Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu saq laẽq lẽq antare dengan-dengan saq tehususang bagi Allah sampun araq nabi-nabi palsu. Maraq nike ẽndah lẽq antare side gen dateng guru-guru palsu. Ie pade gen ngajahang pengajahan-pengajahan sesat, saq binaseang dengan. Dait ie pade gen tilas Penguase saq sampun nebus ie pade. Siq care nike ie pade datengang kebinasean tipaq diriqne mẽsaq, saq selung-selung nimpe ie pade.

² Timaqne maraq nike, luwẽq dengan gen turut care idup guru-guru palsu nike, saq tekuasein siq hawe napsu ie pade. Dait perbuatan guru-guru nike gen miaq luwẽq dengan menghine care idup saq tekayunang siq Allah.

³ Sẽngaq ie pade serakah, make guru-guru palsu nike gen nyeriteang lẽq side pade cerite-cerite saq tekarang mẽsaq jari mauq keuntungan lẽman side pade. Laguq hukuman tipaq ie pade sampun ngonẽq tesiepang, dait kebinasean saq sampun tetentuang umaq ie pade ndẽq gen teundur malik.

⁴ Malaẽkat-malaẽkat saq bedose ẽndah ndẽq tebẽbasang lẽman hukuman siq Allah, laguq tetetẽh ojok dalem api nerake, ie pade tetamaq ojok dalem jurang saq peteng, jari tetahen lẽq derike jangke jelo penghakiman.

⁵ Maraq nike ẽndah dunie lẽq jaman laẽq, Allah nẽnten menengang ie pade lepas lẽman hukuman. Allah datengang belabur belẽq tipaq dunie dengan-dengan saq jahat lẽq waktu nike. Cume Nuh, dengan saq nyampẽang kebenaran nike saq teselametang, bareng kance pituq dengan lainne.

⁶ Pade ẽndah maraq kote Sodom dait Gomora: Allah musnahang kote-kote nike siq api adẽqne jari sopoq peringetan saq nakutang umaq selapuq dengan saq ndẽq kenal kance Allah.

⁷ Laguq Ie nyelametang Lot, dengan saq solẽh nike, saq menderite gati siq kelakuan dengan saq idupne turut hawe napsu lantaran ndẽq taat lẽq hukum Allah.

⁸ Lẽq tengaq dengan-dengan saq maraq nike, Lot saq solẽh nike idup menderite batin, sẽngaq sebilang jelo serioq dait dengah perbuatan-perbuatan ie pade saq jahat.

⁹ Jari, Tuhan wikan berembẽ entane nyelametang dengan-dengan saq solẽh lamun ie pade mauq cobe. Dait Tuhan wikan berembẽ entane nahen dengan-dengan saq jahat adẽqne tesiksaq lẽq jelo penghakiman,

¹⁰ terutame dengan-dengan saq turut kemẽlẽq-kemẽlẽq hawe napsu ie pade saq kotor dait saq menghine kekuasean Allah. Bani gati dait sombongne guru-guru palsu nike sehingge ie pade ndẽq takut-takut menghine hal-hal saq mulie.

¹¹ Malaẽkat-malaẽkat saq jaoq kuatan dait bekuase ketimbang guru-guru palsu nike, ndẽq bani nuduh ie pade siq ucapan-ucapan saq menghine lẽq arepan Tuhan.

¹² Laguq guru-guru nike, ie pade maraq binatang saq ndẽq bedowẽ akal, saq teanakang cume jari tebau dait tematẽq doang. Ie pade menghine hal-hal saq ndẽq ie pade taoq. Lantaran perbuatanne nike, ie pade gen tebinaseang maraq binatang-binatang gamang.

¹³ Jari balesan penderitean saq ie pade piaq, ie pade gen menderite sengsare. Bagi ie pade hal saq nyenengang atẽ nike, ngelaksaneang napi juaq lẽq kenjelo jari muasang kemẽlẽq awakne. Ie pade maraq dedoro dait cele, saq bowos siq hawe napsu ie pade lamun ie pade tokol bekelor dait nginem bareng-bareng kance side pade.

¹⁴ Ie pade ndẽq pendaq-pendaq piaq dose, mate ie pade penoq siq napsu zinah. Dait ie pade nipu dengan-dengan saq ndẽq kuat imanne. Atẽ ie pade sampun biase siq keserakahan. Ie pade dengan-dengan saq tekutuk.

¹⁵ Sẽngaq ie pade ndẽq mẽlẽ turut langan saq kenaq, make ie pade jari sesat. Ie pade turut langan saq laẽq teliwatin siq Bileam, bije Beor, saq melẽt gati mauq kẽpẽng lẽman perbuatanne saq jahat.

¹⁶ Laguq ie mauq peringetan saq keras lẽq kejahatanne nike, sewaktu bagalne ngeraos kadu base manusie. Make nabi nike tepaksaq adẽqne engkah ngelaksaneang perbuatanne saq jogang nike.

¹⁷ Guru-guru palsu nike maraq embulan aiq saq gero dait maraq awun-awun saq tetiup siq angin pusut. Allah sampun nyedieang umaq ie pade sopoq taoq saq peteng dedet.

¹⁸ Ie pade ngucapang ucapan-ucapan saq sombong dait ndẽq araq isine dait kadu hawe napsu saq cabul jari jauq tulak dengan-dengan saq baruq ngelepasang diriq lẽman dengan-dengan saq idupne sesat.

¹⁹ Guru-guru palsu nike janjiqang kemerdẽkean tipaq dengan-dengan nike, laguq ie mẽsaq tejariang panjak siq kebiasean-kebiasean saq nyẽdaq manusie. Sẽngaq lamun dengan tekalahang siq sopoq hal, make ie hambe lẽman saq ngalahang ie nike.

²⁰ Dengan saq kenal kance Tuhan dait Juruselamette Deside Isa Almasih, ie pade sampun lepas lẽman kuase-kuase dunie saq miaq manusie najis. Laguq lamun sesampun nike ie tejeret malik sehingge tekalahang siq kuase-kuase nike, make keadaan dengan nike lẽq penutuqne lengẽan malik tebanding waktu sendẽqmanne.

²¹ Bagusan dengan-dengan saq maraq nike ndẽq uwah kenal care idup saq tekayunang siq Allah, ketimbang ie pade kenal, laguq sesampun nike ndẽq mẽlẽ turut prẽntah-prẽntah suci saq teicanin tipaq ie pade.

²² Napi saq ie pade laksaneang pade maraq pepatah niki, "Acong gen ngaken malik napi saq uwah ie utaqang", dait, "Bawi saq uwah tepandiqang, gen begoloq malik lẽq dalem reraok."

2 Petrus

Video 2 Petrus 2

Ikuti Kami:

KONTAK | PARTISIPASI | DONASI