Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pada masa tumbai di hantara umat-Ni Allah radu muncul nabi-nabi palsu. Reno juga di hantaramu haga muncul guru-guru palsu. Tian haga ngurukko ajaran-ajaran sai mak benor sai ngebinasako jelma. Rik tian haga menyangkal Jelma Sai Bekuasa sai radu ngebebasko tian. Jama injuk reno tian ngeratongko kebinasaan atas dirini tenggalan, sai haga geluk nimpa tian.

² Walaupun injuk reno lamon jelma haga nutuk cara hurik guru-guru palsu udi sai dikuasai ulih hawa nafsu tian. Rik perbuatan guru-guru udi haga nyani lamon jelma ngehina Jalan Benor sai nuju jama Allah.

³ Mani tian serakah, maka guru-guru palsu udi haga nyeritako jama niku cerita-cerita sai dikarang tenggalan untuk dapok untung jak keti. Kidang pengadilan untuk ngejatuhko hukuman mik atas tian radu saka disiapko, rik kebinasaan sai radu ditantuko untuk tian sedang nunggu tian.

⁴ Malaikat-malaikat sai bedusa pun mak Allah taganko lepas jak hukuman, melainko ditokko mik delom neraka. Tian dikurukko mik delom rulah sai kelam untuk ditahan di disan sampai Rani Pengadilan.

⁵ Injuk reno muneh jama dunia di zaman tumbai, Allah mak naganko lepas jak hukuman. Allah ngirim banjer balak mik dunia jelma-jelma sai jahat pada waktu seno. Angkah Nuh jejama jama pitu jelma barehni gaoh sai diselamatko, mani Nuh nyiarko kabar tentang hurik sai bekenan di hati-Ni Allah.

⁶ Gegoh juga halni jama kota Sodom rik Gomora: Allah memusnahko kota-kota ano jama apui in jadi cuntoh tentang api sai haga tejadi jama jelma-jelma sai jahat.

⁷ Kidang Lot diselamatko, mani ia nutuk kehaga-Ni Allah; ia menderita nihan mani kelakuan sai mak benor jak jelma-jelma bejat.

⁸ Di tengah-tengah jelma-jelma injuk reno udi Lot sai betik udi hurik jama hati tesiksa, mani unggal rani ia ngeliak rik ngedengi perbuatan-perbuatan tian sai jahat.

⁹ Jadi, Tuhan pandai injuk repa nyelamatko jelma-jelma sai nutuk kehaga-Ni kik tian ngehadapi cubaan-cubaan. Rik Tuhan pandai injuk repa nyegokko jelma-jelma sai jahat untuk disiksa pada Rani Pengadilan,

¹⁰ khususni jelma-jelma sai nutuk kemirakan-kemirakan hawa nafsu tian sai kamak rik sai ngehina kekuasaan-Ni Allah. Reno bani rik pungahni guru-guru palsu udi sehingga tian mak segan-segan ngehina makhluk sai mulia di surga pun!

¹¹ Sedang malaikat-malaikat sai jaoh lebih kuat rik bekuasa jak guru-guru palsu udi, mak nuduh para makhluk sai mulia udi jama cawa-cawa sai ngehina di hadap Tuhan.

¹² Kidang guru-guru udi, bukan main! Tian injuk binatang sai laher untuk ditangkok rik dibunuh gaoh. Tian mak bepiker, kidang angkah betindak nutuk naluri gaoh, sehingga tian nyerang hal-hal sai mak ia ngerti jama ucapan-ucapan sai ngehina. Ulihni seno ulih perbuatan-perbuatan tian tenggalan, tian haga binasa injuk binatang-binatang buas.

¹³ Sebagai ganjaran atas penderitaan sai radu tian sebabko, tian haga menderita sengsara. Bagi tian, hal sai nyenangko hati iado ngelakuko api gaoh di rani dawah guna ngemuasko kehagani badan tian. Kik tian mejong jejama keti delom pesta mengan, sikap tian nyani muak mani tian mabuk jama hawa nafsu.

¹⁴ Tian mak meleju-leju bebuat dusa, rik kegeringan tian iado ngeliak bebai hajor. Rik jelma sai ampai percaya rik masih kurang yakin tian pikat. Hati tian radu biasa jama keserakahan. Tian anodo jelma-jelma sai tekutuk.

¹⁵ Mani tian mak haga nutuk jalan sai lurus, maka tian sesek. Tian ngakuk renglaya sai ditutuk ulih Bileam anak Beor tumbai. Bileam inji mirak nihan mansa duit jak perbuatan sai jahat.

¹⁶ Kidang ia mansa peringatan sai keras tehadap kejahatan udi, waktu keledaini cawa jama suarani manusia. Maka nabi udi dipaksa untuk naruko perbuatanni sai luangan udi.

¹⁷ Guru-guru palsu udi iado injuk mata way sai nyangu rik injuk kabut sai diserbu ulih angin topan. Allah radu nyediako bagi tian suatu rang sai kelam nihan.

¹⁸ Tian nyani pernyataan-pernyataan sai muluk-muluk rik bangkang; nafsu sai hajor dipakai ulih tian guna ngejerumusko jelma-jelma sai ampai gaoh mulai telepas jak lingkungan sai hurik sesek.

¹⁹ Guru-guru palsu udi ngejanjiko kemerdekaan jama jelma-jelma udi, sedang tian tenggalan dibuguko ulih kebiasaan-kebiasaan sai nyadangko manusia. Mani kik jelma dikalahko ulih sai hal, maka ia jadi jelma sai ngebantu jak sai ngalahko ia ano.

²⁰ Jelma sai kenal Tuhan rik Penyelamat ram Isa Almasih radu telepas jak kuasa-kuasa dunia sai ngecemarko manusia. Kidang kik kak raduni ia tejerat lagi hingga dikalahko ulih kuasa-kuasa ano, maka keadaan jelma udi pada akherni lebih burak jak semakkungni.

²¹ Lebih betik jelma-jelma injuk reno udi mak pernah kenal jama jalan benor jak Allah, jak tian kenal jama ia, kidang kak raduni mak haga nutuk perintah-perintah sai dikeniko Allah jama tian.

²² Api sai tian lakuko ngebuktiko benorni peribahasa inji, "Kaci haga nganik luot api sai radu ia mutahko," rik "Babui sai radu dimandiko haga muloh beguling-guling di delom litak."

2 Petrus

Video 2 Petrus 2

Ikuti Kami:

KONTAK | PARTISIPASI | DONASI