Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Liwa'mokan mamali'. Iamo joo kisanga la'bi melo ke torro bangmokan sola Silas jio kota Atena,

² angkisuai to padanta' tomatappa' Timotius male mati'. Ia to Timotius sangpangjamanki' nasua Puang Allataala mpangpeissenan karebanna Almaseh. Kisuai male mati' la mpamasumanga' kamu' ammisamatappa'-tappa'na.

³ Susimi joo, danggi' lalo miden mpessakkanni Almaseh moiraka mimaparri'. Miissen kumua ia tee kamaparrisan akkattanamo Puang Allataala lako kalemi.

⁴ Ia tontasola unapa, kipauan jolomo kamu' kumua la maparri'ki'. Tongan joo kada sanga mangkamo taperasai to parri'.

⁵ Iamo kusuai to Timotius male mati' sanga gaja doangmo' nnissenni kumua matappa' tarruh unara kamu'ka lako Almaseh. Batana', iamo ke nataloimo kamu' Ballisi' na sininna to jamanki' menjaji te'da bua'na.

⁶ Apa ia tee polenna mai Timotius mpauankan kareba to kipusannang, kumua da'tan una kamu' matappa' misipakamoja' too. Napauan toomokan kumua tuli miingaran melo unakan. Na mikamali' unapa la ssikitankan, susi kami' mamali' la ssikitan kamu'.

⁷ Ee, tomala'bihku'! Napamasumanga'kan joo kareba. Moi kimaparri' dipakario-rio, masumanga'kan ssa'dingngi kumua da'tan kamu' matappa'.

⁸ Ia tee too matana tonganmokan, sanga samatappa'-tappa'mimo lako Puang.

⁹ Mangkurru sumanga' tongankan lako Puangta' Puang Allataala, nasaba' kamarioan to kiperasai jio olo-Na, sanga kamu'.

¹⁰ Meta'da tulung tongankan keallo kebongi lako Puang Allataala, dennaa upa' kiwa'ding unapa mpessikitai pole' kamu' kiajahhi kamu' to apa te'dapa miissenni ammisamatappa'-tappa'na lako Puang Isa.

¹¹ Dennaa upa' natulungkan Ambe'ta' Puang Allataala sola Puangta' Puang Isa angkiwa'ding ssikitan kamu'.

¹² Na dennaa upa' mipede' sipakamoja' sola ngasan, mipede' mpakamoja' too sininna tau, susi kami' mpakamoja' kamu'.

¹³ Na dennaa upa' napamawatangngi Puang penawammi, anna te'da dosami na te'da caccami jio olo-Na Puang Allataala, Ambe'ta', ke ratu pole'i Puangta' Puang Isa sola sininna taun-Na.

1 Tesalonika

Video 1 Tesalonika 3

Ikuti Kami:

KONTAK | PARTISIPASI | DONASI