Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Samurine, pẹ̌kakakating kami e, semben tawe ikapetọ baharia. Ual᷊ingu ene ute i kami měngẹ̌ngěnna u mapiawe těntang i kami hala su Atena,
2 těntal᷊angu i kami něndolohu anạ u sěmbaụ i kitẹ i Timotius. I sie kai sěngkatau mẹ̌tatangkiang Duata sěngkapěmunara ringangi kami měhabar'u Injil'i Kristus. I kami e něndoloh'i Timotius anung kamene mẹ̌deạu i sie makatoghasẹ̌ si kamene ringangu měmahansang si kamene limembong kasẹ̌gade supangangimang su Mawu Yesus Kristus.
3 Mageng kerene ute tawẹ u sarang sěngkatau wọ'i kamene kụ mahunsohọ u manga kal᷊awọu sigěsạ i kitẹ e. I kamene hala masingkạu haghin sigěsạ e kai nasowa su ral᷊ungu hingid'u Mawu Kasěllahenge waug'i kitẹ.
4 Su tempong i kami e wẹ̌dangben dingangi kamene, ute i kami e seng bọu něhabarẹ̌ si kamene kal᷊imona u i kitẹ e kai sarung masigěsạ. Kụ mambeng těngadẹ̌ ene seng nariadi, kụ hal᷊ẹ̌ ene e mamben su kasingkạ i kamene.
5 Kai ene hakịu iạ něndoloh'i Timotius, u iạ kai masaria kapuluku e mědeạu makakasingkạu kai kereapa katatal᷊ěmbuhung pangangimangu si Kristus. Iạ e ghụgěnggangu setange kai makareạ lẹ̌sabe makapěnal᷊ukạ si kamene hakịu kal᷊awọu saghed'i kami e makoạ tawẹ kěhase.
6 Kụ ini e i Timotius seng nawal᷊ị dingangu seng něhabaru ral᷊uasẹ̌ si kami e mạul᷊ịen pěngangimang i kamene si Kristus dingangu lawọ mẹ̌kẹ̌kakěndagẹ̌. I sie něhabarẹ̌ si kami u i kamene měngkawe sěntiniạ maněntangu tiwạ e mapapia mạanụeng kami e su naung i kamene. Ringangu i kamene kai mapulu mẹ̌sombang i kami, kerẹewe lai i kami e mal᷊aing mapulu mẹ̌sombang i kamene.
7 Kai ual᷊ingu ene, hakịu manga anạ u sěmbaụ, su ral᷊ungu kal᷊awọu sunsara ringangu sigesạ i kami, i kami e mạhibor'u habar'u mạanung kamene. Pangangimang i kamene si Kristus e makạsaria naung i kami,
8 hakịu orasẹ̌ ini e i kami makạpěndang u mamben těngadẹ̌ biahẹ̌, asal᷊u i kamene tẹ̌bewe rụdarisị matoghasẹ̌, nasěmbaụ dingangu Mawu.
9 Mamben masaria tumbụ u ral᷊ungu naung i kami e makitarimakasẹ su Mawu ual᷊ingken patikụ dal᷊uasẹ̌ kinahombangeng i kami su těngon Mawu e batụu i kamene.
10 Ěllo hěbi e i kami ghụgahiorọ si Sie ringangu kaguwạu ral᷊ungu naung, tadeạu i kami makapẹ̌sombang hala ringangi kamene ipanukụ apang gausang i kamene waugu mangimang si Kristus kere hinone.
11 Karimạko Ruata i Amang i kitẹ e, ringangu Mawung kitẹ Yesus e měngahạ i kami sural᷊eng matene tadeạu makapẹ̌sombang i kamene.
12 Karimạko Mawu e mapẹ̌dal᷊embong kamene mẹ̌kakakěndagẹ̌ sěmbaụ dingangu wal᷊ine ringangu mạhěmpal᷊iu kuměndagu patikụ taumata, sarạewen pẹ̌kakakěndag'i kamene e mamben sauneng mahuntinamba, mẹ̌sul᷊ungkewen pẹ̌kakakěndagi kami ringangi kamene.
13 Hakịu ene Mawu e makapanguatẹ̌ naung i kamene, kụ hinong apakasusi ringangu tawẹ pẹ̌sasal᷊ang kamene su těngọen Duata i Amang i kitẹ, su tempon Mawung kitẹ i Yesus riměnta sěngkakarěnta ringangu patikụ taumata e nakoạ tataghuaneng'E.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA