Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Napi tiang niki ndẽqne dengan bẽbas? Napi tiang niki ndẽqne rasul? Napi tiang ndẽq uwah serioq Deside Isa Junjungante Saq Mulie? Napi side pade ndẽqne hasil pegawẽan tiang lẽq dalem Tuhan?

² Lamun dengan-dengan lain ndẽq mẽlẽ akuq tiang sebagẽ rasul, laguq bagi side pade tiang rasul! Sẽngaq idupde lẽq dalem Tuhan nike, buktiang bahwe tiang niki sopoq rasul.

³ Lamun dengan ngeraosang tiang, tiang gen jawab maraq niki:

⁴ Napi tiang ndẽq berhak bekelor dait nginem?

⁵ Napi tiang ndẽq berhak jauq sopoq senine saq seiman bareng-bareng dalem kelampan tiang, maraq saq telaksaneang siq sanak-sanak Junjungan Saq Mulie Deside Isa dait siq rasul-rasul lainne, termasuk Kepas?

⁶ Atao cume tiang dait Barnabas doang saq teharusang boyaq napkah mẽsaq?

⁷ Napi araq anggote tentere saq harus biayaq diriqne mẽsaq lẽq dalem angkatan perang? Napi araq petani saq nalet anggur lẽq kebonne terus ndẽqne kelorang hasil anggur lẽman kebon nike? Atao napi araq pengarat saq meliharaq dombe, terus ndẽq nginem susu lẽman dombe-dombene nike?

⁸ Tiang nyampẽang hal nike ndẽqne tedasarang napi saq biase dalem pengalaman sebilang jelo doang, laguq sẽngaq Hukum Taurat nyatayang hal nike ẽndah.

⁹ Lẽq dalem Kitab Musa tetulis, "Sampi saq kenyeke ngicaq-icaq gandum jari kelin tolang gandum lẽman lẽndongne, ndaq tepelẽbẽk biwihne." Napi sampi nike saq teperhatiang siq Allah?

¹⁰ Atao hal nike saq temaksut umaq ite? Mule nike saq tetulis umaq ite. Sẽngaq dengan saq begawẽan lẽq lendang dait dengan saq mersiq gandumne sampun sepatutne begawẽan dait beharep gen nerimaq separo lẽman hasil pegawẽanne.

¹¹ Tiang pade sampun sawur binẽq rohani lẽq dalem idupde. Jari, lamun tiang pade mataq hasil duniawi lẽman side pade, napi nike artine tiang pade nuntut luwẽqan lẽman side pade?

¹² Lamun dengan-dengan lain berhak beharep hal niki lẽman side pade, napi tiang pade ndẽq lebih berhak malik lẽman ie pade? Laguq tiang ndẽq kadu hak nike. Sebalikne tiang demenan nanggung selapuq hal ketimbang nimbulang penghalang penyebaran Kabar Solah mengenai Almasih.

¹³ Side pasti nenaoq bahwe dengan saq begawẽan lẽq Gedẽng Allah ie pade nerimaq keloran lẽman Gedẽng Allah. Dait dengan-dengan saq ngurus mẽje taoq kurban, mauq bagian lẽman kurban saq teaturang lẽq derike.

¹⁴ Maraq nike ẽndah Tuhan sampun nentuang bahwe dengan saq beriteang Kabar Solah nike harus mauq napkahne lẽman pemberitean nike.

¹⁵ Laguq sopoq juaq lẽman hak nike ndẽq uwah tiang kadu. Dait tiang nulis surat niki ẽndah ndẽqne bedowẽ maksut adẽqne hal nike saq telaksaneang lẽq tiang mangkin. Bagusan tiang matẽ ketimbang hal saq tiang banggeang nike telang.

¹⁶ Sẽngaq, lamun nike cume soal beriteang Kabar Solah lẽman Allah, make tiang ndẽq berhak bangge, sẽngaq Allah sampun mrẽntahang tiang jari ngelaksaneang hal nike. Celake tiang, lamun tiang ndẽq beriteang Kabar Solah nike!

¹⁷ Misalne tiang ngelaksaneang pegawẽan nike siq kemẽlẽq tiang mẽsaq, make tiang kanggo beharep jari mauq upaq. Laguq lantaran tewajibang make tiang beriteang Kabar Solah nike. Tiang tetugasang siq Allah jari ngelaksaneang hal nike.

¹⁸ Lamun maraq nike, napi saq jari upaq tiang? Niki upaqne: Bahwe tiang bau beriteang Kabar Solah nike ndẽq teupaq siq napi-napi, sẽngaq tiang ndẽq nuntut hak-hak tiang sebagẽ dengan saq beriteang Kabar Solah nike.

¹⁹ Tiang niki ndẽqne hambe sai-sai; tiang bẽbas. Timaq maraq nike, tiang sampun jariang diriq tiang niki hambe tipaq selapuq dengan. Tiang ngelaksaneang nike adẽq tiang bau jariang dengan pengiring Almasih seluwẽq-luwẽqne.

²⁰ Tipaq dengan Yahudi, tiang piaq diriq tiang maraq dengan Yahudi, adẽq tiang bau jariang dengan Yahudi pengiring Almasih. Tipaq dengan-dengan saq idup menurut Hukum Taurat, tiang piaq maraqne tiang teriket lẽq hukum nike, timaq setetune tiang ndẽq teriket lẽq hal nike. Tiang piaq hal nike adẽq tiang bau jauq ie pade jari pengiring Almasih.

²¹ Tipaq dengan bangse-bangse lain, tiang piaq diriq tiang maraq dengan bangse-bangse lain, saq idup lẽq luah Hukum Taurat. Tiang ngelaksaneang nike adẽq tiang bau jauq ie pade jari pengiring Almasih. Laguq nike ndẽqne berarti bahwe tiang ndẽq taat lẽq prẽntah-prẽntah Allah; malahan tiang tekuasein siq prẽntah-prẽntah Almasih.

²² Lẽq tengaq-tengaq dengan-dengan saq keyakinanne ndẽq kuat, tiang ẽndah piaq diriq tiang maraq sopoq dengan saq ndẽq kuat keyakinanne, adẽq tiang bau jauq ie pade jari pengiring Almasih. Singketne, tiang jari selapuq-lapuqne tipaq selapuq dengan adẽq tiang bau nyelametang seluwẽq-luwẽqne lẽman ie pade.

²³ Selapuq nike tiang laksaneang jari Kabar Solah lẽman Allah nike, adẽq tiang mauq bagian lẽq dalemne.

²⁴ Side pasti nenaoq bahwe lẽq dalem perlombaan selapuq saq milu perlombaan milu pelai, laguq cume sopoq dengan saq nerimaq hadiah. Keranaq nike pade pelai pacu-pacu sehingge side nerimaq hadiahne.

²⁵ Sebilang dengan saq kenyeke dalem perlombaan, nahen diriqne lẽq selapuq hal. Ie ngelaksaneang nike lantaran ie melẽt mauq sopoq mahkote saq iniq sẽde. Laguq ite niki nahen diriq dalem selapuq hal lantaran ite melẽt mauq sopoq mahkote saq kekel.

²⁶ Keranaq nike tiang pelai tipaq tujuan saq sampun tetentuang. Maraq dalem pertandingan tinju, tiang ndẽq gen sembarangan bejagur.

²⁷ Tiang ngelatih dait nguasein awak tiang, adẽq sesampun beriteang Kabar Solah lẽman Allah tipaq dengan lain, ndaq jangke tiang mẽsaq tetolaq.

1 Korintus

Video 1 Korintus 9

Ikuti Kami:

KONTAK | PARTISIPASI | DONASI