Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tempo nggaulu naria *nabi-nabi mpodava neumba ri tatanga ntodea nu Alatala. Bo ivesia muni sii-sii, guru-guru mpodava meumba ri tatangamiu. Rakenira pepatuduki nasala anu mompakagero pomparasaya ntona, bo rasapura i Kristus Tupura anu nombakabasaka ira lako ri kuasa nu dosara. Poviara mboto sampe ira rahuku masalisa.

² Nadea tona mompasiala pokainggu nu guru-guru gahaitu anu nangoseaka dota nu rarara nadaa. Bo pepatuduki nakana rasalai ntona sabana pokainggura haitu.

³ Guru-guru mpodava haitu nadoko doi. Haitu sampe ira aga mangelo untu lako nte komiu ante tesa-tesa ledo nakana, anu nikarara mboto. Tapi pehuku ka ira nasaemo nipakatantu. Ira rahuku nu Alatala bo tempona ledo rasoro-soro.

⁴ Toramo! Alatala ledo nombakabasaka *malaeka-malaekaNa mboto lako ri pehuku tempo ira novia dosa, tapi ninavusakaNa ira riara *narakaa. Ira nisuaraka riara bolo nalanda bo nirante hamai mompopea tempona ira rahuku ri Eo Potangara bara maipia.

⁵ Ivesia muni tempo Nabi Nuh. Alatala ledo nombakabasaka isi dunia nggaulu lako ri pehuku tempo nipakaropuNa ante uve oge sampe namate puramo tona ledo nangoseaka dotaNa. Aga i Nuh sambanua, haitumo aga ira uvalu nipakasalama sabana i Nuh nompatolele ka todea ira kana mokainggu mabelo bo mangoseaka dota nu Alatala.

⁶ Ivesia muni ante ngata Sodom bo Gomora. Alatala nombahuku tupu ngata nadaa haitu ante nompalabu ngatara. Haitu najadi pepatora ka tona ri puri anu ledo nangoseaka dota nu Alatala.

⁷ Tapi i Lot nipakasalamaNa lako ri pehuku haitu sabana ia tona nabelo. Nasusa mpuu rarana nanggita pokainggu nabuga bo naruto nipovia ntona nadaa haitu.

⁸ Apa i Lot haitu tona nabelo. Ia nonturo ri tatangara bo eo-eo nikitana bo niepena poviara nadaa sampe nandasa mpuumo rarana.

⁹ Jadi lako ri tesa pangane, nisanita Alatala nompakule mompakasalama topangoseaka dotaNa tempo ira manggava pesori. Bo nipakuleNa muni mombatavani tona nadaa sampe ira rahuku ri Eo Potangara.

¹⁰ Tona rahukuNa ivesia, nelabipa tona natuvu nangoseaka dota rarara nadaa bo nabuga, bo tona nanjapuaka kuasa nu Alatala momparenta ira. Guru-guru mpodava haitu nabia mpuu bo nalanga rarara. Ledo naeka ira nanjalai malaeka-malaeka anu nipokumaaka.

¹¹ Malaeka-malaeka nu Alatala narosopa bo nakuasapa pade guru-guru mpodava haitu. Tapi naupa ivesia, malaeka-malaeka haitu ledo nanjalai malaeka-malaeka nadaa ri ngayo nu Alatala ante tesa nadaa.

¹² Tapi guru-guru mpodava haitu nanjalai nuapa-nuapa ledo nisanira. Ira nasimbayu nte binata nasoa, anu aga nipoanaka rasaka bo rapatesi. Ira ledo nompekiri, aga natuvu nangoseaka dota-dota anu naria nte ira. Jadi lako ri pokainggura nadaa haitu, guru-guru mpodava kana rapakaropu nasimbayu nte binata-binata nasoa.

¹³ Ira rabalasi ante kasusa sabana nipakasusara tona ntanina. Nau eona, nadamba guru-guru mpodava novia mpengaya-ngaya nompakaosa dotara nadaa. Ira nangande nosanggani nte komiu mpo tona nabelo, tano pokainggura mpuu-mpuu nepakaeya! Ira aga nadamba nompebasa nangoseaka dota rarara nadaa.

¹⁴ Ira bate-batena naino mompogau sambara mombine nikitara. Ledo nabasa-basa ira novia dosa! Ira nombaopa tona ledo naroso pomparasayana ala movia dosa. Bo najadi kabiasara nario mata ante ledo ria kabasa-basana. Ira mpuu-mpuu tona nasurukavu!

¹⁵ Nipalaisiramo dala nakana bo nasalandalamo ira. Nipasialara pokainggu i Bileam ana i Beor nggaulu. Ia aga naino ka doi rakavana lako ri poviana nadaa.

¹⁶ Keledai nipesavi i Bileam aga binata anu ledo notesa. Tapi Alatala nombadekei kuasa ka keledai haitu notesa ante suara manusia, bo keledai haitu nangonteaka i Bileam, nabi nadoyo. Jadipa domo nipapola i Bileam niana nadaa haitu.

¹⁷ Guru-guru mpodava haitu nasimbayu mpo mata nu uve naotimo. Ira nasimbayu mpo kulimu vuri aga niburu mpoiri narimboso. Alatala nompakasadia ponturo nalanda mpirika ka ira.

¹⁸ Apa ira nombasovadaka ante nalanga rara, tapi tesa-tesara ledo ria gunana. Ante tesara niopara tona dako nenonto novega nte roara nadaa pokainggura. Tona haitu niopara ante nompadidisi dota rarara nadaa ala raoseakara mpanjili pokainggu nadaa anu dako nikabasakara.

¹⁹ Guru-guru haitu nojanji ivei: "Ane raoseakamiu pepatuduki kami, komiu makabasaka lako ri atura-atura! Komiu mamala movia nuapa-nuapa rapodotamiu." Tapi nau niulira makabasaka, ira mboto nikuasai pokainggu-pokainggu anu nompakarugi manusia. Apa tona nidagi dota rarana nadaa, batuana ia nipobatua dota rarana haitu.

²⁰ Mandasa mpuumo ira! Apa bara ipia ira mpuu-mpuu nosisani nte Tuputa Yesus, Topompakasalama kita, sampe ira nikabasakamo lako ri pokainggu nadaa anu nompakagero manusia ri dunia hitu. Tapi naupu sia, ira nipemala bo nikuasai nu pokainggu-pokainggu nadaa haitu mpanjili. Kaupuna, nelabipa kandasa katuvura pade ri pamulana.

²¹ Aginapa ledo sanggania rasanira dala nakana, pade rasanira bo maupu sia aga rakabasakara parenta-parenta nu Alatala nipatolele ka ira.

²² Anu najadi nte ira nasimbayu nte porapa nanguli ivei: "Asu nekubu, nikandena mpanjili," bo "Bavu dako nandiu notampo mpanjili ri gege."

2 Petrus

Video 2 Petrus 2

Ikuti Kami:

KONTAK | PARTISIPASI | DONASI