Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ahirne rase kangen tiang pade ndẽqne bau tetahen malik. Keranaq nike tiang pade mutusang araqan tiang pade ndot mẽsaq lẽq Atena,

² terus tiang pade ngutus semetonte Timotius. Timotius nike pelayan Allah saq begawẽan bareng kance tiang pade jari beriteang Kabar Solah mengenai Almasih. Tiang pade ngutus Timotius tipaq side, adẽq ie neguqang atẽ side pade dait ngebẽng nasẽhat mengenai iman side pade.

³ Siq care nike ndẽq araq sopoq dengan juaq lẽman side pade saq bimbang imanne lantaran penderitean-penderiteante niki. Side mẽsaq nenaoq bahwe penderitean-penderitean nike sampun jari rencane Allah lẽq ite.

⁴ Sewaktu tiang pade masih araq bareng kance side pade, sampun tiang pade badaq side bahwe ite gen menderite. Dait mule hal nike tetu-tetu sampun telaksane; side pade ẽndah sampun nenaoq hal nike.

⁵ Keranaq nike tiang ngutus Timotius, sẽngaq tiang melẽt gati nenaoq berembẽ imande. Tiang kuatir Belis berhasil gode side pade sehingge selapuq usahe tiang pade jari sie-sie.

⁶ Mangkin Timotius sampun tulak dait sampun nyampẽang berite gembire lẽq tiang pade mengenai iman dait kasih side pade. Ie badaq tiang pade bahwe side pade tetep inget tiang pade lẽq angende. Dait side pade melẽt bedait kance tiang pade, pade maraq tiang pade ẽndah melẽt bedait kance side pade.

⁷ Keranaq nike, semeton senamian, lẽq dalem selapuq kesusahan dait penderitean tiang pade, tiang pade merase tehibur siq berite mengenai side pade dait siq iman side pade,

⁸ sehingge mangkin tiang pade idup malik, asal side pade tetep araq lẽq dalem Tuhan.

⁹ Berembẽ belẽq ucapan syukur tiang pade lẽq Allah siq selapuq sukecite saq tiang pade alamin lẽq arepan-Ne lantaran side pade.

¹⁰ Kenjelo kekelem tiang pade pacu-pacu bedo'e, adẽq tiang pade bau bedait langsung kance side pade, jari cukupang napi saq kurang lẽq iman side pade.

¹¹ Semoge Allah Bapante mẽsaq, dait Junjungante Saq Mulie Deside Isa ngicanin tiang pade langan jari bedait kance side pade.

¹² Semoge Tuhan ngeromboqang dait pebelẽq kasih side pade sopoq kance saq lainne dait tipaq selapuq dengan, pade maraq tiang pade ẽndah ngasihin side.

¹³ Siq care nike Tuhan gen neguqang atẽnde, sehingge side pade suci dait ndẽq bedowẽ cacat cele lẽq arepan Allah Bapante, lẽq waktu Junjungan Saq Mulie Deside Isa rauh teiring siq selapuq dengan saq jari dowẽ-Ne.

1 Tesalonika

Video 1 Tesalonika 3

Ikuti Kami:

KONTAK | PARTISIPASI | DONASI