Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Indakkoh ambo ko urang lapeh laleh, nan bahak untuak indak bakarajo? Indakkoh ambo ko rasul? Apokoh ambo ko alun panah maliyek Isa Almasih, Tuhan kito? Apokoh angku-angku indak asie karajo ambo untuak Tuhan?

² Jikok urang-urang nan lain, indak namuah ma akui ambo sabagai rasul, paliang tidak tantu angku-angku layi namuah ma akui ambo ko! Dek karano, iduik angku-angku sabagai urang Kristen, itu adolah tando baraso ambo ko rasul.

³ Jikok ado urang nan mancukie gareyo tantang diri ambo, mako ka ambo jawab bakcando iko:

⁴ Apokoh ambo indak bahak, manarimo nan ka dimakan jo nan ka diminun, dari asie karajo ambo?

⁵ Apokoh ambo indak bahak, mambawok induak bareh, iyolah padusi nan lah Kristen samo-samo jo ambo dalam pajalanan, bakcando nan dikawokan dek dunsanak-dunsanak Tuhan Isa Almasih, sarato dek rasul-rasul nan lainnyo, tamasuak si Petrus?

⁶ Atau, hanyo si Barnabas jo ambo sajokoh, nan dimustikan mancari napakah iduik sandiri?

⁷ Indak ado doh tantara nan musti mambalanjoi dirinyo sandiri, dikutiko dalam paparangan! Indak ado doh urang paparak, nan mananam anggur di paraknyo, tapi inyo indak mamakan asie anggur tu! Indak ado doh tukang gubalo nan mamaliaro domba, tapi inyo indak maminun susu dombanyo tu!

⁸ Ambo katokan bakcando itu, indak dek karano maliyek ka nan galik dalam iduik sa ari-ari doh, tapi Alkitab lah mangatokan pulo tantang parkaro itu.

⁹ Di Kitab Nabi Musa ado tatulih, "Jawi nan sadang ma iriak gandun, janlah disokong muncuangnyo." Dalam parkaro iko, jawikoh nan diparatikan dek Allah?

¹⁰ Indakkoh itu dimukasuikkan untuak kito? Iyo, itu tatulih untuak kito. Dek karano urang nan mangarajokan parak, sarato jo urang nan mambarasiahkan gandun, lah sapatuiknyo bakarajo, inyo ma arokkan ka manarimo sabagian dari asie karajonyo.

¹¹ Kami lah manyerakkan baniah rohani, di dalam iduik angku-angku. Jikok kami manuwai barakaik-barakaik nan barupo pitih, atau nan barupo barang dari angku-angku, apokoh itu ba arati kami talampau banyak manuntuik, dari angku-angku?

¹² Jikok urang-urang nan lain bahak, ma arokkan sasuatu dari angku-angku, indakkoh kami labiah bahak daripado urang-urang tu? Tapi ambo alun lai mampagunokan hak nan bakcando itu. Malah ambo sabaliaknyo, ambo labiah suko manangguang sagalo sasuatu, daripado manimbuakan suatu parkaro nan ka ma ambek panyebaran Injil tantang Isa Almasih.

¹³ Angku-angku tantu lah tawu, baraso urang nan bakarajo di Rumah Allah, manarimo makanannyo dari Rumah Allah. Urang-urang nan ma uruih tampaik pasambahan karoban, inyo mandapek sabagian dari karoban nan dipasambahkan tu.

¹⁴ Baitu pulo Tuhan lah manantukan, baraso urang nan bakarajo mambaritokan Injil, mako inyo musti mandapek napakah iduiknyo dari karajonyo tu.

¹⁵ Tapi biyapun baitu, alun panah ciyek juwo lai ambo manuntuik, dari babarapo hak ambo tu. Ambo buwek surek ko, mukasuiknyo indaklah untuak mamuntuik hak-hak ambo, kabake angku-angku! Labiah elok lai ambo mati, daripado ambo ka ilangan sasuatu nan ambo panggakkan.

¹⁶ Jikok hanyo parkaro mambaritokan Injil nan dari Allah, mako ambo indak bahak doh mamanggak-manggakkannyo, dek karano Allah nan lah mamarentahkan ambo untuak mangarajokannyo. Cilakolah ambo, jikok ambo indak mambaritokan Injil!

¹⁷ Santano ambo mangarajokan karajo tu ateh kandak ambo surang, mako buliahlah ambo ma arokkan dapek upah. Tapi, ambo mambaritokan Injil tu, dek karano lah kawajiban ambo. Ambo lah ditugehkan dek Allah untuak mambaritokannyo.

¹⁸ Jikok baitu, apo nan ka upah ambo? Ikolah upahnyo: baraso ambo mambaritokan Injil tu, jo caro nan indak mambarekkan urang surang juwo, untuak mambalanjoi diri ambo, dek karano, ambo indak manuntuik doh hak ambo, sabagai urang nan mambawok barito Injil.

¹⁹ Ambo ko indak budak siya-siyanyo doh; ambo ko urang lapeh laleh. Sungguahpun baitu, ambo lah manjadikan diri ambo ko budak untuak kasadonyo urang. Ambo pabuwek nan bakcando itu, supayo ambo dapek mambawok urang sabanyak-banyaknyo untuak Isa Almasih.

²⁰ Taradok urang Yahudi, ambo bakcando urang Yahudi, supayo ambo dapek mambawok urang Yahudi kapado Isa Almasih. Taradok urang-urang nan iduik manuruik paratuaran Nabi Musa, ambo sa olah-olah bakcando takabek jo paratuaran tu, biyapun nan sabananyo, ambo indak takabek doh ka paratuaran tu. Ambo pabuwek bakcando itu, supayo ambo dapek ma elo urang-urang tu manjadi pangikuik Isa Almasih.

²¹ Taradok urang-urang nan indak urang Yahudi, ambo bakcando urang nan indak urang Yahudi, nan iduik diluwa paratuaran Nabi Musa. Ambo pabuwek bakcando itu, supayo ambo dapek ma elo urang-urang tu manjadi pangikuik Isa Almasih. Tapi sungguahpun baitu, nan ambo tatap patuah kapado parentah-parentah Allah; ambo tatap tunduak kabake parentah-parentah Isa Almasih.

²² Di tangah-tangah urang-urang nan kayakinannyo lamah, ambo bakcando urang nan bakayakinan lamah, supayo ambo dapek ma elo urang-urang tu, untuak manjadi pangikuik Isa Almasih. Jadi, singkek curito, ambo namuah manjadi apo sajo untuak kasadonyo urang, supayo ambo dapek manyalamaikkan sabagian dari urang-urang tu.

²³ Mangkonyo ambo karajokan kasadonyo tu, adolah dek karano untuak Injil nan dari Allah, supayo ambo buliah sato pulo dapek barakaik.

²⁴ Angku-angku tantu lah tawu, baraso dikutiko urang batandiang balari, kasadonyo urang nan sato, tantu bi balari, tapi hanyo surang nan mandapek adiyah. Dek karano itu, bi balarilah bakcando urang batandiang, supayo angku-angku mandapek adiyah.

²⁵ Satiyok urang nan sadang balatiah, inyo musti manahan diri dalam sagalo parkaro. Dek karano inyo niyo dikaluangi jo karangan bungo. Bungo tu sabagai tando inyo nan paliang santiang, tapi bungo tu capek layua. Tapi kito ko manahan diri dalam sagalo parkaro, dek karano kito niyo dikaluangi jo karangan bungo nan indak ka layua.

²⁶ Itulah sababnyo mangko ambo balari jo tujuan nan jaleh. Saroman jo urang nan batandiang tinju, ambo indak sumbarang maninju sajo doh, tapi ado alamaiknyo.

²⁷ Ambo sangajo mampadiyakan badan ambo dilatiah sacaro kareh, sampai ambo dapek manguwasoinyo. Mangkonyo ambo pabuwek nan bakcando itu, dek karano ambo indak namuah, jan sampai tajadi, sasudah ambo ma ajak urang lain sato batandiang, tapi nan ambo sandiri indak ditarimo.

1 Korintus

Video 1 Korintus 9

Ikuti Kami:

KONTAK | PARTISIPASI | DONASI