Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Akienyo, taragak kami tu indak dapek ditahan lai. Dek karano itu kami bapikie, labiah elok kami ditinggakan surang di Atena,

² samantaro itu kami utuihlah sudaro kito si Timotius. Inyo adolah palayan Allah, nan bakarajo samo-samo jo kami untuak mambaritokan Injil Isa Almasih. Kami utuih inyo kabake angku-angku, untuak manguwaikkan, sarato untuak mandorong, supayo angku-angku, samakin tambah ba iman kapado Isa Almasih.

³ Jo caro nan baitu, indak ka surang juwo doh dari angku-angku, nan ka suruik, dek karano di sagalo sansaro nan kito tangguangkan ko. Angku-angku sandiri lah tawu, baraso kasadonyo sansaro tu tamasuak pulo tu, dalam rancana Allah untuak kito.

⁴ Dikutiko kami sadang samo-samo jo angku-angku, kami lah ma agiah tawu talabiah dawulu, baraso kito ko ka sansaro. Batua, iyo lah sabana-bana tajadi; angku-angku sandiri pun lah mangatawuinyo.

⁵ Itulah sababnyo, mangko ambo utuih si Timotius, dek karano, ambo niyo sangaik nak mangatawui, baa kamajuan angku-angku dalam parkaro ba iman kapado Isa Almasih. Ambo kuwatir kok barasil Ubilih mandayo angku-angku, sainggo sadonyo jariah payah kami manjadi tabuwang siyo-siyo.

⁶ Nan kiniko si Timotius lah babaliak, inyo lah mambawok kaba sukocito kabake kami, kaba tantang, baa bana iman angku-angku kapado Isa Almasih, angku-angku pun samo-samo mangasiahi. Inyo mancuritokan pulo kabake kami, baraso angku-angku tatap mangana-ngana di ati, sasuatu nan baiak tantang diri kami. Angku-angku niyo sangaik nak batamu jo kami, samo jo bakcando kami niyo sangaik pulo nak batamu jo angku-angku.

⁷ Itulah sababnyo sudaro-sudaro, di dalam sagalo kasusahan, sarato jo dalam sansaro kami, kami tahibur dek barito tantang diri angku-angku. Iman angku-angku kapado Isa Almasih manggadangkan ati kami,

⁸ sainggo kiniko kami maraso sabana-bana iduik, asakan angku-angku layi tatap badiri taguah, basatu jo Tuhan.

⁹ Baralah kagadangnyo raso tarimo kasih kami kapado Allah, ateh sagalo sukocito nan kami rasokan di adok-an Baliau, dek karano di angku-angku.

¹⁰ Siang malam kami mamohon jo sapanuah ati kapado Allah, supayo kami dapek basuwo jo angku-angku, untuak malangkok-i apo nan angku-angku paralukan, untuak ba iman kapado Isa Almasih manuruik nan samustinyo.

¹¹ Mudah-mudahan Allah Bapak kito, sarato jo Tuhan kito Isa Almasih, Baliau sandirilah nan ka maratokan jalan untuak kami, supayo kami dapek basuwo jo angku-angku!

¹² Mudah-mudahan Tuhan manjadikan angku-angku, samakin samo-samo mangasiahi, sarato samakin mangasiahi kasadonyo urang, sainggo kasiah angku-angku tu samakin batambah-tambah, samo jo bakcando kasiah kami kabake angku-angku.

¹³ Jo caro nan baitu, Tuhan ka manguwaikkan ati angku-angku, sainggo angku-angku suci, sarato indak bacacek di adok-an Allah Bapak kito, dikutiko Tuhan kito Isa Almasih tibo isuak, samo-samo jo kasadonyo urang nan manjadi miliak-Nyo.

1 Tesalonika

Video 1 Tesalonika 3

Ikuti Kami:

KONTAK | PARTISIPASI | DONASI