keladai luk mebegkeh ineh pana' nepebala dengan tang lemulun, idi ieh nengagka' ruden nabi ineh.
17 Lemulun ineh mepad kudeng bued abpa' luk nekeket idi laput luk pinalid ku bui. Idi dacem luk pingot-pingot pangeh tinina' Allah kuandeh.
18 Ideh ngerayeh bururdeh dengan bala luk mo'-mo', idi dengan kekamen pinian burur luk melutak, ideh ngubuk lemulun luk ngimun buro ratnan lemulun luk neraruh ineh.
19 Ideh pejani' maré puit kuandeh, iamo' ideh sebuleng mangun ku demulun kuan luk maté. Ngaceku tau lemulun mangun ku demulun kuan anun-anun luk miak ngelaya' netau.
20 Kudeng muci ratnan lemulun nepuit ratnan lutak tana' ini ngaceku miti Tuhan Yésus Keristus, Lun Nengulun, idi ideh lemubed teh mepabpung bang amung-amung luk kudeng ineh, pad uen ngelaya', kekiped lemulun ineh meluun dat ratnan luk pun-pun.
21 Meluun do' kuandeh kudeng ideh na ngiti dalan luk matu rat pun-pun, ratnan ideh nengiti ineh idi lumi ratnan ukum luk meligan luk pangeh biré kuandeh.
22 Idi pangeh mangun kuandeh ineh mepad kudeng luk pinginud ineh luk matu, ieh ineh uko' lemubed nila' uta'neh, idi barek luk pangeh diniu' lemubed silusu' bang lisuen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA