1 Kami diaídon mokotahang kon tanob nami ko'i monimu, tuamai iraikumai yo manikah biar dongkadon aku'oi ing kon Atena,
2 pogoḷa-goḷatan potabaíkupa mangoi ko'i monimu ing ki utat naton ki Timotius. Sia na'a im mogogaid kon oaíidan i Allah inta topogaidan nami nopoyaput in Habar Mopia soaáḷ ki Kristus. Pinotabaí nami in sia mamangoi ko'i monimu simbaí motuḷung moginrigon kong gina monimu bo poḷat mononggina baí umuran mo'ikow mopirisaya ko'i Kristus.
3 Baí diaí tobatuímai intau kon sigad monimu mobaḷui im pirisaya sim mokorasa kon roriga mita naton na'a. Kinota'auan bidon monimu kon tua in sinantuí bidon i Allah ko'i naton.
4 Sing kowakutu ing kami koyota-yotakinpa monimu, muna bidon pinoguman nami, kong kita im pastibií mokorasa kon roriga. Bo totu'u kon nobaliídon intua komintan; kinota'auan bidon monimu intua.
5 Manangka intua pinotaba'kudon namangoi ing ki Timotius sim mo'ibogdon totok aku'oi mokidongog kon habar soaáḷ kopopirisaya monimu ko'i Kristus. Molia-liau ing ginaku sin dikabo kinokawasa'andon Ibilis im mo'ikow, sahingga onu inta siniḷopiían nami diaídon im baragunanya.
6 Ta'e tana'a, naonda ing ki Timotius namangoi nodia in sia kon habar inta mokosanang totok kon gina. Ino'umannya kom mo'ikow totu'-totu'udon mopirisaya ko'i Kristus bo umuran doman mositabian. Ino'umannya doman kon umuran kotoropan monimu kong kami na'a in intaubií mopia bo mo'ibog doman totok im mo'ikow moyodungkuḷ nami, naí bií doman tua ing gina nami ko'i monimu.
7 Manangka intua utatku mita, umpakah ing kami nobiag nosusah bo mororiga, ta'e nosanangbií totok ing gina nami in nokodongog kon habar kom mo'ikow umuran mopirisaya ko'i Kristus.
8 Habar tatua nokodugang kon noroton ing gina nami, asaḷ bo tantuí roton in sosindog monimu bo umuran motobatuí i Tuhan.
9 Diaídon im poporupa'an in sukur nami ko'i Allah sim bayongan inta mokosanang kong gina kon tayowon-Nya, lantaran mo'ikow.
10 Doḷom bo singgai kami umuran mosambayang simbaí kita mota'au moyodungkuḷ bo moyogintayow makow bo mogintompod kon onu inta paraḷupa pakeíon monimu kom mopobayak im pirisaya monimu ko'i Kristus.
11 Bo po'igumon makow intua, ki Allah, ki Amaí naton bo ki Tuhan naton ki Yesus Kristus mobogoi in daḷan ko'inami simbaí moyodungkuḷdon bui monimu.
12 Bo igumon doman makow nami ko'i Tuhan baí mo'ikow umuran mositabian bo oyuíon doman in tabi monimu kon tumpaḷa intau, sahingga in tabi monimu kodugang- kodugangdon naí tabi nami ko'i monimu.
13 Aka natua yo irigonan i Tuhan ing gina monimu, sahingga modaritdon totok ing kobobiag monimu bo diaí bidon in inta diaí mopia in aidan monimu kon tayowon i Allah, ki Amaí naton, ko wakutu ing ki Tuhan naton ki Yesus mamangoi bui moyotakin im bayongan intau inta ain nobalií umat-Nya.

Studi Alkitab lengkap, silahkan lihat Alkitab SABDA :: 1 Tesalonika 3
Studi Alkitab mobile, silahkan lihat Alkitab Mobi :: 1 Tesalonika 3

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke