Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ai lang bebas do ahu? Ai lang apostel do ahu? Ai lang domma huidah Jesus, Tuhanta in? Ai lang horjangku do nasiam ibagas Tuhan in?
2 Anggo lang apostel ahu bani halak na legan, tapi apostel do anggo ahu bani nasiam, ai nasiam do lak ni haapostelonku ibagas Tuhan in!
3 On ma balosku bani halak na sihol mamareksai ahu.
4 Na so marhak do hanami mangan ampa minum?
5 Na so marhak do hanami ase adong na gabe sinrumah pangkasomani bennami, songon apostel na legan ai, pakon anggi ni Tuhan in ampa si Kepas?
6 Ai pitah ahu ampa si Barnabas do na maningon marhorja laho mansarihon goluhnami?
7 Ija ma adong tentara, na mambalanjai dirini sandiri? Ise ma na mambahen pohon anggur, na so mangankon humbani buahni? Ise ma na marmahan pinahan, na so minum dadih humbani na pinarmahanni?
8 Domu hubani hasomalan ni jolma do na huhatahon in? Ai lang sonin do homa hata ni titah in?
9 Ai bani titah ni si Musa pe tarsurat do, “Seng bulih huntamonmu babah ni lombu na mardogei!” Ai lombu do sinarihon ni Naibata ijai?
10 Ai lang hu banta do hata ai? Ai halani hita do ase tarsurat, “Patut do mangarap paninggala humbani na tininggalaanni, anjaha pardogei mangarap bani parbagiananni.”
11 Anggo isuan hanami bani nasiam partonduyon, ai banggal ma ai anggo marpariama hanami humbani nasiam na porlu bani pardagingon?
12 Ai anggo marrupei na legan humbani nasiam, samintolah hanami ma lang? Seng ipakei hanami hak in, tapi sabar do hanami bani haganup, ase ulang tarambat Ambilan Na Madear ni Kristus ibahen hanami.
13 Ai lang ibotoh nasiam, na mangkorja i rumah panumbahan mangan hun rumah panumbahan, anjaha na marugas bani anjapanjap, dapotan hunjai?
14 Lanjar sonai do iaturhon Tuhan in bani siparambilan na madear, “Hun bani Ambilan Na Madear in ma sidea manggoluh.”
15 Tapi anggo ahu, sada pe lang hudalankon ai; anjaha seng husuratkon on, ase ipadalan in bangku. Ai rahanan do matei ahu, humbani na maseda hasurungankai.
16 Ai anggo huambilankon Ambilan Na Madear in, seng hasurungan in bangku, ai na maningon do in bangku. Bursik ma ahu, anggo seng huambilankon Ambilan Na Madear in.
17 Ai anggo huhorjahon in humbani rosuh ni uhurhu, marupah ma ahu. Tapi anggo seng humbani rosuh ni uhurhu, na niondoskon ma jabatan in bangku.
18 Ase aha do upahku? Ai ma, huambilankon do Ambilan Na Madear in, seng pala marupah, ase ulang hupakei hakku na mardomu bani Ambilan Na Madear in.
19 Ai age pe bebas ahu humbani ganup halak, huparjabolon do diringku bani haganup, ase hunbuei sidea dapot ahu.
20 Gabe songon Jahudi do ahu bani Jahudi, ase dapot ahu Jahudi. Bani na ginomgoman ni titah in, songon na ginomgoman ni titah do ahu, age pe lang ginomgoman ni titah in ahu, andohar dapot ahu na ginomgoman ni titah in.
21 Bani na so martitah songon na so martitah, age pe sedo na so martitah ahu humbani Naibata, tapi i toruh ni titah ni Kristus do, ase jumpah ahu na so martitah.
22 Bani na galek, gabe songon na galek do ahu, ase dapot ahu na galek in. Huparomban do diringku bani haganup, andohar siotikanni maluah deba hubahen.
23 Tapi haganupan in huhorjahon halani Ambilan Na Madear, andohar dihut ahu marrupei bani pasu-pasu-Ni.
24 Ai lang ibotoh nasiam, ia na marlumba haganup do namin na marlintun, tapi sada do na manjalo upah hamonangan. Sonai ma bujur nasiam marlintun, ase dapotan nasiam.
25 Tapi sagala siparlumba mangorom do bani haganup. Ibahen sidea do sonai, ase ijalo sidea sortali rudang na ra seda, tapi hita na so ra maseda.
26 Ia ahu, sedo na so martujuan parlintunonku, sedo songon na manenju logou ahu martenju.
27 Tapi hupukpuki do angkulangku anjaha hupatunduk, ase ulang halak na legan huambilani, hape ahu magou.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA