Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Doba ligbum dau yen, kaba, len loudesa endag dan daimo Musa men gomnomna naugb gousanara terimda. Hanoba dan demet mog gedig lusud lesijaresa dou seiseijohob gin touwero. Naro, dan darges dau Musa men gomnomna gin namcirohob. Hang indan goubesa toua inggebga naugb dan det mog gini. Doba dan demaimo indan goubesa ginero, dauntoba lusud lemetohob dan dag igdahab dau Krisdus touwero. Doba en laimo en terimda. Dara ligbum dau yen, kaba, len lowun dan indoho dag maman Adehsud Krisdus emeigdoumesa dan indoho naugb dan desai en moro dag misenero. Anai dan demeiya en se dan indires touebma. Dobnaro. Dan toua deiya en se dan indires dag misenohob. Hang en emeigdoumesa dan dag gembala naugb dan demesai en moro dou lusud dag misen toua. Naro, kab, naro. Dara yen toua, yedag Krisden augwougb dau yeninei? Naro, yen yemedag Krisden augwougb dau yenin touwero. Doba yen yedag hom dara Krisdus ogdoc sug dan desai Mer Geigouhw eisaugb en dou yen sug nosohob. Hang yen yemedag Krisden toua.

² Dangga sug lusud loududa dan dag dan demedag gembala misenero, kaba, dan dens dau sug yen meigdoc dag hom dara Krisdusohob gini ucugb dou len dous. Anai leinyana, kaba, len lowun dan indoho dag gembala areibahau namcir. Doba naugb yen, kaba, yen yecinaga dan dedag gembala misenohob. Anai sug yen meigdoc dag hom dara maman Adehsud dag ginohob, kaba, gini ansins dag dan demedag gembala areibahauero. Doba dan dedag gembala misen naugb dan desai Krisdus mer misen dou yen touohob.

³ (9:2)

⁴ Hang Barnabas aman goubesa inggebga naugb sug aman amacgeij ared ingma dau yen naugb yen yousa aman toua. Anai aman amesai Mer Geigouhw eisaugb Krisdus dag mogud dou yenohob.

⁵ Dara aman goubesa toua inggebga naugb sug aman amahwan amsouwer naugb lan laimo aman isisi sug aman amesai Krisdus moro dou lusud. Aninim dag maman Adehsud magtor, dara Petrus, dara gembala gus len laugwan lahwan len mersouwer naugb len laimo len isisi sug len lesai Krisdus moro dou lusud sungga sungga touohob.

⁶ Era yen youdesa endag Barnabas aman dous eng ameic ara ara dara amsira terimda dousei? Naro, aman goubesa toua inggebga naugb aman ameigtou dau areg aman ameic dara aman amsira, aninim dag len gin toua.

⁷ Anai sug sud hom en edag sadodor naugb esara, kaba, en eic aregoufu dau enin naugb bauma aredei? Naro, doba men mougt en eng eic aregoufu dou en dous. Era sug sud hom en es anggur mec se lo, kaba, en emec mera ingma naugb emeteroei? Naro, en ec mera ingma naugb et bagadgeijahabi, en emes menenau. Era sug sud hom en esedougwo domba naugb aha, kaba, en emesugb marij mohu naugb emeg touweroei? Naro, en esugb marij mohu naugb en eg toua.

⁸ Doba areg dan den dou yen gin, kaba, emaimo dau lusud misen meren gauwamara dousero. Doba aimo dau areg len log deb se Surad Injil Meb Mohon deb dangga sug nosa touohob.

⁹ Anai se Musa men gomnomna gin, kaba, Allah arougb en, endagai: Sug sapi aiyan tramdad mogo etrij dau mos, kaba, yen yemeg aigdaga mes dougwo mers touwero. Doba yen yamsoho en naugb en et ingma toua. Doba areg Allah en en dougwo Musa an ginohob, kaba, en enara dou en, anai en medoc erij an sapi misen ginei?

¹⁰ Naro, en emenara dou en, anai en medoc emerij an sapi misen ginero. Doba en enara dou en eisaugb emen gedig emen emesai en moro eisaugb Krisdus dou lusud gin dous. Dauntoba sug emen emogo Krisdus dag buc gototo naugb lusud. Dara emen emedidib meijouhw augwan asesa dou len toua, kaba, emen emod emina debsa len naugb len lekeba ara ara ingma dou emen. Aninim dag sud hom sug en ogo cinogo. Hanoba en eba meij dara en ouci mera debinim ucan gini, kaba, en od mena debsa men mougt dag cum, kaba, en emekeba mera ingma ucugb dou en toues.

¹¹ Dangga hang, sug emen emeba Mer Geigouhw eisaugb Krisdus dag meij dou yen sug nosa, kaba, emen emedreg dau emen goubesa sug emen emacgeij ara ara geb se cinogo gin ingma dau yenohobei? Naro, emen emedreg dau emen goubesa gin ingma an yen touwero. Doba emen emaimo emen goubesa gini an yen dous. Anai sug emen emesai Krisdus moro dou yen sug nosa, kaba, eic dag Allah esa Mena Gogoufu se yen meigdoc mes. Hang yen yera mera einyana geigouhw ogdoc en touohob.

¹² Dangga sug gembala gus meren goubesa inggebga naugb len lacgeij ara ara dau yen, kaba, Barnabas aman goubesa naugb gini edreg dau len ingga namcir. Anai aman eng amesai Mer Geigouhw eisaugb Krisdus dou yen aimougtutohob. Dobnaro. Aman amemaimo aman goubesa gini mougwa hom an yenero. Doba sug aman ara ara emedeinyum naugb sug aman ameigtouwero, kaba, aman amaiyan aman amdocesem dau augwan gin namcir. Dauntoba areg aman amacgeij gin, kaba, emedag sogo maga dougwo yen dau Mer Geigouhw eisaugb Krisdus ginero. Doba yen meigdoc esgiraha naugb yen yaimo mer gin terimda.

¹³ Augwan gini aimo dau areg Allah ogod an naugb men lusud gedig len lesedougwo men tuari dara men boromei gin deb sug nosa touohob. Anai men lusud areg leicara se men tuari gini, kaba, len lemehilon ared dau lenin touwero. Doba len lekeba dau areg lusud lodo dou Allah ingma dou len toua. Dara leng lesedougwo men boromei gin, kaba, len lemeic lenin meren aregoufu naugb lemauma ara ara touwero. Doba areg len lob se boromei naugb len lauwaharo dou Allah, kaba, len lekeba ingma naugb len let toua.

¹⁴ Dangga toua, maman Adehsud en mer ogod an deb sug nosa touohob, endagai: Gareg en esai Mer Geigouhw eisaugb dan dou len gus, kaba, len gedig louman en mer an gini, kaba, len leic ara ara edeinyum dou en toua. Yen yemecinaga areg gin augwan dag misenbumei? Naro, yen yecinaga augwan gini dag misenohob.

¹⁵ Hang indan goubesa inggebga naugb sug dan dacgeij ara ara dau yen terimda. Doba dan demaimo indan goubesa gini an yen mougwa hom touebma. Dangga areg dan dog dou yen gini, kaba, aninim dag dan demebiji naugb dan daimo indan goubesa an yen touwero. Anai dan deigdoumesa danin indoho an dou lusudohob, dag dan demacgeij ara ara hom dau len touebma. Doba dan desai Krisdus moro augwan dag mogud dou len dous. Gedangga, kaba, dan demebiji naugb sug dan dacgeij ara ara dau yen touwero. Anai sug dan deicara dag gin, kaba, areg dan deigdoumesa danin indoho an ginohob, kaba, dag augwougb dous. Dobnaro. Eigouhw naugb dan domom dauwahabi, dau sug dan demacgeij ara ara dau yen toua. Dauntoba areg dan deigdoumesa dan indoho an ginohob, kaba, emediyebeiya dau dan touwero. Doba eb naugb dan terimda.

¹⁶ Doba sug dan deigdoumesa dan indoho an gini, era dan demeigdoumesa dan indoho an ginero, kaba, augwan inggaida. Anai sug dan desai Mer Geigouhw eisaugb Krisdus gin dou lusud, kaba, dan demeic dau danin indoc mesero. Doba enin eng arougb dan, hang dan demesai dou lusud toua. Dangga sug Krisdus enin eng arougb danohob, kaba, dagiro, naugwe hang, dan deigdoumesa danin indoho an gin dou lusud dag dan desai en moro dag mogud dou lena? Naro, dan demeigdoumesa danin indoho an gin dou lenero, doba dan daimo dag gin terimda. Anai sug dan darges gin deb, kaba, Allah eic gogom medam dou dan icira gin toua namcir.

¹⁷ Dangga sug dan deic dau danin indoc mes naugb dan debedbed dou lusud, kaba, indan goubesa inggebga naugb dan dacgeij ara ara dau len toua. Dobnaro, kaba, dan demohoiya dagiro? Anai areg dan desai gin, kaba, dau danin indoc mesero. Doba Krisdus enin eng ogugwo gini se dan insirohob. Hang en emarougb dan naugb dan demesai dou lusud toua.

¹⁸ Dangga, dagiro naugb indan siouwa gina? Indan siouwa, kaba, dag ingmaroei? Naro, indan siouwa, kaba, dag dan demaimo indan goubesa naugb dan demacgeij ara ara dau lusud touwero. Doba dan desai Mer Geigouhw eisaugb Krisdus dag mogud dou len dous.

¹⁹ Anai dan demouwan naugb areg len leic dou dan gini, kaba, emahud danero. Doba dan desesa gedisi namcir. Hang dan demedag sogougb naugb sud hom ingma touwero. Doba dan dowun danin indoc mes dag sogougb naugb len laugwan terimda. Dauntoba dan dahwan lusud leinyana aud Yesus Krisdus, aimo dau indan goubesa gedeinyum naugb len toua.

²⁰ Dangga hang, sug dan desai Mer Geigouhw eisaugb Krisdus dou leng Yahudi, kaba, dan demedreg meren gaben touwero. Doba dan daimo len an augwan toua terimda, dauntoba dan dahwan len toua aud Krisdus. Dara sug dan desai Krisdus moro dou leng laimo Musa men gomnomna gin, kaba, dan demehig dau len an gin touwero. Doba dan dowun dan indoc mes arjaga naugb dan daimo len se meren gomnomna aud gousanara gin toua. Dauntoba dan dahwan len aud Krisdus gin toua. Doba naugb danin, kaba, dan darges dau augwan gin namcirohob.

²¹ Dangga toua, sug dan desai Krisdus moro dou lugmahara gedig len lemaimo Musa men gomnomna ginero, kaba, dan demaimo gomnomna gin aud gousanara an len touwero. Doba dan darges dau namcir naugb dan daimo len aud areg len let gin dous. Dauntoba dan dahwan len laugwan aud Krisdus toua. Dangga yen yauwam endag dan darges dau Allah men gomnomna augwanohobei? Naro, doba areg dan den dou yen gini, kaba, men meijouhw dag dan darges dau gomnomna eisaugb gousanara deseino len dous. Anai Krisdus moho aiga danohob. Hang dan demaimo en mer aud areg en arougb dan an gin toua terimda.

²² Dangga toua, sug dan datou desij leng Krisden gedig len leija meruwesa ara ara, kaba, dan demesbes an len touwero. Doba dan dowun danin indoc mes arjaga naugb dan daimo len se areg len leija meruwesa gin toua. Dauntoba len lemetohob dan icira ginero. Doba len toua leiji dag lusud mos se Krisdus terimda. Hang se indan geicara augwan, kaba, dan demedreg dau lusud meren gaben touwero. Doba dan daimo len se meren gomnomna augwan namcir. Dauntoba len laugwan lemeihwedig dum smougb ginero. Doba dan dehilon ucina einyana dagiro naugb len, dauntoba merug hosa dau len, kaba, Krisdus eigdoc len dau sesar men gogom augwan toua?

²³ Dangga hang, dan demarges dau sug dan desai Mer Geigouhw eisaugb Krisdus dou lusud touwero. Doba dan deic induwemougb esesa naugb dan dedidib meijouhw augwan asesa dou len. Dauntoba areg Allah en os dou lusud ogdoc Mer Geigouhw eisaugb Krisdus ginohob, kaba, hom emediyebeiya dau dan touwero. Doba augwan eb naugb dan namcir toua.

²⁴ Anai yen yecinaga dau sug lusud lobga lateijim, kaba, dag leinyana gougwa len laimo gin toua. Doba sud hom areg aiyan menesem naugb obga bedreg dau len gus laugwan, kaba, enin dous eng lusud lecgun sogo mesira an merij se en mougt dous. Doba len gus laugwan, kaba, naro. Dangga hang, yen meijina emarjaga dau Allah men ucina aud maireseb huhugb gin touwero. Doba yen yen meijinesem naugb yen yobga asa ucina gini dara meijen goubesa augwan namcir. Dauntoba areg Allah en esedeb naugb yenohob, kaba, emerses dau yen touwero. Doba sug yen yedebeij men usi ginohob, kaba, en eic augwan dou yen toua.

²⁵ Dangga toua, gareg en esedeb naugb en obga asa ucina ginohob, kaba, en emaimo areg en medoc etrij icira gin toua deitero. Doba en ebehnehino enin maga dougwo areg gecgu augwan namcir. Anai en ouwan edesma sogo mesira an merij geigouhw areg len lesedeb naugb enohob. Doba sogo mesira an merij areg len lesedeb naugb en se cinogo gin, kaba, cum, ombrerij namcir. Doba areg Allah en esedeb naugb mamanohob, kaba, emombrerij touwero, doba eb huhugb terimda.

²⁶ Sug areg Allah esedeb gini emediyebeiya dau mamanerohob, kaba, dan demamsoho dan indaga naugb emahwan dan aud areg dan indoc etrij icira touwero. Doba dan dowun dan indoc mes dau gin namcir. Dauntoba Allah emdecicugb dan dau touwero. Doba dan dedesma toua. Anai sug dan dens aremeijouhw eisaugb sug lobga se ucina gini dou lusudohob. Hanoba cum, kaba, dan dedreg dau gin toua, kaba, Allah emebin dan touwero. Doba en ecicugb dan namcir. Dangga hang, dan demobga asa ucina gini augwougb touwero. Doba dan daiyan indocesem terimda dan dedebeij se men usi gin toua. Aninim dag sud hom sug en ouwan ogodir, kaba, en emogodir aibibra touwero. Doba en ed mesira beijouhw, dauntoba en ogod beica namcir toua.

²⁷ (9:26)

1 Korintus

Video 1 Korintus 9

Ikuti Kami:

KONTAK | PARTISIPASI | DONASI