Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas paksa si lepas lit nabi-nabi perguak i tengah-tengah anak-anak Dibata. Bage pe nandangi reh me ku tengah-tengahndu guru-guru perguak. Guru-guru perguak e erbuni-buni maba ajaren-ajaren si ncedai ras mecah-mecah perpulungen. Janah la ia ngakui Tuanna si nggo nukur ia. Alu bage ilegina kap si erbahanca ia pedas kernep.
2 Aminna bage gia melala nge si ngikutken lagu langkahna si la meteh mela e; janah erdandanken lagu langkah guru-guru perguak e, nterem kalak ngerana megombang nandangi Dalan si Benar si ikuti kita e.
3 Alu merangap guru-guru perguak e ncari untung arah nuriken turi-turin si iban-banna saja. Ukumen man kalak enda nggo ndekah me isikapken, janah si erbahanca ia kernep nggo nimai!
4 Malekat-malekat si erdosa pe labo pulah i bas ukumen Dibata nari, tapi IbenterkenNa ku neraka. I je me malekat-malekat e iranteken i bas lubang si mbages si lanai kal langlang gelapna, nimai Wari Pengukumen.
5 Bage ka pe kerna doni i bas paksa si nai; la ipelepas Dibata ia pulah i bas ukumen nari. Irehken Dibata banjir si mbelin ku doni si ingani manusia si la nggit nembah man Dibata i bas paksa si e. Nuah ras pitu kalak si debanna nge ngenca si iselamatken Dibata, erkiteken ipembarken Nuah berita si ngena ate Dibata.
6 Kota-kota Sodom ras Gomora pe bage ka nge. Ikernepken Dibata kota-kota e alu api, gelah jadi sada usihen kerna kai si pagi jadi nandangi kalak si la nggit nembah man Dibata.
7 Tapi Dibata nelamatken Lut erkiteken ia ngikutken sura-sura Dibata; ia isuhsahi lagu langkah kalak si la meteh mela si la radat.
8 I tengah-tengah kalak si bage, Lut, kalak si bujur e, nggeluh alu pusuh si tersiksa, erkiteken tep-tep wari ia megi janah ngidah lagu langkah kalak si la meteh mela e.
9 Dage ieteh Tuhan nge uga nelamatken kalak si tek man BaNa i bas percuban-percuban nari, janah IetehNa ka pe uga nahansa kalak si jahat e i teruh ukumen seh ku Wari Pengadilen,
10 terlebih-lebih kalak si ngikutken kerincuhen dagingna si erbahanca ia melket janah la nggit iaturken Tuhan. Bage pangna ras metudana guru-guru perguak e seh maka kerina mahluk-mahluk si mulia pe la alang-alangen nggombangisa!
11 Sedangken malekat-malekat si ndauh gegehen ras belinen kuasana asangken guru-guru perguak e la nalahken mahluk-mahluk si mulia e alu nggombangisa i adep-adepen Tuhan.
12 Tapi pengelako guru-guru perguak e bali ras rubia-rubia si la rukur si tubuh guna itangkap ras ibunuh; kasa si la iangkana ipandangina ras ihinana. Nandangi ikernepken nge ia kerina bagi rubia-rubia merawa.
13 Nandangi ibalasken me man bana kiniseran sue ras kiniseran si nggo ibahanna nandangi kalak si deban. Si jadi kesenangen man bana e me i ciger wari e pe ilakokenna kai saja pe si banci pepuasken kerincuhen dagingna; asum kam man-man ras ia, kalak enda desken rintep si melket si erbahanca kam mbau, janah tupung si e meriah iakapna nipu kam.
14 La ia erleja-leja erbahan dosa, emaka kerincuhenna e me, ngenehen diberu-diberu alu mata perlua-lua. Kalak si la tetap ukurna, igodana. Pusuh peratenna nggo terbiasa merangap. Kalak enda kalak si kena sumpah Dibata kap.
15 Sabap la nggit ia ngikutken dalan pinter, emaka papak ia. Iikutkenna lagu langkah Bileam anak Beor nai. Bileam enda merincuh kal ndatken upah i bas perbahanenna si jahat nari.
16 Tapi dat persinget ia kerna kejahatenna sanga kaldena si biakna kin la banci ngerana e ngerana alu cakap manusia, gelah ulanai iteruskenna perbahanenna si mehado e.
17 Guru-guru perguak e bali ras sumur si nggo kerah; ia bali ras remang si iembusken angin si meter. Dibata nggo nikapken sada ingan si seh kal gelapna man kalak enda.
18 Rananna seh kal ganjangna, tapi la lit isina; ipakena kerincuhen daging si la meteh mela e guna nidingi kalak si mbaru denga pulah i tengah-tengah manusia-manusia si geluhna nggo papak gelah kena ragum.
19 Erpadan ia mereken kebebasen, aminna ia jine iperbudak kebiasan-kebiasan si ncedaken, sabap kai si naluken sekalak jelma, ia jadi budak si naluken ia e kap.
20 Adi kalak nggo pulah i bas kemelketen doni enda nari erkiteken nggo itandaina Tuhanta ras Si Engkelini kita Jesus Kristus, janah kenca e mulihken ka ia kena siding ras ikuasai kemelketen doni enda, maka kedungenna kecibal kalak si bage ndauh melketen asangken si tangtangna ndube.
21 Madin kalak si bage la pernah nandai dalan si ngena ate Dibata asangken itandaina, tapi dungna la nggit ngikutken perentah si badia si ibereken man bana.
22 Kai si ilakoken kalak enda payo kal bagi si ikataken perumpaman enda, "Biang ipanna mulihken kai si nggo iutahkenna," janah "Babi si nggo iperidi mulihi ercebah i bas kubang."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA