Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bakenké ui mepuit? Bakenké ui ini rasul? Bakenké ui pangeh nenier Yésus Tuhan tau? Bakenké muyuh ini mangun ku bua' kekamenku bang Tuhan?
2 Sagan pana' lun baken na ngamo negku rasul, iamo' pa kiung muyuh ui rasul. Ngaceku muyuh luk etu kekamenku bang Tuhan ratnan ui ini rasul.
3 Kudeng lemulun ngesala' negku, ini orku:
4 Naké ui miak kuman idi ngirup?
5 Naké ui miak nguit denganku aceh awan luk manu, mepad kudeng rasul-rasul baken, idi kinanak-kinanak Tuhan, idi Pétrus?
6 Kian, ui dengan Barnabas mo' luk na miak ucu' ratnan kekamen ticu'ké?
7 Idéké mangun ku lun pebunu' idi tuman ngalap akan idi ayungneh sebuleng? Idi idéké luk nganau' kabun anggur idi luk na miak kuman bua'-bua'neh? Idi idéké luk matar sengeriudan dumba idi luk na ngirup rataneh ineh?
8 Amung-amung luk pinginud luk biréku ini ratnan ulun luk pekalai anid-anid aco. Ukum Musa pana' kudeng ineh teh?
9 Pangeh inayud, "Idi aleg iko ngabet tang sapi' luk uned rumik ineh." Inanké Allah ngerawé sapi' ineh?
10 Naké Ieh pebala ngaceku tau? Matu bala ini pangeh inayud kuan tau. Do' lemulun luk ngeradu idi lemulun luk rumik ineh ngakem dengan merapet miak ngalap babpat uli' ratnan lati'deh.
11 Kai nenibu ilung Roh arang muyuh. Sala'ké kudeng kai ngeranih bua' tana' ini rat nemuyuh?
12 Kudeng lun baken miak ngalap babpat luk kudeng ineh rat nemuyuh, meluun teh kuan kai lek? Iamo' na kai makai lalud ineh, iamo' kai tuman ratnan amung-amung, pad kai na ngesabeng Bala luk Do' ratnan Keristus.
13 Naké muyuh kali' lemulun luk ngakem bang Ruma' Allah ngalap akan ratnan Ruma' Allah ineh, idi lemulu luk maré baré luun bubpun pana' ngalap babpat ratnan baré ineh?
14 Kudeng ineh teh Tuhan pangeh nengeletep pad lemulun luk mada' Bala luk Do' ngalap akandeh ratnan mada' Bala luk Do' ineh.
15 Iamo' ui na nengalap luk petulu barén kuanku; idi na ui ngayud nekini, pad ui miak ngalap babpat kuan bururku sebuleng. Meluun do' ui maté ratnan seburur mala balaku mo'-mo'.
16 Ui na miak ngedita' bururku ngaceku ui mada' Bala luk Do'. Ngaceku ui icuk mada' ineh. Mesusa' kuanku kudeng ui na mada' Bala luk Do' ineh.
17 Kudeng ui mada' maya' pinianku sebuleng, ui miak merapet ngalap tabpar. Iamo' ngaceku ui mada' Bala luk Do' maya' ecuk Allah, ieh ineh mangun ku aceh kekamen luk biré kuanku.
18 Anunké tabparku? Tabparku, ieh ineh mada' Bala luk Do' ineh dengan na ngalap anun-anun, pad ui na ngalap luk petulu barén kuanku ngaceku mada' Bala luk Do' ineh.
19 Ui baken demulun idé-idé pana', iamo' ui nganau' bururku mangun ku demulun kuan amung-amung lemulun, pad ui miak ngalap mula' lemulun kuan Keristus.
20 Idi kuan lun Yahudi ui mangun kudeng lun Yahudi, pad ui miak ngalap lun Yahudi ineh. Idi kuan lemulun luk maya' Ukum Musa, ui mangun kudeng lemulun luk maya' Ukum ineh, sagan pana' ui sebuleng na maya' ineh, pad ui miak ngalap lemulun luk maya' Ukum Musa ineh.
21 Idi kuan lun pupu baken, ui mangun kudeng lun pupu baken luk na kali' Ukum lun yahudi, pad ui miak ngalap lun pupu baken. Baken ilungneh ui na maya' ukum Allah. Setuneh ui maya' ukum Keristus.
22 Arang lemulun luk melaya' anu ui mangun' kudeng ideh teh, pad ui miak ngalap nedeh. Ui mangun ku anun-anun kuan amung-amung lemulun pad ui miak ngulun sebuang rat arangdeh maya' dalan anun-anun pana'.
23 Amung-amung ineh ui nganau' ngaceku Bala luk Do' ineh, pad ui ngalap babpat bang peruanneh.
24 Muyuh kali', idi su luk inan peribatun ineh, amung-amungdeh upun, iamo' seburur mo' luk meluun awer? Idi do' muyuh upun mepad kudeng ineh, pad muyuh meluun awer.
25 Anid-anid burur lemulun luk sikal metueh bang rot ineh megéi' maya' bebpeng lun luk marot. Ideh sikal ngalap aceh pata luk miak merapuk, iamo' tau ini sikal ngalap sebuleng pata luk na miak merapuk.
26 Ngaceku ineh ui ini upun pad ui meluun awer, baken dengan na ulek. Kudeng ineh teh kareb ui pebukut, baken kudeng mukut bui.
27 Ui ngerumu' bururku, pad ui nganau' neneh ku demulun, pelé ui luk nemada' nelun baken ineh na miak talan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA