Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Yaku hii nakuasa novia nuapa-nuapa nipodotaku. Yaku hii suro i Yesus. Yaku mboto nanggita Tuputa i Yesus. Bo komiu mbotomo asele mpokarajaa nipoviaku ka i Pue.

² Nau ri panggita ntona ntanina yaku ledo nireke suro i Pue Yesus, natantu kana rarekemiumo yaku suroNa mami! Pomparasayamiu i Pue Yesus nompakalantomo yaku hii mpuu-mpuu suroNa.

³ Ane maria tona mompakasala yaku sabana pokaingguku mpo suro i Pue, ivei pesanaku:

⁴ Ane kami *suro i Yesus, natantumo masipato mantarima kandea bo panginu lako nte todea topomparasaya.

⁵ Natantumo kami muni masipato moberei nte topomparasaya bo manggeni berei kami mosanggani-nggani riara polipa kami, nasimbayu mpo anu nipovia nu suro-suro ntanina bo sampesuvu-sampesuvu i Pue Yesus mboto bo i Petrus.

⁶ Atau nisarumakamiu aga yaku bo i Barnabas kana mokarajaa ante pale kami mboto mompaelo? Ledo masipato kami muni ratande ntodea topomparasaya?

⁷ Natantu ledo ria saitoa tantara nombatanggu katuvuna mboto tempo posieva. Katuvuna kana ratanggu pakenina. Topokarajaa talua *anggur masipato mangande asele ntaluana. Bo topoevu tovau atau bimba masipato manginu susu lako ri binatana.

⁸ Porapa haitu lako ri katuvuta eo-eo. Tapi naria muni pepatuduki nasimbayu riara Atura-atura agama Yahudi.

⁹ Riara Buku Atura Agama nitulisi Nabi Musa, nitulisi ivei: "Nee mombaramu sumba nu japi tempo mantulungi tupuna moini pae. Palambakamo rakandena sakide pae!" Jadi berimba nitaseremiu, aga japi nipariara nu Alatala?

¹⁰ Natantu kitamo nipatujuNa ante tesa haitu! Tesa haitu nitulisi ala mogambara katuvuta manusia. Topopajeko bo topomporo kana mokarajaa ante manjarumaka mantarima sabagia lako ri asele ntana nikarajaara haitu.

¹¹ Kami *suro-suro i Yesus nombasavu Tesa nu Alatala riara ntaimiu. Jadi, ledo masipato kami manjarumaka petanggumiu sakide?

¹² Iyapa guru-guru ntanina masipato manjarumaka petanggumiu, nemopa kami! Tapi kami ledo sanggania nerapi petulungi haitu. Kami aga nombatidamaka riara mpengaya-ngaya kasusa ala ledo mompakantamo tona mombatanggu katuvua kami sampe mombalava ira mantarima Kareba Belo i Kristus.

¹³ Natantu nisanimiumo topokarajaa ri Banua nu Alatala nanggava kandeara lako ri pesomba nipesomba ka Tupu ri Banua nu Alatala haitu. Bo tona nombatulungi todea nanggeni pesombara ri lanta pesomba nanggava sabagia lako ri anu nipesomba haitu.

¹⁴ Ivesia muni i Pue Yesus nompakatantu ala topanggeni Kareba Belo matuvu lako ri petulungi ntona anu nantarima Kareba Belo haitu.

¹⁵ Tapi nau naria nturoku merapi ivesia, ledo sanggania niperapiku ratanggumiu. Bo ledo muni nitulisiku sura hitu ala komiu mompamula mombatanggu katuvuku! Nadamba raraku sabana dopa niperapiku nte komiu bo aginapa yaku mamate pade kadambaku haitu rapakalipo ntona!

¹⁶ Apa ane yaku mompatolele Kareba Belo, ledo masipato yaku mangoe bo mompakalanga rara, sabana yaku nisuro nu Alatala mompatolelena. Mandasa yaku ane ledo kupatolele Kareba Belo!

¹⁷ Ane rapana dotaku mboto mompatolele Kareba haitu, tantu masipato yaku manggava tambo. Tapi ledo ivesia yaku. Yaku nompatolele Kareba Belo, ledo lako ri dotaku mboto. Bara kupodota bara ledo, kana kupatolele Kareba Belo apa haitumo pokarajaa niparasaya nu Alatala ka yaku.

¹⁸ Jadi nuapa tamboku? Nadamba raraku nompatolele Kareba Belo ledo nerapi gaji bo ledo muni nerapi petulungi anu masipato kutarima lako ri pokarajaaku nompatolele Kareba Belo. Kadambaku haitumo nirekeku tamboku.

¹⁹ Yaku hii ledo batua ntona, namala natuvu nangoseaka dotaku mboto. Tapi nitunggaiku natuvu mpo batua ka pura-pura tona. Nipoviaku ivesia ala madea mpuu tona kukeni momparasaya i Yesus.

²⁰ Jonjona, ane yaku nosanggani-nggani nte toYahudi, yaku nokainggu mpo toYahudi. Ane yaku nosanggani-nggani nte tona anu nangoseaka Atura-atura agama Yahudi, yaku nangoseaka Atura-atura haitu naupa yaku mboto domo nipou nu Atura-atura haitu. Patujuku ala mamala kukeni ira momparasaya i Yesus.

²¹ Ivesia muni ane yaku nosanggani-nggani nte tona ledo nisanina Atura-atura agama Yahudi, yaku nokainggu mpo tona ledo nangisani Atura-atura haitu. Patujuku ala mamala kukeni ira momparasaya i Yesus. Tapi nee rauli yaku ledo nangoseaka parenta-parenta nu Alatala, apa yaku hii mpuu-mpuu nangoseaka parenta-parenta i Kristus!

²² Ane yaku nosanggani-nggani nte tona ledo naroso pomparasayana yaku najadi nasimbayu mpo ira ala yaku mamala mantulungi mompakaroso pomparasayara. Yaku nangoseaka mpengaya-ngaya pokainggu bo kabiasa ntona ala yaku mamala manggeni sanu ira momparasaya.

²³ Haitu pura-pura nipoviaku ala madea mpuu tona momparasaya Kareba Belo bo ala yaku mboto manggava belo nijanji ri Kareba Belo haitu.

²⁴ Natantu nisanimiumo ri posilumba mangova pura-pura topangova, tapi aga saito nanggava hadia padagi. Jadi komiu muni kana mokainggu mpo topangova: pasimbukumo ante mpuu-mpuu rara ala rakavamiu hadia.

²⁵ Tona nantuntuni posilumba kana meguru mombakuasai karona mboto riara mpengaya-ngaya. Rapoviana ivesia ala manggava hadia padagi anu ledo mainti, haitumo sangaya talidangga bunga anu aga sampalai malelemo. Tapi kita hitu neguru mombakuasai karota ala rakavata hadia mainti sampe ri kasae-saena.

²⁶ Jadi haitumo sabana yaku ledo nangova sambara. Yaku ledo nojaguru mpo tona aga nombajaguru luona.

²⁷ Tapi yaku neguru nombakuasai karoku mboto ala ledo nangoseaka dota raraku nadaa, mbelaka maupu kupatolele Kareba Belo ka tona ntanina, yaku mboto ledo manggava hadia.

1 Korintus

Video 1 Korintus 9

Ikuti Kami:

KONTAK | PARTISIPASI | DONASI